العيال دي بتبقى شايفة ايه؟
يعني أول برسيبشن (إدراك) للأطفال بيبقى ايه؟
الطفل أول ما بيبقى بني آدم كده
محدش يقولي إن قبل الشهرين بيبقى بني آدم
هو بيبقى كائن بيزن وقارفك ف عيشتك وخلاص
لما بتشوف النور مثلاً بتبقى شايفة ايه؟
ولما بتسمع صوت الأم بتبقى حاسة ايه؟
ولما تغنيلها ولا تكلمها وتضحكلها... يبقوا شايفين إنك أهبل ولا ايه؟؟؟
ولما تدخل المطبخ لأول مرة...
وتسمع صوت الخلاط، وصفارة الميكرووف، والبويلر لما يغلي الميه خلاص...
وتمسكها تلجة (آيس كوب)... بتحس إنها ساقعة يعني؟؟
ولما بتاخد شاور لأول مرة...؟
ولما بتسمع صوت الميه وهي نازلة من الحنفية...؟
ولما تحطلها شامبووو وينزل من على عينيها كده وانت بتشطفه..؟
وترش عليها ميه كده...؟ مع إن رش الميه عداوة
ولو مخدتيش بالك من الميه بقى يا حلوة سخنة ساقعة بين البينين ممكن يتحرقوا... يحسوا بألم ولا سخونة ولا ايه؟
ولما تعد ف الكرسي الهزاز...وتهزها وتروح ف النوم مثلاً... تبقى كأنها ف دريم بارك ولا ايه النظام؟
ولما تهشتكها وترميها لفوق أوي وانت تضحك وهي تضحك... ايه مبسوطة أكيد.. بس دي بيحصل ازاي؟؟ الله أعلم
ولما تنام ع السرير... السرير ف حد ذاته كسرير..مهي كانت قبل كده بتنام بالشقلوب ف الرحم
ولما تنام وتصحى متلاقيش حد جنبها... تصوت دي معناها ايه؟ اسم الله فاهمة يعني ايه وحدة
ولما تلفها بلفة وتفكها من عليها تحس إنها سقعانة ولا تحس بالحرية؟
ولو الجو سقع شوية وانت تلاقي ودانها ساقعة.. طبعاً أمك هتقولك أهم حاجة الودان والمناخير دفيهم كويس..
ولما تركب عربية لأول مرة...؟
ولما تتمشى بيها المول ف العربية بتاعتها (سترولر)..؟
وتشوف الأنوار والزحمة والحر ولا حتى المكيفات المركزية.. ايه ايه ايه؟؟؟
ولما تكون كبرت شوية وتشد حاجة من الارفف وانت تسيبهالها عشان تحل عن نافوخك وتتلهي فيها..
ولما تفضحك وتصوت ف وسط الناس وانتي متبقيش عارفة هي جعانة ولا زهقانة ولا مش طايقة نفسها؟ يا ترى خير ان شاء الله؟؟ مش باقولكوا شخصية شخصية يعني ومالية مركزها...
ولما تمسك لعبة أو شخيشيخة لأول مرة...؟
ولما ترمي اللعبة اللي انت شاريهالها وتمسك أي حاجة تانية باستعجاب واعجاب...؟
لما يعجبها الشاليمو بتاعت البيبسي وانت تفتكر بهبلك إنها عايزة تشرب بيبسي وتدوقها مع إنه بيجيب هشاشة عظام..
ولما تشاور وتتنطط على أي كوباية حد بيشرب منها.. والسخيف يقولك دي عينها فيها..
ولما تدوق عصير البرتقان ومزازته وتعملك ببببببببببفففففف...
ولا السيريلاك اللي بتفتف أم اللي جابوه ده... ماله يعني؟ ده جميل.. خلاص يا ستي آكله أنا..
ولا قفلة البوء دي بالصمغ تقريباً لما تقرب المعلقة من بؤها.. لأ شخصية شخصية يعني
واللحوسة بقى... مترتاحش إلا لو قلعت أم البافيتا ووسخت الهدوم كلها... وأكلت رجليها وايديها من اللي بتاكله.. شوفتوا الايثار؟
ولا الدعك ف العينين ده لما تكون عايزة تنام
ويا سلام بقى يا حبيبتي لما تعضك زي الفك المفترس تمام.... بتجرب سنانها بقى...
ولما تتفرج ع التلفزيون ولو ايدك جت ع الريموت وقلبت غصب عنك يا حبة عيني تزغرلك وتشيح بوشها عن الشاشة
ولما تقولك اغغغغغغغ وااااه وايه داااااااااا وبببببببب... دي كلمات يعني؟ هي فاكرة نفسها بتتكلم وتعبر عن رأيها؟؟
ولما تعيط بصوت واطي كده تنده عليك ولو اتأخرت تعلي الفوليوم شوية ولو اتأخرت أكتر تلاقي وااااااااااااااااااااااااء تخرم طبلة ودنك من على بعد متين متر كده
ولما تيجي تشيلها تعد تتشحتفلك نص ساعة يا متوحش يا مفتري...
ولما تلبس مايوه...؟ هي فاهمة أصلاً يعني ايه مايوه؟؟؟
ولما تنزلها البسين ولا البحر وتبقى فرحان أوي.. هي بقى تبقى فرحانة؟؟ يا ترى؟؟
وتعد تخبط بايديها وتطرطش ميه عليك وانت والفرحة هتنط من عينك...
يا ترى كل حركة جديدة بتعملها بتبقى فرحانة بيها؟؟؟
زيك زيها بالظبط؟؟
يا ترى العيال دي بتبقى شايفة ايه؟؟
No comments:
Post a Comment