ليتل انجيل كولد ملك- الجزء الأول

ليتل انجيل كولد ملك

بنتي

ههههه قال أنا باقول بنتي

لسه واحدة صحبتي امبارح بتقولي يا هبلة بقيتي أم

وأحب أبشركوا إن تلات اربع صحابي شايفني هبلة

الأمومة بلسينج ان ديسجيز

يعني نعمة متنكرة

بنتي طبعاً حبيبتي وروحي وقلبي

نور عينيا

ده حب مش ممكن يتوصف

ولا يتقارن بأي حب تاني مهما كان

بس نرجع بقى لموضوع النعمة

عارفين يعني ايه ولادة؟

لتكونوا مستسهلينها ولا حاجة كفا الله الشر

نعمة انك تخلف

نعمة انك تولد

لأ د حوار تاني خالص

ماتخلوا جوزي هو اللي يولد

من اسبوعين كده تخيلت إني حامل

وحسيت إني ف فيلم رعب

ورجعتلي كل الذكريات المؤلمة والجرح من غير الأحزان

اللي مكانوش ضيوفي

يالهوتي

أولد

أولد تاني؟

يا ويلتاااااااااااااااه

يارجلتاااااااااااااااااه

يافخدتااااااااااااه

يا أعصاباتاااااااااااااااه

أنا بيتهيألي إن جميلة بوحريد ماتعذبتش كده

ولما خلعوا ضوافرها كان أهون من العذاب الرهيب اللي اسمه الطلق ده

مبدئياً أنا أعدت أولد تلات ايام

يعني ملك ايز ليتل بريشيس انجيل كمان

مش انجيل أوي وهنرجع للموضوع ده بعدين

أولاً رحت للدكتورة لقيتها بتقولي: ايه ده؟مريم؟ انتي ازاي مولدتيش؟

أنا هاولدك النهاردة

وأنا مذهولة أو مرعوبة وأقولها: ازاي منا مجاليش الطلق اللي بيقولوا عليه ده

أو على الأقل مش منتظم....تفاسيح زي ما بيقولوا

والنبي محدش يسألني مين اللي اخترع الكلمة دي ولا ايه أصلها؟

كفاية إن المصريين بيقولوها...صباح التأليف..

وهي تقولي لأ ده انت عديتي الأسبوع الأربعين

وأنا ف عقل بالي أقول ايه؟ يا دهوتي.. اربعين اسبوع

ده أنا بطلة على كده

اشي وجع بطن وحرقة صدر وقلة نوم

ياعيني عليا ولا شافت عيني نوم وهي جوه ولا لما خرجت

أنام على جنبي أحس اني هاقع من ع السرير وأنام على ضهري تخبط ف صدري

واشي وجع رجل ولا عرفت أصلي ولا حتى أقف ف بعض الأحيان

ولا كنت ناقصة امساك على بواسير على ترجيع

والترجيع ده بقى عايز سبع صفحات لوحده

كنت بارجع ليوم مادخلت المستشفى

المهم، قالتلي روحي حضري شنطتك وتعالي

وأنا بقى رايحة رحلة..

جبت مشطي وشامبوهي وكريماتي وبونبوني

ومصحفي وايت براي ان لاف

ف شنطة لونها موووووووووف اشتريتها مخصوص عشان رحلة المستشفى

وعليها ورد

متفائلة أوي يعني

لو كنت أعرف اللي هيحصلي كنت جبتها فوحلوقي

ويدوني طلق صناعي وأنا أتوجع وأنده على النيرسيز

أقولهم أنا باولد الحقوني

عملت زي قصة راعي الغنم والذئب

كل ما انده عليهم ويجيبولي دكتورة يقولولي ده لسه واحد ونص

وأنا أعيييييييييييييييييييييييييييييييييييييييييط

أقولهم أمال ناوي يبقى عشرة امتى ان شاء الله

يقولولي لما تيجي تولدي

وأنا أقولهم وأن دلوقتي باعمل ايه؟ بالعب؟

وأنا ع الحال ده يومين كاملين صاحبت فيهم نيرسيز الدور كله بشيفتاتهم صباح ومسا شي ما بينتسا

وتجيلي الدكتورة تخبط على بطني وتقولها.. تقول لبطني آه.. متنسوش إن جواها قال ايه ليتل انجيل قال...

"عاجباكي القعدة جوه أوي ياختي؟ يلا بقى خلصينا"

وقالتلي يلا انت هتصومي من الفجر عشان هاولدك بكره الصبح

برضه بمزاجها... ماتخلوها تيجي براحتها.. متضايقين ليه؟

المهم سمعت الكلام.. أصل أنا مطيعة أوي زي مانتو عارفين

ودخلوني اوضه اسمها كشك الولادة...زي كشك الجرايد كده

وأنا هبلة بقى وفرحانة عادي كوووووووووول ولا باولد ولا حاجة

مانا معذورة مكنتش أعرف يعني ايه ولادة

وحطولي جلوكوز وقسطرة وطلق صناعي ف الوريد

ومربطني ف السرير بجهاز بيقيس نبض الجنين

وطبعاً متنسوش إني لابسة جاون مستشفى المجانين ده

والساعة واحدة كده مقدرتش أتحمل الوجع

وبرضه توقعت إن ده وجع الولادة

اسم الله مش ممكن أتوجع أكتر من كده ولا هيبقى أسوأ من ده

ندهت بأعلى صوت... الصوت اللي كان فيا

وقلتلهم ترانكليزيييييييييييييييييييييييير...مهدئ يعني.. بس هم بيتكلموا انجليزي بس

أو لغة الاشارة بقى وربنا معاكوا

وجم الناس بسرعة وادوني أم المهدئ

والوجع خف شوية

شوية ولقيت الوجع زاد

أطلب بقى الترانكليزير بالصوت الحياني

يقولولي لأ خلاص انتي خدتيه لازم يعدي عليه ست ساعات

يا شماتة أبلة طاظا فيا

والوجع يزيد

ويزيد

ويتوغل وينتشر

وأنا أعييييييييييييييييييييط

وقال يجيبولي أكسجين ويقولولي شمي

أشم ايه ياختي منك ليها

يقولولي بيساعدك ع التنفس

جابولي تانك واتنين ودخلنا ف التالت ومفيش أمل

ولا أنا ولدت ولا الوجع قل

كنت شفت فيلم أجنبي كانت في الست اللي بتولد قاعدة تشتم ف جوزها

وتقوله انت اللي عملت فيا كده

أنا بقى كنت باقول لا حول ولا قوة إلا بالله وأزغرله

والساعة بقت واحدة

واتنين

وأربعة

وأنا أعييييييييييييييط وأقولهم فتح ولا لسه

يقولولي ع الساعة خمسة ولا باين ستة إنه بقى اربعة سنتي بس

وأبص ع القسطرة وأقولهم أقوم أقف حاسة إني مشلولة

ويقولولي لأ ما ينفعش عشان القسطرة

وأنااااااااا أعييييييييييييييييييييييط

وأزغر لأحمد وأقوله أول وآخر مرة

وفجأة طلع عليا عفريت يقولهم ابيدورااااااااااااااااااااااااال

ودي حقنة تخديرية بتتاخد ف الضهر عشان تخدر الجزء التحتي.. اللي بنولد منه ده...

ومن أعراضها الجانبية الصداع المزمن ووجع الضهر وأحياناً الشلل

سيدتي الوالدة

مش أمي يعني.. اللي هتولد وتبقى أم هي كمان

إذا كنت على وشك الولادة، فلا تأخذي الابيدورال أو ما تولديش وريحي نفسك

ويكلموا الدكتورة يقولوها مريم عايزة الابيدورال وتقولهم ليه كده؟

تعالي ياختي اولدي مكاني وانتي تعرفي ليه كده

المهم أحمد جري يعمل الورق أصلهم بيمضوه على إن أي ضرر يحصل على مسئوليته الشخصية

ويدفعوووووووه طبعاً

و ف الآخر ماخدتهاش

وهو مشي من هنا وأنا ابوش... أدفع وأعييييييييييييييييييييييط

جاتلي النيرس تشوف لقيته تسعة أخيراً.. يا مسهل.. هاولد أخيراً

وخدوني على غرفة العمليات وقالولي استني بقى اهدي شوية عشان نجيبلك الدكتورة بتاعتك

قلتلهم بأعلى حسي لألألألألألألألألألألألألألألأ

أي حد يخرجها ان شا الله قرد بصديري

جت هيييييييييييييييييييييييير أأأأأأأأأأأأأأأأأأأأأأأأأوت

وجت الدكتورة وقالتلي بوش بوش بوش

وكلينتون وريجان

وجت... جت الليتل انجيل كولد ملك

ودي كانت آخر مرة أشوفها انجيل

بعدين بدأت سلسلة الليتل انجيل ان ديسجيز

ومسكتها ف ايديا وبوست راسها وعيوني دمعت

من الفرحة..ومن الذل..

يا بنت اللذينا... حاجة مش باينة كده عذبتني تلات ايام

يا سبحان الله

المهم إني ولدت

إلى كل صحابي اللي بيقولوا عليا هبلة وبقيت أم ازاي

واحدة واحدة

نفر نفر

زنجة زنجة

بيت بيت

مش هاقولكوا أنا بقيت أم عشان تعبت و و و و

لأ عشان أنا بطلة من حرب الولادة

أنا أم عشان ولدت وتمت العملية بنجاح

بس لسه هبلة عشان مستعدة أولد تاني

ههههههههه

وعقبال عندكوا أول وتاني وتالت ودستة

مع تحيات أم الليتل انجيل اللي كولد ملك

إلى اللقاء ف الجزء التاني