زبدية من غير سكر
الزبدية في مجمع العامية المصرية هي علبة بلاستيك من الزبادي
الزبدية ف طبعها ماسخة أو حادقة
الزبدية...بتفكرك بايه؟
الريجيم... الكالوريز- السعرات الحرارية
الكالسيوم... والتغذية السليمة
أنا عن نفسي ولا باكل زبادي ولا بيض إلا لو مضطرة
باحسهم من وسائل التعذيب.. مش أكل ولا تذوق ولا استمتاع بالطعم
إلااااااااااا إذا
أضفت إليها بعض السكر أو العسل أو الفواكه
تقدر تستحمل سماجتها وتستطعمها شوية
غير كده بقى يا معلم يبقى على بؤ واحد
وووووو
لااااااااااازم تاكل... كل يا حبيبي ده صحي ومفيد
وتفتكر بقى طنط منى عامر...وتغمض عينك وتضربه
زيها زي الجواز
الجواز سنة الحياة... لااااااااااااااااازم تتجوز
طب والحب والشوق والمشاعر الملهلبة
مش مشكلة... كله بيجي.. كله بيجي بعد الجواز
ما تقلقش
ماحدش بياخد أكتر من نصيبه
لاف كامز سوفتلي
وإن الحب مجاش والأشواق ما زادتش... ترجع وتلزقها للنصيب
وتقول مهو نصيبنا واللي ربنا كتبهولنا
هننهب يعني؟
زي الزبادي بالظبط.. طلعت حادقة شويتين ولا شرش
مش مشكلة... حظي كده.. خدت البايتة يمكن
بتاكل الزبادي عشان عندك حرقة صدر
مش عشان هو أكلة ممتعة ولا لذيذة
زي سنة الحياة بالتمام والكمال
وإلى كل اللي بيتجوزوا عشان دي سنة الحياة
وكمل نص دينك يابني
وماله جواز الصالونات؟ مهي بنت ناس وتعييييييييييش
ده راجل ملو هدومه وعريس لقطة
ويا بنتي.. من كتر خطابها بارت
ويلا الحقي القطر
والجواز حاجة والحب حاجة تانية خالص
ولا انتي عايزة تتصرمحي وتمرمرطي سمعة العيلة ف الأرض
بكرة تحبيه ياختي
واحنا على أيامنا كنا بنشوف العريس أصلاً
احمدي ربنا
أحب أقولكوا جواز من غير حب ولا شغف وشوق وحنية
ولا وحشتيني ولا اشتقاتلك ولا هاموت عليك ولا مش قادر على بعدك ثانية
يبقى تغمض عينيك وتاخدها على بؤ واحد
أصلها
زبدية من غير سكر
عزيزي القارئ/ عزيزتي القارئة
أمامك استقراء يوضح العلاقة بين الجواز والزبدية:
- إذا كنت شايف جوازك بارد وماسخ وخالي من العواطف المتأججة... تبقى زبدية من غير سكر
- أما إذا كنت ليل نهار بتغني علشان احنا مع بعضينا... فدي بقى زبدية بالعسل..مش السكر بس
- ولو كنت شايف إن الجواز ده أحلى حاجة ف الدنيا... فدي زبدية لاكتيل بالفراولة ولا بالخوخ أو التوت
زي منتا حابب يا معلم ويهنيكوااااااااا
No comments:
Post a Comment