ليتل انجيل كولد ملك- الجزء التاني

ليتل انجيل كولد ملك- الجزء التاني

انجيل ان ديسجيز

بعد ما رجعنا المستشفى بقى كنا بنغني

احنا التلاتة.. سكر نباتة..

احنا التلاتة.. حاجة شرباتاتا..

أول ليلة خدنا شيفتات سهرانين معاها

وتاني... وتالت ليلة

رابع ليلة أحمد أخد وقفة من بتوع صلاح الدين الأبنودي

وقالي: احنا بالصلاة ع النبي حلوين أوي مع بعض

بس أنا عندي شغل ومش كل يوم هاروحلهم مهيس

يعني البس يا معلم

والمعلم ده أنا طبعاً.. مش عايزة كلام يعني

أسهر أنا والأمورة مش بتنام إلا الصبح

وعيني تفقفق وأسقط- بفتح السين وتشديد القاف

وهي صاحية.. ومفوقة..ومصهللة

لأ ومش صاحية تلعب ولا ملهية ف حاجة

لأ بتزن وتعيط وتصوت وتواوأوأ

وأول مرة بقى

ولا أنا عارفة هي بتعيط ليه ولا عايزة ايه بالظبط

أول التعليمات اللي بتاخدها أي أم جديدة

1- شيكي على البامبرز

2- رضعيها

3- خففي الهدوم لو تقيلة

4- غطيها لو حسيتي انها بردانة

طب وأنا هاشم على ضهر ايدي يعني

هاعرف منين بردانة ولا حرانة

يقولك من ايدين العيال ورجليها

لو ساقعة تبقى بردانة

لو دافية تبقى حرانة

تيجي تقلعها حاجة من فوق

شوية وتلاقي ايديها اللي بيقولولك عليها دي ساقعة

وانتي بقى يا عين أمك

عقلك قرب يضرب وتقولي ساعة تروح وساعة تيجي

نرجع بقى لرقم اتنين... الرضاعة

يقولك نظمي الرضاعة عشان تنظمي النوم

وأصل العيل اللي مبينامش يبقى مش شبعان

اطعم الفم تستحي العين.. لأ تتخمد العين

كل ساعتين.. دوول بيحلموا

لأن أول ما العيل يبدأ يعيط يقولولك خدي ياختي حطيه على صدرك ده يا روح أمه جعان

مهي بتاخد بوء.. بوءين.. وتستكفي

وتزن تاني.. وتعيط.. وتصوت..وتواوأوأ..

وانتي تلفي ف حلقة مفرغة

تعيط..ترضعي..فتعيط...فترضعي

وتعلي الفوليوم.. وااااااااااااااااء

وأنا أوااااااااااااااااااااااااااااااااء

وعملت كل التعليمات

شيكت ع أم البامبرز... ورضعت.. وقلعت.. ولبست

لبسته.... قلعته... رقصته... دلعته

يقولك طيب يمكن عندها مغص...وهو بتاكل أصلاً؟

يقولك: أصل ف الشهور الأولى كده

العيل معدته مبتكونش اكتملت والهوا بيدخل بطنه يعمله انتفاخ ومغص

وتروحي للدكتور يديكي دنتينوكس

ويقولوك ده جميل ومفعوله زي السحر

زي الفل

آجي أديهولها: تتفته.. يا صلاة النبي

ماخدوش يا بابا ماخدوش

طب اديلها ياختي ماء غريب- وده بقى دوا معمول من زيت الشبت وشوية حاجات تانية فوق بعضها

انجليزي الأصل من يجي سنة الف وتمنمييييييييييييت سنة

يعني متجرب

يلا أهو عجبها طعمه وبقت ازازته جزء لا يتجزأ من شنطتي

يبقى أول ما تعيط... أشوف البامبرز، أرضع، أدي ماء غريب، ملي واتنين...

وبرضه بتزن

لحد ما حانت لحظة الحقيقة

وأروح للدكتور ف المتابعة الأولى بعد أسبوع

يقولي بنتك يا مدام لازم تعمل عملية

وأنا نزل عليا سهم الله وكنت هاقع من طولي

وأقوله يعني العياط ده مش طبيعي؟

يقولي لأ يا فندم دي حلقة مفرغة

أم الحلقة المفرغة..هي ورايا ورايا

كل ما تتألم من الفتق تعيط.. وكل ما تعيط تفتقه أكتر

وأنا بقى من دون كل الأسئلة أسأله ايه؟

يعني لما أعملها العملية.. هتبطل زن

الدكتور بقى الطيب المطيباتي يقولي ان شاء الله يا فندم

وعملنا العملية وبعد ما دخلت أشوفها لما خرجت من البنج

لقيت صوتها رايح يا حبيبة قلبي

وموت نفسي من العياط

وصوت لأحمد بالصوت الحياني اللي انتو عارفينه

وأقوله: الدكتور نصب علينا.. عملها اللوز بااااااااااااين

وأحمد طبعاً وقع من ع الكرسي ويقولي انتي ف ايه ولا ف ايه

بتنكتي سيادتك؟

آآآآآه بانكت- أنكت بفتح النون وتشديد الكاف ف المعجم العامي المصري أي ألقي نكتاً

من اللي شوفته ياخويا

وروحنا البيت

وداااااااااااارت الأيام... ومرت الأيااااااااااااااااام

وهي لسه بتزن.. وتعيط.. وتواوأوأ

بس الفرق الوحيد إنها بطلت تصوت

أحمدك يارب.. دهب ياقوت مرجان

بطلت تصوت.. المكنة بطلت صويت..صويت بطلت

يا مصبر الوحش ع الجحش

طبعاً برضه أنا الوحش.. مش عايزة كلام دي

ويقولولك.. وهم كتير من باب العلم بالشئ.. مش واحد بس اللي بيقولك

انت تخلف من هنا.. والفتي يشتغل من هنا..

الفتي: في نفس المعجم العامي المصري.. أي إنك متعرفش حاجة عن حاجة وبرضه تدي نصايح عن نفس الحاجة..سبحان الله

وهذا مرض يعاني منه نص الشعب المصري..وبدأ يتفشى ليحصل نسبة قد تصل بعون الفتي إلى تلات ارباع الشعب

وتحتل أكبر نسبة من الفتايين الناس الكبيرة أصحاب المفهومية والخبرة والنصايح اللي متخرش الميه

وفي حقيقة الأمر أنها تخر الميه والهوا و و و و

يقولولك ايه بقى الشهرين الأولنيين أصعب شهرين ف عمر الطفل

إلى كل الفتاييين أقولكم من موقعي هذا

وبعد تسع شهور من الأمومة...عدى فيهم

أول شهرين.. وتاني.. وتالت.. ورابع شهرين

والنبي ولا الشهرين الأولنيين.. ولا التانيين,,ولا التمنتاشريين

كله أسخم بعضه.. وما أسخم من ستي إلا سيدي

يلا حبة تراث كده على ماااااااا قوووووووووسم

على طول قلقانة.. ومحتاسة.. ومش عارفة راسك من رجليكي

كل شهرين بيجوا ببهاريزهم وسلطاتهم وباباغنوجهم

ايه رأيكوا ف رحلة مع طفلتك للمول؟

وهي مستكنيسة وآخر روقان ف عربيتها الجميلة

ومعلقالها لعب بتتحرك وتعمل أصوات ولافتة نظرها وفل الفل

لأ بتزن برضه.. وتسمعك أحلى سيمفونية..

مش عاجبك الشوبينج ليه يا حيلتها؟

خايفة على جيب أبوكي أوي كده؟

ولا هو موصيكي عشان نزهق ونرمي اللي ف ايدينا

وأهي تبقى مصلحة ومنشتريش حاجة ومانصرفش فلوس

لأ لأ لأ كلكوا حلياااااااااااا ولا ايه

تكوني بتلفلفي ف المحل بنت ناس كده.. وملو هدومك اسم الله

وبليز جيف مي ذا بلوو دريس آن آي ويل تايك ذات وان

ومن غير أي مقدمااااااااااااااااات

وهي على صرخة واحدة

ماخدوش يا بابا ماخدوش

وهي اكلينيكياً مش بني آدمة دلوقتي

يعني ولا معلش يا مامي ولا قربنا نخلص ولا خدي اللعبة دي يا حبيبتي

وهي.. الليلة يا عمدة.. يعني الليلة يا عمدة..

تفضحك وتشرشحك ف المحل

فتاخدي نفسك من قصيرها يا حبيبتي

وانتي ف ربع هدومك

وعدل ودغري ع الحماااااااااااااااااااام

ورضعي يا أروبة..نيمي يا أروبة..

وف الطريق إلى الحمام، دراع أمك يتملخ من الشيل والهز

قبل الشهرين بقى... وجوه البيت.. انتي حياتك بنتك...وبسسسسسسسس

ولا تقوليلي شغل.. ولا انترنت.. ولا قرايه.. ولا حتى تلفزيون

نسيت أشرحكلو يعني ايه مش بني آدمة اكلينيكياً

يعني ولا بتضحك لما تضحكيلها.. ولا تنبسط لما تلاعبيها

ومابتبقيش عارفة هي شايفاكي ولا لأ

شامة ريحتك وسامعة نبضات قلبك زي الفل

وعزيزتي الأم: إياكي وتجاهل طفلك

لاعبيه.. ودلعيه.. وغنيله

وكعبه كعبه...حبيبي وأنا ألاعبه

لأن طفلك بيحس بيكي وبيسمع صوتك وبيشم ريحتك

وانتي بقى يا حبيبتي مش على قد تغيير البامبرز أو الحفاضات لأحسن يطلع فيه ناس مقاطعة

لأ ده انتي بتعمليلها مساج وتحميها.. الأول من غير ميه لحد ما الصرة تقع وبعدين خلي الميه تبوشها.. مفيش مشكلة

وتكلميها وتطبطبي عليها وتلاعبيها بالشخاشيخ وبالأنوار عشان تنمي ذكائها

وتصوريها.. كل يوم.. وكل شوية... تصوريها

ولما ترفع رجليها بتفرحي

ولما تتاوب بتفرحي

ولما تبتسم وتقولي الملايكة بيضحكوها تفرحي

ولما تقري الكلام ده وتفتكري الشهرين دوول تفرحي

وتقولي أهي الفرحة دي اللي بتنسيني انها انجيل ان ديسجيز

ومش بافتكر إلا انها ماي ليتل انجيل اللي كولد ملك

قال اسم على مسمى قال

مع تحيات أم الليتل انجيل اللي كولد ملك

وإلى اللقاء ف الجزء التالت