ليتل انجيل كولد ملك- الجزء التالت
بسم الله الرحمن الرحيم
استعنا ع الشقا بالله
وخلصوا الشهرين الأوليين
وخلصنا من المغص والفتق و و و و
لأ مفيش و و و و
هم دول بس اللي خلصوا
مع العلم إن ماء غريب لسه ماتشالش من الشنطة
لأن المغص لازال يحوم حوالين اللي جابوني
وبطلت أشوفه ف الأفق بعد اربع شهور بالكمال والتمام
لسه مبنامش بليل
ولسه بارضع كل ساعتين وإلا سارينة الاسعاف اشتغلت وأقول على روحي يا رحمن يا رحيم
لسه فيه زن... مع تغير المطالب طبعاً
بس أهم حاجة بالصلاتو ع النبي انها بقت بني آدمة اكلينيكياً
تضحكلي وأضحكلها
تلعب معايا
وتمسك مني الشخشيخة.. وبعد كده بشوية.. تبدأ تلعب بيها لوحدها.. وتجيبها من ع الأرض
وتتفرج على التلفزيون.. سنا وبراعم فقط لا غير حيث أنها ترفض الفرجة على سبيستون حتى
حتى توم وجيري مابتقبلش أشكالهم
ما شاء الله.. شخصية قوية .. ولها حق التعبير وحرية الرأي ف بيت ديمقراطي يعيش تحت سقفه ديكتاتور مثل لولو
ولا أنا باتفرج على امبيسيهاتي المفضلة
ولا باباها بيتفرج على جزيرته ولا حياته ولا بيبيسيهو أرابيك طبعاً
أحمدك يارب جت من عندك.. ومابقتش مضطرة أتفرج على كل وجع الدماغ ده
ربنا يخليكي ليا يا لولو يا حبيبتي
دلوقتي الشخصية اتضحت معالمها
وباحب قناة كذا وباحب أنام ف الضلمة وباحب أرضع وأنا قاعدة أحياناً
مفيش مشكلة
بس نيجي للأكل بقى ولألألألألألألألألألألأ
لازم نعمل وقفة
برضه من بتوع صلاح الدين الأبنودي
يقولك ابدئي أكلي من الرابع
مش أكل أكل يعني
بس عشان الطفل بتعود ع الشوكة والمعلقة..
أقصد المعلقة والكوباية
عشان تعرف إن ف وسائل تانية تحصل منها على الغذاء.. بدل السيكو سيكو
وأبدأ أنا ف الرابع وأسمع الكلام..مطيعة أنا...
وأشتري سيريلاك رز... ودي برضه مش دعاية لسيريلاك..
وللناس بتوع المقاطعة.. تقدروا تجيبوا أي سيريال/ حبوب تلاقوها..ده إن لقيتوا
خبراء التغذية ينصحون... أرز.. شعير.. شوفان.. قمح
حلوة خبراء التغذية دي؟؟؟
معاكوا أي دكتور تخين ولا بنضارة من بتوع الحياة وكل يوم بنكبر...
وأحاول أنا... بس باحاول
لأن ولا محاولة نجحت
وباءت كل المحاولات بالفشل
من تفتفة.. وهز دماغ.. وعياط.. وتخبيط ف المعلقة..
مع إن كان لونها يا أحمر يا أصفر يا برتقاني
ولم أصل أبداً لفعل التأكيل.. وتوقفت عند المحاولة
ماشي سا فا... نجرب القمح بالفواكه
وده بقى طبعاً بعد الست شهور
يحتوي هذا النوع من السيريلاك على التفاح والبرتقال و ... و ....
الأنانااااااااااااااااااااااااس
اللي بنتي طلع عندها منه حساسية منه
وكل ما تدوقه وشها كله يبقى فراولاية مستوية
يضرب أحمر من هنا... وأصوت أنا من هنا
في أوروبا والدول المتقدمة... كل واحد يقولك أنا اليجريك- بتعطيش الجيم ل... كذا وكذا وكذا
وعاملين ليستة كاملة بالحاجات اللي ممكن تجيبلهم حساسية
واحنا ف مصر يا حبيبي.. ناكل اللي ناكله ونقولك دي معدة مصرية تاكل زلط
وعليها.. فضلت-بكسر الفاء- العلبتين الرز والقمح بالفواكه منورين الرخامة عندي ف المطبخ
الرخامة: هي قطعة طولية أو مربعة من الرخام توجد كجزء لا يتجزء من المطبخ المصري يتوضب عليها الخضار
وتزين بعلب التوابل أو البرطمانات التي تستمتع الست المصرية بشيلهم ف الدواليب واستخدامهم لتخزين أي شئ وكل شئ
بلاش السيريلاك... نجرب ايه يا ترى؟
يلا نسأل الست المصرية الأصيلة التي تفترش الأرض وتفتي.. وطبعاً فاكرين الفتي عرفنا اللي عرفناه ف الجزء اللي فات
شوية رز وملوخية ياختي واديهملها هتبلعهم هوا...رز وملوخية ايه يا موكوسة؟ هاجيبلها اسهال.. والتوم والسمنة دوول مش ف الاعتبار
وانتي قاعدة تلفي المحشي كده يا حبيبتي.. حطيلها ف بؤها شوية رز بالخلطة.. وهينزل ف البامبرز زي ماهو...
يا صلاة النبي... يعني صلصة مسبكة.. ورز ني... يافرحتاااااااااااااه
أكليها من اللي بتاكلي منه ياختي.. امال عايزاها تتعود ع الأكل ازاي؟.. أي حاجة قدامك وكل حاجة
يعني كيك بالشوكولاتة يمشي... جيلي مفيش مشكلة... مكرونة باشميل.. ايه المانع؟
بلاش الأكل.... طب أشربها ايه يا اخوانا؟
شوية شاي بلبن يا حبيبتي
شوية شاي وكسريلها فيها بسكوتة
شااااااااااااااااااااي.... يا ويلتاه
كافيين.. وحرق دم.. وتكسير عظام
وماله يا حبيبتي؟ عشان ينبه العيل ويبقى ذكي كده اسم الله
شوية عصير برتقان يا حبيبتي يجري بطن العيل
وهي ناقصة؟ ده أولاً
وثانياً: الحمضيات قبل السنة الأولى ممنوعة لأنها ممكن تجيب قرحة ف المعدة
الحمضيات ممنوعة قبل السنة
والسكر ممنوع
والعسل ممنوع
واللبن البقري ممنوع.. والجاموسي ممنوعين.. مش ممنوع واحد بس
بس تقولي لمين؟ باكلم نفسي... باددن ف مالطة
اسكتي اسكتي انتي اللي محبكاها شوية
بحبحيها ربنا يبحبحها عليكي
وده ياختي بقى ف أنهو صفحة من الكتاب
ف الصفحة التمنتاشر
وانتي مال أهلك يا ولية؟؟؟؟
بنتي ولا بنتك؟
ماشي يا ستي اللي تشوفيه
مشيها راس القرد
بس عشان تحل عن قفايا وتحط لسانها ف بؤها وتنقطنا بسكاتها
وأسمع من هنا وأفوت من هنا
اللولو عايزة تنام
اللولو مش السنتر الهايبر ماركت
دي ال التعريف مضافة إالى اسم دلع بنتي
يلا يا لولو خشي اتسطحي ونامي
لأ أبداً
لازم يا مامي أصوت وأعيط وأعصب وأخبط ف اللي ألاقيه ف وشي
طيب.. هزيني يا مامي
دوخيني يا لمونة دوخيني
ولا اطفي النور وذلي نفسك وماتشوفيش اللي وراكي وتعالي رضعيني عشان أنام
ف أي ساعة من النهار والليل
ادام طالبة معاها بنوم... تبقى طالبة معاها بزن
علاقة طردية
وكلما زادت رغبتها ف النوم.. كلما علي فوليوم الزن
وأخيرررررررررررررررراً
قفلت عينها... نص قفلة... واتسطلت
أحمدك يارب
نص ساعة..نص ساعة فقط لاغير
وأسمع من الركن البعيد الهادي
أأأأأأأأأأأووووووووووو
لوووووووووووووولوووووووو
أنا جاية يا مامي
ارحمني يارب
ايه نوم العصافير ده يا اخواتي؟
أعد بقى مع صحباتي أو الأهل والجيران اللي ربنا ابتلاني وطلع عندهم عيال ف نفس سن بنتي
مش كفاية كانوا حوامل معايا ودي بطنها أكبر دي
ودي مناخيرها فرشحت.. شكلها حامل ف ولد
والواد ياخد حلاوة أمه والبت تحلي أمها
وانتي لسه بترجعي لحد دلوقتي يا عين أمك؟
واتوحمتي على ايه؟
لبنتك سننت ولا لسه؟
لما تيجي تسنن حطيلها جل بيتجاب من الصيدلية باربعة جنيه.. بيسكن الألم
بس بنتك طويلة...الواد ابني باين عليه هيطلع مأزعر جته نيلة
الله أكبر.. الله أكبر
خمسة وخميسة
كان عندنا بطة بتمشي كده
البت ماحبتش؟
يادي المصيبة... دي اتأخرت أوي
ماتديها كالسيوم يا بنتي ولا فيتامين دي
اللي بيسنن بدري بيمشي متأخر.. واللي بيمشي بدري بيسنن متأخر
بدأتي تأكليها ولا لسه؟ بتأكليها ايه؟
شكلها ضعيف أوي... وزنها مايجبش سبعة كيلو
متمسكيهاش من دراعتها كده لتتملخ... خدي بالك يا حبيبتي
وانتي مع كل التعليقات الجبارة دي دماغك تودي وتجيب
بنتي ضعيفة؟ بنتي مش بتاكل كويس؟ محتاجة كالسيوم؟
وتروحي للدكتور تشدي ف شعرك... بنتي يا دكتور
يقولك ما تقارنيش.. بنتك زي الفل يا جيرمين
هو أنا اللي باقارن ياخويا؟
دوووووووول هم اللي قالولي
عزيزتي الأم: فكك من كل أصدقائك وجيرانك وبنات خالاتك واعمامك
ويستحسن لو تقاطعيهم ف الفترة دي لحد ما ابنك ولا بنتك يكبروا شوية
أو وانتي رايحة تقابليهم حطي ف ودنك قطنة وبطلي تسمعيهم عشان تعرفي تربي عيالك يا حبيبتي
No comments:
Post a Comment