وانت بقي يا بني آدم عايز منها ايه؟

وانت بقي يا بني آدم عايز منها ايه؟

طبعاً باينة زي عين الشمس إن دي سيكوال أو تابعة للي قبلها مراتك عايزة منك ايه يا بني آدم

وبما إني أكيد هبقى متحيزة عشان بنات جنسي طبعاً

بس هاحاول على قد ما أقدر إني مكونش شريرة وآجي ف صفكوا شوية

مش لدرجة طويل العمر يطول عمره ينصره على مين يعاديه

هاي هييييئ

بس اهو ادينا هنحاول

بني آدم عايز ايه بقى:

1- عايزك تكوني أمه وعارفة مش عارف ليه باتونس بيكي وكأنك من دمي على راحتي معاكي وكأنك أمي... وتعامليه زي الطفل تمام.. وطبعاً فميش داعي أفكرك عزيزتي حواء- حلوة عزيزتي حواء دي تحسسك إني هاتكلم عن ماسك ولاحمام كريم- أفكرك بايه بقى؟ إن كل برامج السعادة الزوجية تقولك- يعرفني منين عشان يقولي- الرجل طفل كبير.. تغسليله الشرابات الملونة لوحدها والبيضه لوحدها.. وتعمليله السنوتشات وهو رايح الشغل.. وتنيميه.. وتغطيه لياخد برد.. ويبقى أهم حاجة عندك الأكل.. أني فتفوتة والعيال فتفوتة والباقي لأبو العلا.. مين بقى أبو العلا ده جوزك يا حبيبتي..وتقوليله كل.. انت خاسس يا حبيبي.. دي مش أكلتك يا عمو؟..شكلك هفتان يا عين أمك.. وحسك عينك تحسسيه إن ابنك/ بنتك أهم منه عشان الحساسية طبعاً اللي أنا وانتي عارفينها وحافظينها زي اسمنا كده فتلاقيه جاي يقولك: آآآآآآآآآآه ما هو أهم مني وساعتها هيكرهك انتي وابنك كأنك جايباه مع جهاز العروسة كده

2- عايزك رقيقة وصوتك ميطلعش لأن لو صوتك علي عليه عشان أي سبب هتبقي قليلة الأدب وعايزة قعدة.. ولا تقوليلي ما همو عمر بن الخطاب مراته كانت بتعليه صوتها عليه وكان بيستحملها.. مات عمر... الله يرحمه بقى..معدش فيه من الصنف ده ف كارفور... فهمتي يا حلوة... هو ديمقراطي.. عايزة تزعقي زعقي ف سرك.. أصلك لو دخلتي قوضة تانية وزعقتي هتبقي بتبرطمي وهتاخدي على وشك

3- عايزك شيك وستايلش عشان يتباهى بيكي قدام الناس

4- عايزك تداري أم رقبتك اللي بتبان لما الهوا يطير الايشارب بتاعك واللي لاعبتها كل اللعب وربط كل الدبابيس ومفيش أمل.. يلا اهو زكاة عن صحتك

5- عايزك ريحتك مسك وعنبر- ولو إن المسك ده ريحته رخمة أوي- خليها فل وياسمين وشانيل وجادوور طووووووول الوقت واطلعي بقى من المطبخ يا أمي خدي شاور واتبرفني عشان ميشمش منك إلا أطيب ريح ولا تقع عينه على قبيح على رأي الخنساء في وصية أم لابنتها

6- عايزك تحملي وتولدي كل سنة مرة مهو مش تعبان ف حاجة ولا هتخليه هو اللي يولد... ولما تولدي تطلعي من الولادة مشدودة البطن رشيقة القوام.. ولا أجدع ممثلة أجنبية تجيب توأم وتصور مع عيالها الاتنين بعدها بشر وكأنها أنسة أصلاً ودول اخواتها

7- عايزك سوبر ستار ولا ديفا تصحي من صباحة ربنا تغسلي سنانك وتسرحي شعرك وتتمكيجي وتعملي نفسك نايمة لحد ما يصحى من النوم يلاقي صاروخ نايمة جنبه ... طبعاً الكلام ده تهريج.. بس لو ف ايديك تصحي قبله وتسرحي شعرك ع الأقل عشان ميلاقيش شيتا جنبه يا حبيبتي.. ده غير اللبس بقى... عزيزتي حواء: أرجوكي انسي الجلابية ولو عندك جلالايب اخفيها ف الدولاب أو وزعيها.. فإن الرجل لا يحب أن يرى امرأته مثل الشوال المتحرك.. البسي حاجة تظهر جمالك

8- تقومي ياللي تنشكي ف بطنك تعمليله فطار ولا شندوتشات ياخدها معاه الشغل عشان يقولك انتي زي الفل يا جيرمين

9- تفضلي طبعاً صاحية بعدها تشتغلي ف البيت تحضري الغدا بس تنامي لأ حكم الايد البطالة نجسة... ومواعيد نومكوا تبقى مع بعض وتقدري تقومي تصحيه الصبح... وطبعاً متدلقيش عليه ميه.. دلعيه وانت بتصحيه.. اصحى يا حبيبي اصحي يا عينيا وتكلميه بصوت واطي متجعريش ولو مصحيش ان شا الله عنه ما راح الشغل.. وقضوها داي اوف وظبطوا بس عزيزتي حواء لا تستغني عن رقتك وصوتك المسهوك أبداً

10- يجي من الشغل يلاقيكي مخلصة الأكل ومش بعيد تكوني حاطاه ع السفرة وتقابليه بابتسامة وتجري عليه عشان يشيلك ويلف بيكي شوية... ولو كنت تخنتي شوية مش مشكلة الرجالة عصب وبعدين حد قاله يخليكي تحملي وتولدي وترضعي.. وتقوليله وحشتني يا سيدي وتاج راسي... البيت وحش من غيرك

11- أهم حاجة تبقي ماسكة ف نفسك.. مش لازم تبقي باكينااااا ... وإلا سبعك هيحس إنك شخصية فيبراتيد-مهزوزة يعني- وساعتها بقى يا أختشي ممكن يلعب بديله

12- حسك عينك تحكيله عن كلامك مع صحابك أو تعامل واحدة فيهم مع جوزها.. ممكن الشيطان يوزه ويقولك يا عيني عليا وعلى بختي ماصاحبتها فيها وفيها.. و ف وسط الخناقة يرزعك الكلمة ويقولك: ده انت حتى مش بتعملي زي فلانة واهي صاحبتك اهو مش جايبه من بره

13- عايزك تثقي فيه.. يعني بلاش الجنونة تركبك لما يتأخر شوية وتقوليله كنت فين يا سبع البرمبة وشايف الساعة كام ف ايدك بس لو اتأخر أوي اتصلي بصحابه ولو مجاش للصبح اتصلي بالبوليس.. هتشرشحيه قدام الناس بس هيشيلهالك ويقول دي بتحبني وبتقلق عليا... الثقة مهمة جداً ف الجواز.. مش أي واحدة تكلمه ف الشغل تنكدي عليه عيشته وانت شايفها أحلى مني والأفلام دي.. متنسيش الثقة ف نفسك اللي قولتلك عليها.. كبري دماغك بس خليه ياخد باله انك مش بتحبيه يقرب من أي حد غيرك.. ولما تشوفي البت دي بقى طلعي اللي جابوها وقوليلها لو قربتي من جوزي هافقعلك عين

14- عايزك تثقي ف إنه راجل ملو هدومه قدها وقدود... احنا عارفين ان الستات بتفكر أحسن ومخها وقوة تحملها أكبر.. بس متبقيش هبلة زي لينيت اللي ف ديسبرات هاوسوايفز وعلى طول تحسسيه إنه مبيعرفش يفكر وإنك أحسن منه ولو معملش اللي انتي بتقولي عليه يبقى أهبل وإن أمه داعياله إنه أخد واحدة زيك.. انقليله رأيك من تحت لتحت كأنه طالع منه

15- عايزك متشتريش أي حاجة ولا تدفعي فلوس ف حاجة مانتي مش تعبانة ف حاجة.. مش حاسة بقيمة القرش.. لأ لألأ مش كده.. خلينا نكون فير.. هو عايزك متشتريش حاجة ملهاش لازمة.. ودايماً تختاري التوقيت الصح للشرا والشوبينج.. يعني أول الشهر مش آخره.. وبترتيب الأولويات.. يعني اللي يحتاجة البيت يحرم ع الجامع

16- عايزك مثقفة مش بطيخة... اعدي اتفرجي ع الأخبار قبل ما يجي ب 10 دقايق كده وقوليله أخر الأنباء بعد الأكل بنص ساعة... واتكلمي معاه ف السياسة والاقتصاد واسمعي عن شغله حتى لو ملكيش فيه وحاولي تعرفي وتتعلمي.. ولما تلاقي وقت فاضي بعد ماتتفرجي ع المسلسلات الأجنبية والتركية والمصرية، اقريلك جرنان ولا صفحتين من كتاب.. خلي عقلك على طوول صاحي.. مش يبقى آخر كتاب قريتيه ف الجامعة

17- عايزك ودودة بتودي أهله وتعصري على نفسك وتسألي عليهم

18- عايزك كريمة بتكرمي صحابه لما بيعزهم ف البيت وتعمليلهم المحمر والمشمر واطبخي يا جارية كلف يا سيدي

19- لازم طبعاً تكوني طباخة ماهرة.. لأن قلب الرجل في كرشه-أقصد معدته ليزعلوا مننا يا بنات-... وست بيت شاطرة ولو مش خدمة 7 نجوم ف برج العرب.. يبقى أضعف الايمان خدمة 5 نجوم ف الهيلتون.. ومبدئياً مش عايزة أي اعتراضات من الرجالة لأني مشفتش راجل ف حياتي مش عايز بيته فلة شمعة منورة وعايز مراته تغسل وتكوي وتمسح وتكنس وترتب السرير وتنفض وتعمل المواعين وتطبخ و و و و

20- عايزك تربي العيال كويس وتاخدي بالك من مذاكرتهم عشان توفروا ف الدروس الخصوصية ولو حتى بتدوا دروس عايزك تعدي على راسهم عشان يخلصوا مذاكرة وميسهوكيش ويلعبوا بلاي استاشين

21- عايزك حنينة عليه ولو جاي مضايق من الشغل واتعصب عليكي متولعيهاش انتي كمان.. خديه ف حضنك ونيميه على صدرك وطبطبي عليه وقوليله يلا احكيلي ايه اللي مضايقك.. ده طبعاً في حالة إنه كل خلاص بالهنا والشفا.. والعيال نايمة أو مسرباهم

22- عايزك ظريفة ودمك خفيف ولو مش بتعرفي تهزري اضحكي على نكته البايخة

23- عايزك تبطلي نكد ومتنكديش عليه ومجبتش ومعملتش... ومتتخانقيش... مش هاقدر أقولك متزنيش لأن يا أختشي الزن ع الودان أمر من السحر وشغال مع الرجالة زي الفل ومبيجوش إلا بكده

24- عايزك تدلعيه وترقصيله وتستخدمي خيالك ف كل حاجة.. تكوني مبدعة في تدليله واسعاده

25- عايزك تشاركيه اهتماماته وتتفرجي على أم الماتشات اللي بيتفرج عليها ان شا الله يكون ماتش ريال مدريد وبرشلونة وتشجعي مانشيستر يونايتيد... وتديله وقته اللي يمارس فيه هواياته ويخرج يلعب كورة مع صحابه أو يلعب تنس أو يعدوا على قهوة... وفكك من الضيق ونزل وسابني ومش عايز يعد معايا.. ريحي أعصابك وخدي شاور واتشيكي واستنيه على ما يجي..

26- عايزك تتقبليه ومسألة العيوب دي مسألة نسبية بس تقبليه بعيوبه وده اللي كنت باتكلم عليه ف الأمريكان.. خديه باكيدج.. واحد بيحب الكورة اللي يضايقك ف كده..واحد بيحب عمرو دياب وانتي بتحبي كاظم ايه المشكلة.. لولا اختلاف الآراء لبارت السلع... يحب اللي يحبه وتحبي اللي تحبيه.. ليه تأثري عليه؟ سيبيه براحته.. متخنقيش عليه..لكم دينكم ولي دين

27- عايزك تحترميه ومتهزقيهوش ولا بينك وبينه ولا قدام الناس.. مع العلم إن قدام الناس اديله احترام زياده حبتين.. بس مش لدرجة يا أبو حسين ويا أم سناء..

28- عايزك تعرفيه قيمته عندك وتاخدي رأيه ف أمورك واختياراتك الشخصية وتقوليله يا سبعي يا سندي يا مهنيني.. أعيش من غيرك ازاي ياخويا.. ده انت الهوا اللي بتنفسه و و

29- عايزك تخافي عليه وعلى صحته وعلى رزقه يكون حلال أو حرام وتدعيله بالتوفيق والرزق ويارب افتحها ف وشك يارب ويباركلك ف رزقك.. يبقى قلبك عليه.. وتحافظي على بيتك وعلى نفسك وتصوني شرفه فيكي وف بناتك

30- عايزك متلوكيش مع صحابك عنكوا ولا علاقتكوا مش بحجة الحسد كفا الله الشر بس بحجة إنه مبيحكيش حاجة لصحابه.. بس هو ميعرفش إن بيجري ف دم البنات كور حمرا وبيضا ورغي.. بدليل إني مش قادرة أخلص كلام لحد دلوقتي