مراتك عايزة منك ايه يا بني آدم؟

مراتك عايزة منك ايه يا بني آدم؟

عشان محدش يقول اني باسرق الأفكار ولا حاجة كفا الله الشر

لسه قاريه حاجة ع الفيسبوك بعنوان : هذا ما تريده منك المرأة يا آدم

وبما اننا مش بنكلم آدم لأن آدم أصلاً مش موجود وأنا ماحبش أجيب سيرة حد

وأساساً موضوع آدم وحوا ده كليشيه أوي وكل ما نفتح الحنفية نلاقي حد بيتكلم عن الرجل والمرأة على انهم آدم وحوا

واللي يقولك حوا اتخلقت من ضلع آدم عشان تبقى قريبة من قلبه ويبقى حنين عليها

ونص اللي بيخلفوا عايزين يسموا عيالهم آدم وحوا

ويسلام بقى لو واحدة جابت آدم وصاحبتها جابت حوا

واتجوزوا وخلفوا وعاشوا ف تبات ونبات وخلفوا صبيان وبنات

ويجي آدم يطلع عين حوا ونكتبله مقالة طويلة عريضة نقوله: ماذا تريد منك حوا يا آدم؟

يلا كفاية رغي كده وأقولك بقى يا بني آدم مراتك عايزة منك ايه؟

1- عايزاك حنين أوي عليها ولا تحب تشوف دموعها

2- بس لو عيطت، متقولهاش اسكتي بس احضنها وطبطب عليها وقولها دموعك غالية عليا.. مش بنطلب كتير يعني ولا حاجة.. يعني ولا قلتلك دمع ولا عيط ولا ابقى سيد العاطفي ولا وريها دموع المرأة المكسيكية

3- عايزاك رقيق وجانتي وده بقى مش كليشيه دي حقيقة علمية... خليك حمش بره البيت.. سبع البرمبة قدام صحابك.. هولاكو ف شغلك.. إنما رقيق مع مراتك.. نصك الحلو - آه حلو غصب عنك عشانك مهما كنت أمور وصاروخ مراتك دي بقى البونبوناية – وأكيد يعني بنباهتك الرقة مش هتنقص من رجولتك ولا شخصيتك القوية اسم الله.. دي هتزيد منها.. كلامك يبقى ذوق ومفيش مانع من يا حبيبتي ويا روحي ويا قلبي... مهي كلها رقة والبنات بتحب السهوكة دي... خدها مني نصيحة

4- لو زعلتها ولا اتحانقتوا متسيبهاش وتمشي ولا تقولها محتاج اعد شوية مع نفسي...تعد مع نفسك ليه ياخويا ماتعد معاها.. قلها أنا أسف... مش صعبة.. 3 حروف بس .. أ..س..ف...

5- حل مشاكلك بالذوق مش بالتجريح وده حقي وانتي عملتي وسويتي.. فوت.. وقووول ماهي برضه بتعملي وتسويلي...بص لنص الكوباية المليان

6- اضحك معاها وهزر واستظرف ... مش لازم ماتسمعش ضحكتك وقهقهتك مع صحابك بس... خفة الدم والفنفنة (جاية من كلمة fun بالانجليزية) مبتطلعش إلا مع الصحاب.. والبوز وتعبان ومش قادر لمراتك بس

7- جدد ف حياتك معاها.. بلاش كآبة... اعملوا جلابية بارتي ف البيت وارقص معاها بلدي.. مش هتقولك من رقص نقص.. اطلعوا رحلات وروحوا مكان رومانسي فيه بيتش.. اتعشوا بره...

8- قرب منها وقرب من اهتماماتها واشاركها فيها مش لازم تكون بتحبها انت كمان بس ده هيقربكوا من بعض جداً وخليك واثق ميه ف الميه انك لو عملت كده هتلاقيها بتعمل زيك بالظبط وتتفرج معاك على ماتش كوورة مثلاً

9- تقبلها وتقبل شخصيتها زي ما هي ومتحاولش تغير فيها حاجة أكيد هي جميلة برضه مش لازم تبقى كربونة منك عشان تبقى شخصية كويسة.... تقبل عيوبها وتتلككلهاش ع الفاضية والمليانة... خدها باكيدج زي ما هي... واوعى تفتكر ان فيه إنسان كامل.. ولا انت كامل.. ولا مراية الحب عميا فهي مش شايفة عيوبك.. لأ هي شايفاها وحافظاها كمان بس متغاضية عنها.. تغاضى بقى انت كمان.. مش لازم تبقى ع الفرازة.. دور ع الحاجات الحلوة والمميزات اللي فيها اللي تخليك تتناسى عيوبها مش تنساها وفيه فرق شاسع بين الكلمتين واحدة بمزاجك والتانية غصب عنك

10- وانت رايح الشغل الصبح قامت عملتلك فطار بوس ايدها وقلها ربنا يخليكي ليا معملتش بقى متبقاش بنت تييييييييت ممكن تكون كانت سهرانة مع عيالك ولا بتروق ف البيت صحيها من النوم وبوسها وقلها هاشتقالك يا حبيبتي... مانتا مش هتكدب ما المفروض ان مراتك هي حبيبتك

11- وانت ف الشغل ف البريك يا سيدي مش ف زحمة الشغل يعني مش هنتقل عليك ابعتلها مسج قلها وحشتيني يومك عامل ايه؟ مش عايزة ايه من بره – ولو انك تشكر برضه ع السؤال

12- تيجي من الشغل عليها طوااااااااالي.. مش ع المطبخ تشوف عملت أكل ايه النهاردة وخلصت الأكل ولا لسه... خدها ف حضنك وقلها اشتقتلك وكنت بافكر فيكي طول النهار

13- مش لازم وحيات أبوك تلاقي الأكل ع السفرة يعني مهي مش رووم سيرفيس ف برج العرب سبع نجوم و24 ساعة ف اليوم- تويني فور سيفن... ايه المشكلة يعني لما تدخل المطبخ تحضر معاها باقي الأكل أو السلطة أو تحط الأطباق ع السفرة هيحصلك ايه يعني هتنشك ف بطنك؟ مهي طبختلك.. بركة.. تشكر(بضم التاء).. لو عليها مش هتطبخ أصلاً ما الدنيا حر.. والعيال كانوا قرفينها طول النهار... والبصل خلص (بتشديد اللام) على عينيها ودموعها.. والتوم ريحته ملت ضوافرها اللي كانت عامللها باديكيير ومانييكر طول مهي ف بيت أبوها.. وايديها اتهرت من غسيل المواعين... ومخها ضرب من كتر مهي بتلملم من وراك كوبايات تحت ترابيزة المكوة وف الانتريه وقدام اللاب وف الحمام كمان...

14- ولما تاكل يا حبيبي بالهنا والشفا قلها تسلم ايدك يا حبيبتي حتى لو مكانش أكلها حلو- مع أن أنا أكلي حلو بس مابسمعش حاجة ولازم أسأل والإجابة بتكون آه جميل- أنا مش عايزة أخلي الموضوع ديني وأقولك ربنا وقال الله وقال الرسول بس والله الشرع كمان بيقول الكلمة الطيبة صدقة وحاجات من هذا القبيل بمعنى اشكر اللي يخدمك.. ده لو كنت ف مطعم والجرسون جابلك الأكل بتقوله ثانك يو وميرسي وشكراً جزيلاً على حسب ثقافتك وثقافته

15- ساعدها ف البيت وبيتهيألي إن الرسول كان يخصف نعله ويخيط ثوبه ويعمل في بيته.. اكوي هدومك مش المفروض إنها غسالة وطباخة وشغالة اغسلي يا أروبة نضفي يا أروبة وكمان لوندري...لأ واجباري اللي يجوز ده ينزل ف الفور سيزونز على طول ولا مراته تتعب ولا تكون مش ست بيت أوي ولا الكلام الفارغ ده... ولما هي مش ست بيت اتجوزت ليه.. وهي وراها ايه؟ أنا باتعب طول النهار وهي قاعدة ف التكييف تشيت مع صحابها وتتفرج ع التيلفزيون.. المرأة خلقت أماً بالفطرة وست بيت تعرف شغل البيت وتربي عيالها.. ولو اشتكى منها محدش هيلومه.. مهي رغوجية اوتوماتيك مبتفصلش.. بس الرحمة يا أخي... فوتلها واعمل انت.. جرب بس... مش هيخس عليك حاجة... اكنس البيت مرة.. اكنس بالمكنسة يا سيدي معدش حد بيكنس بالمقشة يعني مش هتتعب والنعمة

16- اخدمها.. حضرلها الفطار... اعملها شاي أو نسكافيه..جرب تبقى انت الرووم سيرفس شوية..اشمعنى يعني ف الأفلام يجيبوا العريس جايب الفطار لعروسته ف السرير ويقولها محبتش أتعبك.. ولا ده باين اكمنهم ف الهني موون.. أو عشان يقولها عايزك كل يوم تعمليلي كده

17- دلعها ولو مكنتش انت تدلعني مين هيدلعني على رأي حكيم – حكيم المطرب الشعبي اللذيذ مش حكيم زمانه يعني- قلها حتى يا مهجة القلب يا حبيبتي يا حياتي يا نونة يا بطة يا وزة يا توتو يا سوسو يا ميمي يا عم بطوط.. دلعها هتتدلع.. نتيجة حتمية

18- حسسها انها طفلة وفرح قلبها على طول بهدية مثلاً.. مش حاجة غالية لتقوقلوا عليا مفترية.. والله ممكن علبة شوكولا- ف حالتي أنا ممكن شوكولاتة مارس أو ميرسي- ومتتريقش عليها لو كان نفسها ف غزل البنات مثلاً وتقولها بقى احنا كبرنا ع الحاجات دي يا نوال...

19- سمعها وغنيلها ودندنلها اللي تحبه يا باشا- ماقصدش طبعاً الأغاني ف حد ذاتها- الستات ودنية (بفتح الدال) بتحب تسمع.. تسمع كلام حلو وكلام حب... هتقولي منا بحبش السهوكة.. هاقولك وانت مش بتحبها؟ تقولي طب مهي عارفة.... أقولك لأ بقى يا حبيبي في فرق رهيب بين المعرفة والاحساس.. عبر عن حبك.. عبر مين قدك

20- تغنى بكل تفاصيلها ودي حاجة أنا غاشاها من النوت للي قلتلكوا عليها ف الأول... يعني مش انت حلوة بس... لأ...عينيكي سحراني.. انت رقيقة أوي... ريحة شعرك حلوة أوي النهاردة.. انتي مانجة انتي أناناس انتي مشمش انتي خوخ.. لمستك حنينة.. و و و و و ... وانت أدرى بقى يا معلم

21- شغلها أغنية هادية مثلاً أو موسيقى بس لو معترض ع الغناء والغناء حرام وكده وقومها من مكانها وارقص معاها وضمها أوي وقلها ف ودنها أنا بحبك ومقدرش أعيش من غيرك.. ومش باقولك اطفي النور وولعلها شمع ليل ونهار بس من فترة للتانية حسسها انك لسه بتعشقها.. متخليش روتين الجواز يخسرك حبك

22- اخرج معاها وايدك ف ايدها ومتقولهاش ده شغل عيال ولا عيب الناس يا سعييييييييد... وأنا باقولك حاجة قليلة الأدب يا حاج... دي مسكة ايد حوبيكوا حوبي مش حاجة عيب لا سمح الله

23- اتسوق معاها- اعمل شوبينج يعني- ومتبقاش حامل هم الفلوس لأ البلوزة دي وحشة عشان ب 200 جنيه ولا يلا زهقت وتعبت من اللف- حقيقة علمية: كل الستات بتلف كتييييييير عشان ترسى على حاجة عجبتها- ولا تقولها يلا نروح عايز أنام عشان عندي شغل بدري وبين لها انك مهتم باللي هي بتنقيه مش يلا نقي عشان نخلص

24- كن كريماً وصادقاً تجد الحياة جميلة وآخر فرفشة.... الست تكره الراجل البخيل والراجل الكداب... كريم ف أقوالك وأحاسيسك وأفعالك.. بتديها مش بتاخد بس وكل ماهاتدي كل ما هتاخد.. متقولهاش أي كلام فاضي معقول.. انت القمر وانت النجوم... وصلها احساسك بصدق مش بنصب اكمني قلتلك الستات ودنية فتاخدني وتاخدها على قد عقلها مهو يا حبيبي الستات مش هبلة برضه.. وتقدر تعرف امتى بتجامل وامتى بتمثل وامتى اللي بتقولهولها ده طالع من قلبك ولا لأ

25- احترمها وخد رأيها ف كل أمور حياتك ومش معنى كده إنك ترهقها بالتفكير.. انت راجل البيت برضه متنساش.. وتباهى بيها قدام أهلك وصحابك بس مش كتير عشان الحسد... ومتفهش من رأيها أو احساسها أو رغباتها.. يعني بلاش هبل.. بلاش تقولها بلاش هبل يا عاقل يا راسي.. مش عاجبك كلامها ابتسم وقولها بس أنا عندي رأي تاني أو أو أو

26- قدر قدر قدر... وهاكتبهالك ناون كمان عشان تعرف أهميتها... التقدير التقدير التقدير... قدر كل اللي بتعمله عشانك حتى لو كان من أبسط ما يكون... ومتجرحاش عشان قصرت ف حاجة... خلي قلبك كبير وقولها أنا عارف انك تعبانة.. احرجها بذوقك يا نبيه.. هتاخد عينيها وقلبها وكيانها كله... حسسها بقيمتها عندك وقد ايه هي غالية عليك ووجودها يفرق ف حياتك... حاول تتخيل بعدها عنك... دايماً كل ماتحس إنها بقت عادي ده العادي وده واجب عليها وهي مبتدنيش أكتر من حقي.. تخيل إنها مش موجودة هتعمل ايه ف حياتك؟ هتحتاس يا معلم... تخيل بس، هتقدرها وتعرف قيمتها وتبوس ايدها رايح جاي عشان بتكرمك وبتشيل عنك...

27- وأخيراً، خلقت حوا من ضلع آدم- نرجع بقى للكيليشهات- فكن رحيماً بها... ارحموا من ف الأرض يرحمكم من ف السماااااااااااااء أبوس ايدكم وأيادي أبهاتكوا

فهمت بقى يا بني آدم؟؟؟؟