الشعب يريد اسقاط النظام
ولا معادش رايد
وبقى بيقول رايداك والنبي رايداك
زي الست ليلى مراد كده
أنا عايزة أفهم يعني
حد يفهمني يا اخوانا
ازاي لسه في حد عايز حسني مبارك ولا نظامه
ازاي يعني حد يقول احنا أسفين يا صلاح
قصدي احنا أسفين يا بابا مبارك
جتك باووو
قال لو باباك غلط واعتذر مش هاتغفرله؟
وهو اسم الله عليه وع اللي حواليه كان اعتذر
الشعب هو اللي لازم يعتذر
وكمان يدفع فواتير غلطات الرئيس
الشعب هو اللي يتضرب بالكرباج
كرباج النظام الحاكم وكرباج الخيول
الشعب هو اللي يتضرب بالطوب
بمناسبة الطوب صحيح
في إشاعة هطلة اليومين دول
بيقولك
يعرفني منين عشان يقولي
قال ايه: سمعوا واحد م الاخوان بيقول
اضربهم بالطوب ده كل طوبة بحسنة
بالله عليكوا في بني آدم عاقل يعرف ربنا يقول كده
سواء اخوان ولا سلف ولا أي حد بيقول ربي الله
ماهو أصل أي حد يجيب سيرة ربنا يبقى بعبع
أبو رجل مسلوخة ولا بوجي مان زي ما الأمريكان بيقولوا
وكل ما تيجي تكلم حد حافظ مش فاهم يقولك
بيقولك... وللمرة التانية يعرفني منين عشان يقولي
يا عم خليه يقولي وريح نفسك
وهو لازم يعرفك عشان يقولك
بيقولك قناة الجزيرة كخ
وبتجيب أخبار غلط
على أساس يعني إنها بتصور في تونس مثلاً
وإن التظاهرات دي فبركة
وقال ايه المتظاهرين ف ميدان التحرير دول ميجوش 5% من الشعب
الشعب اللي هو مؤيد لمبارك
مؤيد على أساس ايه يعني ان شاء الله
مؤيد لقانون الطوارئ
ولا حظر التجوال
ولا الأمن المركزي
ولا قنابل الملوتوف
ولا المسيلة للدموع
ولا الشرطة اللي سابت البلد تضرب تقلب
وتخلي البلطجية تجيب عليها واطيها
أصلها ف خدمة الشعب
بتظهر ف الأفق بس عشان تموت المتظاهرين بالعربيات
أو تديهم العلقة التمام وتروح كل واحد بدماغ مفتوحة
وكدمات متعددة وجروح خطيرة
عايزين مبارك ليه؟
عايزين غلاء أسعار
عايزين رشاوي ف كل المصالح الحكومية عشان تقضي أي مصلحة
عايزين أمناء الشرطة يلموا يومية من سواقين الميكروباص
عايزين أمن دولة وتغمية عيون والباشا عايزك
عايزين تعذيب ف السجون
عايزين كل واحد يدخل القسم يتعلم عليه بقفا أو ما شبه
عايزين بطالة وشباب مش لاقي ياكل ولا يتجوز فبيتحرش بالبنات ف الشوارع
عايزين قانون مرور فاشل معمول عشان يسرق المواطن اللي طلعان عينه
عايزين أسعار بنزين وغاز تزيد الطين بلة
عايزين حزب واطي يتحكم فينا
عايزين حكومة حاميها حراميها
عايزين الناس نصين: ناس ملياراتها ف سويسرا وناس ملاليمها خلتها تحت خط الفقر
عايزين عبارات تغرق وقطارات تولع
عايزين الحديد يبقى ب 4000 جنيه وزيادة 200 بعد الانتخابات
عايزين النتخابات المزورة دي صحيح
عايزين 30 سنة كمان من الظلم والسرقة والقمع
عايزين 30 سنة يااااااااااااااااااااليل
وتردوا وتقولوا يا عيييييييييين
الليل ده الأيام السودة اللي عايشينها ويا عين ده يا عيني علينا وعلى حالنا
أنا عايزة أفهم هانفضل ع الحال لامتى؟
عايزين مبارك يفضل ع الكرسي عشان يعمل ايه؟
عشان يدي الغاز لاسرائيل... ما لايملك لمن لا يستحق
عشان يخصخص البلد ويخصصها لآل مبارك وحكومته
عشان يتعاون مع أمريكا ويتبنى سياساتها
عشان يطفش ¾ شباب مصر لايطاليا وكندا والخليج وغيرهم
عشان يعمل مشاريع اسكان مبارك اللي بتباع للناس اللي معاها فلوس والشباب طظ
عشان يعمل شوارع مبارك ومكتبات سوزان مبارك وجناين جمال مبارك
عشان يزور التاريخ وبدل ما يقول انه صاحب أول ضربة جوية بس يقول كمان انه صاحب فكرة ثورة يناير 2011 الاصلاحية
عشان يعاصر الرئيس السادس للولايات المتحدة الأمريكية
عشان يحوز بتفوق على لقب أطول فترة رئاسة في العالم 40 سنة مثلاً
عشان يصبح بعد عمر طويل يبقى الرئيس الراحل كالعادة
امتى الواحد يقول الرئيس السابق على رئيس مصري؟
امتى الواحد يعرف يعبر عن رأيه بدون ما يجي ناس بتوع حاجة وياخدوه ورا الحاجة؟
امتى الواحد يروح يطلع مستخرج شهادة ميلاد ويقف ف طابور منظم مش طابور حلزوني؟
امتى الواحد يعرف يشتري شقة؟
امتى الواحد يعرف يسوق ف مصر؟
امتى الواحد يبقى محترم من قبل البوليس وأمين الشرطة وعسكري المرور؟
امتى الواحد يعيش حياة كريمة وميضطرش يسيب البلد؟
امتى الواحد ينتخب مرشح باحتمال فيفتي فيفتي إنه يكسب؟
امتى الواحد يجيب تقدير ويتعين معيد فعلاً بدل ابن الدكتور؟
امتى الواحد يبدع وياخد فرصته وميسافرش أمريكا تحققله أحلامه؟
امتى بس امتى؟
لما يجي رئيس جديد ونظام جديد
يحترم شعبه ويحميه ويطور بلده
ولا مبارك اللي مفيهوش بركة
ولا نظيف اللي مش نظيف
ولا سرور اللي ما بيجبش أي سرور
ولا حبيب اللي بيسر العدو مش الحبيب
ولا جمال اللي مفيهوش ريحة الجمال
ولا عز اللي واخد ف عبه كل العز
ولا الطيب اللي مبيقولش طيب
No comments:
Post a Comment