أمثالنا على لسان أمي

عشان محدش يفتكر إني باقول ماما ولا حاجة

وباستخدم لفظة أمي لأسباب كتابية ولزوم القافية لا سمح الله

أنا وبكل فخر أتحدث العربية الفصحى ف بيتنا

أنا واخواتي

بدل التكييف بنقول مكيف

وبدل بابا وماما بنقول أبي وأمي

زي سابق ولاحق

ساااااااااااااااااابق لا تتردد

لاحق الفوز مؤكد

سو، أمي بقى الله يمسيها بالخير سيدة مثقفة جداً

ومن حظي وسعدي إن الست دي اللي ربتني ولسه بتربيني الصراحة

ربنا يخليكي ليا يا مامي يا حبيبتي

ومن قبل ما تستغربوا

أيوووووون

باقولها يا مامي

لما بادلعها

وساعات باقولها ياما

ياما القمر ع الباب نور قناديله

ياما أرد الباب ولا أناديله

كفاية كلام بقى عن مامتي حبيبتي لأحسن ما بيحسد المال إلا صحابه على رأيها

تتضمن ثقافة أمي القديم والجديد... التراث والتكنولوجيا

وما يخصنا هنا هو التراث من الدندرمة وقسم وأرزاق للأمثال الشعبية الموروثة

أمي والمقشة أصدقاء أنتيم ناقص تنيمها معاها ع السرير

وبتكنس بليل قبل ما تنام ولما نهرج ونقولها هو في حد هيجيلنا الساعة تلاتة بليل

تقولنا وهي بتزغرلنا نفرر نفرر زغرة يا معفنين يا اللي مش هتعمروا

اكنس بيتك ورشه ما تعرف مين يخشه

ولو بعد الشر ادت المكنسة لواحدة فينا تكنس تدور ورانا ف كل زوخنوق

ولو قفشت شوية تراب ولا ورقة ورا الباب تقولنا

من بره هلا هلا ومن جوه يعلم الله

اللي يعمل جميل يتمه لأحسن تموت أمه

نضفي كويس وبلاش كروتة

وطبعاً لما واحدة مننا تقوم من النوم منكوشة تزغرلنا الزغرة إياها وتستغفرلنا شوية وترقعلنا المثل العظيم

الحلوة حلوة لو قامت من النوم والوحشة وحشة لو غسلت وشها كل يوم

كلنا طبعاً كانت ناموسيتنا كحلي وبنقوم من النوم بعد الضهر ف الصيف

وهي تقولنا مكتوب على ورق الخيار اللي يسهر باليل ينام  بالنهار

ولو حد مننا بيبعبع عن حاجة عملها أو فخور بيها تقولنا انتو على طول شمعتكوا منقادة يا ولاد صباح

وصباح ده عزيزي القارئ اسم أمي

ماو أما يشتحفك منك ليه لو جبته تاني على لسانك

داري على شمعتك تقيد ولا باين داري على فرختك تبيض

مش عارفة ده مثل أصلاً ولا تأليفة

طبعاً أفتكر إن كل ما كنت أرجع متأخر تقولي انتي ماشية على حل شعرك

مع إني والله محجبة من تانية اعدادي

ما احنا اللي غلطانين وسايبينلك الحبل ع الغارب

طبعاً لو هي خارجة معانا تبقى ليلتنا سودة لأنها بتلبس ف ثواني معدودة وتقولنا

عبال ما تتكحل العامشة يكون السوق خرب

ولو كانت مخنوقة مني وأنا رايحة الكوافير تقولي

ايش تعمل الماشطة ف الوش العكر

بس لو جيت بقى بعد ما عملت شعري وبقيت قمررر قمررر قمرر تقولي

صحيح لبس البوصة تبقى عروسة

مش على أساس إني بوصة يعني- وأنا معرفش يعني ايه على فكرة

بوصة دي يعني انش inch

أمي بس اللي تقول كده

ده أنا قمرر قمرر قمرر

ولو طلع ف دماغك تقص ضوافرك وانت نازل تقولك

وقت الزحمة طاهروا القليط الأعمى

ومش عارفة يعني ايه القليط أصلاً فمحدش يسألني

ولحد دلوقتي مش فاهمة اشمعنى الأعمى يعني؟؟؟

وطبعًأًأًأًأًأًأًأً أكتر مثل سمعته من أمي وأنا محتاسة ف أي حاجة

الشاطرة تغزل برجل حمار

مش عارفة بصراحة هتعمل الشاطرة دي هتعمل ايه برجل الحمار هتقلب بيها السلطة؟

ولو طلبت مشورتها ف مشكلة تفكر شوية وتقولي الأول يبقى ابني ف حضني وأدور عليه وبعدين تديني الحل على بركة الله

ولو اختارت حاجة مش عاجبها وبتحاول تقنعني بالعدول عن رأيي تقولي اللي بيشيل قربة مخرومة بتخر على دماغه

ولو أبونا دادي حبيبي ليكونا هيقرا الكلام ده ولا حاجة كفا الله الشر كالعادة عصلج معانا ف حاجة ولا دماغه قفلت وتربست

وبقت خلاص جزرة وقطمها جحش – ده بمناسبة رجل الحمار والحمار اللي جاي ف السكة

بكل حكمة ورزانة تقولي مش أبوكي قالك كده خلاص اربط الحمار مطرح ما يقول صاحبه

كل المسابقات اللي بتيجي ف التلفزيون دي طول عمرها مستفزانا وعايزين نكسب ونعد نطلب زيرو توسعوميا و و

وتيجي الفاتورة وأمي تيجي تشلألنا وتقولنا

المتعوس متعوس ولو علقوا على بابه فانوس

ولا لو تفرجنا على لقاء لصباح وجوزها التمنتاشر مثلاً

صباح اللي بتغني مش صباح اللي هي أمي

فتح مخك معايا والنبي عزيزي القارئ

تقولك ايه بقى؟ دلع الكبارا يقفع المرارة

ولا لو شافت ابن عدوية ولا ابن الكحلاوي ولا ابن أي حد تقولك

اللي خلف ما ماتش

ولو انشكيت ف لساني وصححتلها حاجة بتقولها على أساس إني المثقفة المتعلمة

تقولي هي المعزة هتعلم أمها

بس لو كانت فخورة بيا بنتي أوووووووسا تقول ابن الوز عوام

بس طبعاً ممكن تقلب عليا ف ثانية لو مرضتش أذاكر لحد من المقاطيع اخواتي

وأحب أقولوكوا إن الانجليزية بتاعتهم تتلخص في أيام أكوريكت مان وأيام سوري ييرز أولدس

مامي بقى تقولي باب النجار مخلع

وفي شوية أمثال اتعودت أسمعها من أمي بس أحب أحتفظ بأسبابها أو مسبباتها لنفسي

ده لو معندكوش مانع يعني أو أصلاً مش فاكرالهم موقف معين

1. حظ امي ف كمي

2. اتلم المتعوس على خايب الرجا

3. حسنة وأنا سيدك

4. قيراط حظ ولا فدان شطارة

5. ما بيعد ع المتارد إلا شر البقر- المتارد هي تقريباً حاجة زي الطوالة مكان بيشرب منه البقر

6. بياكل ف أته محلولة

7. زي القرع يمد لبره- قرع العسل

8. على قد لحافك مد رجليك

9. عشمتني بالحلق خرمت أنا وداني

10. القفة أم ودنين يشيلوها اتنين

11. قليل البخت يلقى العضم ف الكرشة- والكرشة أصلاً مفيهاش عضم

12. وكأنك يا أبو زيذ ما غزيت

13. كلام الليل مدهون بزبدة يصبح عليه النهار يسيح

14. كلام زي الرصاص ف جتة زي النحاس

15. الكحكة ف ايد اليتيم عجبة

16. عد غنمك يا جحا واحدة نايمة وواحدة قايمة

17. من عاشر القوم تلاتين يوم صار منهم

18. نص العمى ولا العمى كله

19. الغالي تمنه فيه

20. هين قرشك ولا تهين نفسك

21. يغور اللبن من وش القرد

22. آخر خدمة الغز علقة- ولو إني لحد دلوقتي معرفش مين الغٌز دوول

23. يا بخت من بكاني وبكا الناس عليا ولا ضحكني وضحك الناس عليا

ولما تزعل شوية ولا تحس إننا ولا كلب ولا قسينا عليها وكل واحد ف سوقه

تتحسر وتقول: قلبي على ولدي انفطر وقلب ولدي عليا حجر

وتفتكر أمها بقى – الله يرحمك يا ستو رحمة واسعة من عنده- وتقولك اللي بلا أم حاله يغم

عمر أمي ما سابتنا عند حد ولا قريب ولا غريب

بس لو اضطرت يعني وعرفت إن الناس دي كانت كويسة معانا تقولنا

اللي يدي ابني بلحة تنزل حلاوتها ف حنكي

ولو كان حد نص كم تقولنا هي الحنية بتتشحت؟

وكل ما نسافر ولا نبات عند حد ونتبهدل ف المواصلات تقولنا أول وآخر مرة

من خرج من داره اتقل مقداره

ولو حد ف العيال عامل عملة ولمتهم كلهم وتقول مين اللي عمل كده؟

واحد مثلاً يقولها مش أنااااااااا

تقوله لأ انت ما اللي على راسه بطحة يحسس عليها

يقولها بس ما تضربنيش وأنا هاقولك ايه اللي حصل؟

تقوله أيوة كده الكدب ملوش رجلين

انت برضه؟ ما ديل الكلب عمره ما بيتعدل ولو علقوا فيه قالب

مع إن نادر جداً إنها تقفش أي حد ف بيتنا عمل أي عملة وإن كانت سودة ومنيلة

بأمارة اللاب بتاعي اللي راح ف شربة ميه ولحد دلوقتي معرفش مين ابن التييييييييت اللي جاب أجله

وممكن تضرب حد فيهم وتيجي مثلاً خالتي تساعد تقولها لأ ياختي

أدعي على ابني وأكره اللي يقول آمين

وعلى فكرة بيقولوا المثل ده بطريقة تانية: أدعي على ابني وف قلبي أقول اسم الله

وطبعاً لو حد نرفزها من العيال مش عايزة كلام دي معندهاش إلا مثل واحد جتها نيلة اللي عايزة خلف

أو الناس خيبتها السبت والحد وأنا خيبتي ما وردتش على حد

دايماً تقول لاخواتي شوية أمثال تحف لكل واحد فيهم على اختلاف معناه ومسبباته

1- حس على فس

2- صاحب السكر غايب

3- خراب يا دنيا عمار يا دماغي

4- بره وجو فرشتلك وانت مايل وايه يعدلك

5- سكتناله دخل بحماره حتى البردعة شلنهاله

6- قالوا للحرامي احلف قال جالك الفرج

7- أكل ومرعى وقلة صنعة

8- العرق يمد لسابع جد

ولو حد من العيال ضرب اللولي- قصدي العيال- بتوع حد من الجيران ولا القرايب تقولنا لازم يعني تيجوا جنب اللولي

نسبتااااااااااااااان إلى- نسبةً إلى بكتابة العامية أو بكتابة حد ساقط عربي وميعرفش يعني ايه تنوين

خنفسة شافت ولادها ع الحيط قالت ده لولي ملضوم ف خيط

دول  قطتهم جمل

ولو بتنصحنا أنا والمقاطيع اخواتي على إن ف الاتحاد قوة

1- من حبني وكره أختى لا خيرله فيا ولا ف أختي

2- أنا وأخويا على ابن عمي وأنا وابن عمي على الغريب

3- ايد لوحدها متصقفش

طير بجناح مكسور ميطيرش

لأ متاخدوش ف بالكوا دي بقية الأغنية بتاعت أحمد السقا

واحنا بنذاكر، كانت دايماً تذاكرلنا ولو واحد اتهف ف عقله ورايح يلعب أو ينام تقوله:

وأنا باذاكر لنفسي أنا نجحت خلاص وخدت الابتدائية والاعدادية والثانوية والليسانس

ذاكري يا حبيبتي اللي بياكل على ضرسه بينفع نفسه

وصاحيين بقى قبل الامتحان بساعتين وجايين نذاكر تقولنا

خلاص اللي ذاكر ذاكر

بعد العيد مبيتفتلش كحك

ويا سلام بقى لو حد بيتفرج ع التلفزيون وهو بيذاكر

لازم ترقعله موشح يا ابني صاحب بالين كداب وصاحب تلاتة منافق

ولو كنت مستنية نتيجة الامتحانات ف أي مرحلة ف حياتي وهاموت من القلق أمي تقولي

كل تأخيرة وفيها خيرة... يا خبر النهاردة بفلوس بكرة يبقى ببلاش

روحي نامي والصباح رباح

وممكن تبان بعده بنص ساعة وتقولي لو صبر القاتل ع المقتول لمات لوحده

ويااااااحلاوووة

جينا لنصايح الجواز

لازم تحترمي جوزك عشان يحترمك

قول لمراتك يا هانم يقفولها ع السلالم قول لمراتك يا عورة يلعبوا بيها الكورة

ولازم تسمعي كلامه يا بنتي المركب اللي فيها ريسين

وهتاخدي عينيه بس بالهداوة ياواش ياواش وكله بالتعود

ابنك على ما تربيه وجوزك على ما تعوديه

 ومتعمليش مشاكل ربنا يهدي سرك والباب اللي يجيلك منه الريح سده واستريح

متخليهوش يقول يا داهية خدي الداهية

امشي عدل يحتار عدوك فيك

بالنسبة لموضوع بيت العيلة قالتلي خدي بالك مركب الضراير سارت ومركب السلايف غارت

وحرص ولا تخونش يا بنتي

يا مآمنة للرجال يا مآمنة للميه ف الغربال

ويبقى بيتك أهم حاجة عندك اللي يحتاجه البيت يحرم ع الجامع

وبالنسبة للطبيخ، يا بنتي اللي ليه عنين وراس يعمل اللي بيعملوه الناس

وأديني عملت اللي بيعملوه الناس وبقيت أحسن من الناس كمان ف أكلي وصوانيا وحلوياتي

ابيتايزر يا عمووووووو؟؟

وقدري ظروف جوزك- المادية يعني- ومتحمليهوش فوق طاقته ما اللي ميشوفش من الغربال يبقى أعمى

واعملي اللي عليكي ولا يكلف الله نفساً إلا وسعها وما يقدر ع القدرة اللي ربنا

ودايماً افردي وشك وش بشوش ولا مال بملو كفوف

وأول ما عرفت إني حامل ف بنت حماتي بكتتني طبعاً وانتو فاهمين الشغل ده بقى

بس أمي حبيبتي قالتلي يبقى الزمن سعدها اللي تجيب بناتها قبل صبيانها

وأبو البنات مرزوق

بس الحمد لله مرضيتش تكأبني وتقولي يا مخلفة البنات يا دايخة للممات

ويا سلام بقى وهي شايلة لولو بقى، لازم وهي بتبوسها تقولها أعز الولد ولد الولد

وبعد ما لولو تاكل تقولها إن جاعوا زنوا وإن شبعوا غنوا

وطبعاً المثل ده أول مرة أسمعه إلا بعد ما اتجوزت وخلفت ورضعت

ووأنا باولد وف عز الطلق كانت بتقولي قولي لا حول ولا قوة إلا بالله

واصبري وجع ساعة ولا كل ساعة

وبما إنها ست جميلة واجتماعية على طول تقولنا جنة من غير ناس ما تنداس

وأكتر مثل سمعته من أمي وباقوله طووووووول الوقت اللي يقدر ما يغلبش

ربنا يخليكي لينا يا أمي ويباركلنا فيكي وف عمرك

لاف يووو ماااااااااااااامي