يعتبر الثوب السعودي الشهير هو الزي الرسمي للرجل السعودي
وتكتمل الشياكة والأناقة بالغطرة والعجال
الغطرة: وهي الايشارب الكروهات ده وغالباً ما يكون أحمر اللون وأحياناً أسود اللون
أما العقال: بس احنا كتبناه بالجيم مع تعطيشها قليلاً مراعاة للكنة السعودية أو الخليجية عامةً
وده أعزائي القراء المصريين هو الزي الرسمي للرجل السعودي
كل الشياكة دي بقى ولابس ف رجليه شوبشوب
أحذية الدجل يابووووووووي
وطبعاً دي أصلها الدقل
ولا تنسى عزيزي القارئ نطق القاف جيم مع تعطيشها
يروح الراجل السعودي يكشخ
يكشخ؟؟؟؟؟
خلاص متزعقش
هاقولك يعني ايه؟
يكشخ: أي ياخد عربيته اللاند كروزر أو الجيمسي ويطلع بيها الصحرا ويخلي الرملة تتناثر من حوله وهو يبتعد بسيارته
وطبعاً مننساش إن السيارة جزء لا يتجزأ من شياكة الرجل السعودي
وممكن تكون ماركات عمرك ما حلمت تركبها أصلاً وإن مثلاً البي ام دي أقل حاجة عندهم
اشي ليكزس واشي اودي و و و و
ولازمن وحتمن يكون لابس النضارة الريبان ولا الديور ولا البرادا ولا الدولشي ان جابانا
عشان السمس يا سي حمدي
كل ده ع الجلابية- الثوب- والشبشب
وياسلام بقى لو رايح يتريض... ولا يجريله تراك كده ولا حاجة
جلابية + غطرة + عقال+ كوتشي نايكي ولا اديداس
أهم حاجة الثوب
فكرني بإننا زمان ف المدرسة القطري بقى كنا بنقول ألف أسد باء باب.... ثاء ثوب
حتى التعليم مختلف يا أخي
مش زي عندنا أ أرنب ب بطة ....ث ثوم
فيه فرق بين أسد وأرنب
باااااااااب وبطة
أما عن الست السعودية فهي متشحة بالسواد من فوقها لتحتها
والعباية السودة هي الزي الرسمي للسعوديات وغير السعوديات من المقيمات
والنظارة الشمسية دي بالنهار جزء لا يتجزأ من أناقة المرأة السعودية
لدرجة إنها ساعات بتلبسها بليل عشان تداري جمال عينيها
وتشم طبعاً طول مهي رايحة وجاية أجم العطور
والمسك والعود والعنبر وشانيل نمبر فايف وسيكسي تو وان تو
وأحلى حاجة فيها بقى الجزمة
عالية
وشامخة
بكعب عشرة سنتي مثلاً
تمشي بيه ف السوق /المول تتمخطر الهويني
زي القصيدة بتاعت زمان ي بتاعت البت التخينة اللي بتمشي الهويني
على مهلها يعني
ده لو حد فاكرها؟
وممكن تلاقيها لابسة كوتشي وفوقيه بنطلون جينزباين من تحت العباية
أو لابسة شنطة كروس
بس أهم حاجة تفضل محافظة على الزي الرسمي
ألا وهو: العباية السودة
No comments:
Post a Comment