الحكاية فيها مواعين

لما تدخل المطبخ وتلاقي الحوض فاضي

ومفيهوش أي مواعين

وعندك النهاردة عزومة

بس تفتح التلاجة تلاقي تشيز كيك

وجيلي وشفشق عصير قمر الدين

وتفتح الفرن تلاقي صينية مكرونة بالباشميل

وصينية جلاش باللحمة المفرومة

وتلاقي الحلة مالية مركزها وفيها شوربة فراخ

وتلاقي الفراخ نفسها مغروفة على طبق كبير

وتلاقي حلة تانية وسط كده فيها شوية رز

لزوم الملوخية اللي ف الحلة الصغيرة

امال هنشربها يعني زي الشوربة ولا ايه؟

اوعى تكون افتكرت عزيزي القارئ إن الحكاية فينيتو على كده

لأ

وألف لألألألألألألألألأ

دي الحكاية فيها مواعين

ومش أي مواعين

بس ست البيت اللي تعرف شغل البيت وتربي عيال

ست البيت الشاطرة اللي زي حالاتي

بتخلص المواعين أول بأول

عشان المنظر الجمالي والحضاري للمطبخ والحوض

وإلا هتلاقي المواعين اكوام اكوام ف الفسحة

ونبتدي بالحلو يا حلو انت يا حلو ياللي بتقرالي

التشيز كيك هيطلع منها مواعين ايه؟

صينية التشيز كيك طبعاً والكيتشين ماشين اللي فيها القطاعة

والبتاعة دي بتاعت مضرب البيض

والسكينة الكبيرة اللي هتقطعي بيها الزبدة

والحلة الصغيرة اللي هتعملي فيها صوص التزيين

وهترجعي تعملي فيها الملوخية

اللي لازمن وحتمن تعميليلها الطشة ف طاسة صغيرة هتلاقيها منورالك المواعين

وترجعي تغسلي نفس أم الحلة عشان تعملي فيها اللحمة المفرومة مرة ولا مرتين

وبعدين الباشميل ولا تسلقي ف نفس ذات الحلة المكرونة

وهتعايري السمنة بمعلقة كبيرة... هتلاقيها شرحه مستنياكي ف الحوض

ونرجع بقى للتشيز كيك بعد ما حدقنا شوية كده

هتغسلي يا عين أمك الكوباية اللي بتعايري فيها الحليب

والمعلقة طبعاً اللي بتعايري بيها الكاكاو

ده غير المعلقة الخشب اللي بتقلبي بيها الصوص

وتشحطيطها معاكي غسل بين الحلو وبين الملوخية وبين الرز

وبين تطليع الريم اللي بيبقى على وش الشوربة

تغسلي فيها راااااااااايح جااااااااااااااااااااي

مهي ايدك ورجلك عشان الأكل الصحي

لكي ولأسرتك عزيزتي حواء

وعشان متكحتيش الحلل التيفال يا حيلتها

وجوزك يقيم عليكي الحد

الكيتشين ماشين برضه انتي واخداها اماأأأأ أمأأأأأأ

عشان ترجعي تقطعي فيها البصل

ومرة تانية عشان التوم

والخلاط عشان قمر الدين اللي بتفضلي ناقعاه في شفشق بتضطري تغسليه برضه

ويرجع يتغسل عشان يتعمل فيه الباشميل

والشفشق عشان الجيلي

والمعلقة اللي بتقلبي بيها الجيلي

والحلة الكبيرة ولا الوسط ولا الصغيرة

طب الأطباق والمعالق والكوبايات ممكن بيقوا ورق ولا بلاستيك

الحلل بقى والصواني حلها ايه؟

وساعتها برضه هتبقى عيبة عشان لازم تقدمي ف السرفيييييييييس

لزوم المنجهة والمنظرة يا مدام فشخرة منظر

وطقم الخشاف وطقم الصيني والطقم الأركوبال

اللي منورين النيش دوول برابطة المعلم

ولا انتي جايباهم زينة يعني؟

قدمي ياختي.. والبسي بقى ف المواعين

واوعي تصدقي أو تقعي فريسة للإعلانات الكاذبة

لأن بقعة واحدة مش بتقضي على أصعب الدهون ولا حاجة

دي ايديك اللي بتتهري يا حبيبتي هي اللي بتقوم بتلك الوظيفة

بس أحب أعزيكي أقصد أواسيكي وأطمنك

دول بيقولوا إن غسيل المواعين بيهدي الأعصاب

وبيوطي الضغط

مع إني مش عارفة أنا ليه ضغطي بيعلى

وبابقى هولع ف نفسي وأنا باغسل المواعين

وأحب بس أقول لعزيزي الرجل

اوعى تتخيل

أو يخطر ببالك

إن العزومة دي ما شاء الله

عدت من غير خسائر يا حبيبي

ده الحكاية فيها مواعيييييييييييييييييييييين