فيسبوكي: غرائب وطرائف

فيسبوكي: غرائب وطرائف

الواحد بقاله زمن ع الفيسبوك ده من 2007 تقريباً

أكتر حاجة طريفة كانت بتقابلك أول ما عملنا الاكونت

كل الناس كاتبه اسمها بالكامل + ألسونيان

لدرجة إني تخيلت إنه لازم عشان تعمل فيسبوك اكونت تكتب فيه جهة التخرج الرسمية

كان اسم اكونتي وقتها مريم أيمن حسين ألسونيان

عشان صحابي يعرفوا إن اسم النبي حارسني وصايني اقتحمت عالم الفيسبوك العجيب

ويعملولي آددد

كان في طبعاً أسامي ناس كتير فاكرها

كانوا معايا ف السكشن أو ف الألماني أو أو

بس كان فيه ناس بقى ظريفة أوي الصراحة

تضيفني بس عشان لقت بيني وبينها خمستاشر فريند ميوتشوال

طب الخمستاشر يعرفوكي.. ذنب أمي أنا ايه؟

واللي يضايقك أوي ويزعلك وينرفزك إن الأمورة خايفة ع الشباب من فتنة جمالها

ولا حاطة صورة واحدة توحد ربنا عشان بس تفتكر شكلها

طب وحيات أبوكي حطيها مرة واحدة تفاريح ولا زكاة عن صحتك عشان أفتكرك وامسحيها تاني على طول

طب ما أصلاً فيه بريفاسي

يقولك لأ دوول بيخترقوا البريفاسي ويسرقوا الصور ويعملولها فوتوشوب ويستخدموها ف حاجات وحشة لا سمح الله

وتلاقي بيني وبين صاحبتي الانتيخ خمسة وتلاتين واحدة مشتركة

واحنا مانعرفش منهم الا عشرين مثلاً

والباقي ضايفنا عشان ختم النسر اللي ف آخر اسمنا: ألا وهو: ألسونيان

واللي لسه جاي من البلكونة ومخدش باله أحب أقوله إن ألسونيان يعني وبكل فخر خريج ألسن

ومن ساعتها وأنا مسحت وسام الشرف من على صدري.. من على اكونتي وبقيت مريم أيمن بس

والغريبة- مفرد غرائب- إننا بقينا ف آخر 2011 ولحد دلوقتي ممكن حد يلبخ ع الاكونت بتاعك

وواحد تاني شهم يدافع عنه ويقولك أصله جديد ع الفيسبوك

جديد ازاي يعني ف 2011.. ما سمعش عنه قبل كده؟

وواحد تاني يديك اسم حد أو يعملك ستجيسشن على حد ويقولك معلش ضيفه أصله جديد ع الفيسبوك

طب وأنا مال أهلي... ما يدور على صحابه ويضيفهم

أتبناه أنا ليه؟ هي المصيدة ناقصة فران

من بعد ما اتفتح الفيسبوك تشات- ايوة اسمها تشات بالتاء مش شات

أضف إلى معلوماتك هذا التصحيح الجديد

وانت أصلاً تكون عامل لناس معينة بلوك من ع المسنجر والياهو

تلاقيهم قافشينك يا معلم ع الفيسبوك ويقولولك بخ

بس لاجل ستر ربنا ورحمته بعباده إن مفيش ولا باززز ولا نادج

أحمدك يارب..ودان أمي اتخرمت

وتلاقي بقى مثلاً صحاب اخواتك الصبيان عاملينلك آآدد عشان طلعت عندهم ف الستجيسشن

ولا حتى فارق معاهم إني كاتبة أم ملك ولا أم لولو

فاكرينها مدام منى ولا مدام سارة...مادام مدام تبقى خبرررررررررة

وتلاقي واحد عاملك آدد وتعمله بلوك أو تبعتله تشتمه

يقوم منفض ودانه ولا عينيه ولا كأنه شاف حاجة

ويعمل أكونت جديد ويبعتلك اضافة جديدة

ويا سلام بقى لو يستذكى عليك وهو حمار أصلاً ومفقوس

ويعمل أكونت باسم أحلام لاف ولا نونة الصغنونة ويعملك آدد برضه

ذكي أوي اسم الله على مقامه.. جتك نيلة

وهي أحلام لاف عايزة مني أنا ايه؟ هتلافلافني أنا لا سمح الله ولا هنبقى مأنتمين؟

المفروض إن الفيسبوك ده أو اكونتك يعني يبقى حتة انت بتستريح فيها

تقول اللي انت عايزه وتضيف اللي انت عايزه

ولكن

ولكن، يا دبلة الخطوبة عقبالنا كلنا

مع الدبلة بيجي شوية ضرايب واجب دفعها

امسحي صورك ومتكتبيش ده ومتضيفيش ده ومين ده؟ وايه اللي هو/هي كاتبهولك ده؟

وينسلخ الرجل من جلده الطبيعي في تلك الحالة ويصبح كينج كونج ومش خرونج

فيقولك شيلي العيال دي من على الفيسبوك

وانتي تقولي أمرأً وطاعةً يا مولاي

وبعد فترة لما اشتهر الفيسبوك وكل أهلك واللي جابوك وجابوهم عندك ع الاكونت يا عين أمك

تلاقي أمك تقولك ايه اللي انتي كاتباه ده يا حبيبتي؟ ما يصحش

بس أمك هتقولها ايه؟؟؟

دي الأم برضه اللي بتغسل الشرابات البيضة لوحدها والملونة لوحدها

هتحط ايدك زي الشاطر على ريموف بوست وتدوس اوكى

وولاد خالاتك وعماتاك لازقين ع الاكونت بتاعك يعرفوا أخبارك

ويصيتووووك ف العيلة كلها

وكل ما تحط صورة حد يعملها كوبي

وتقفشها عند صحابك بس مش بنفس الاسم اللي عندك

هتلاقيها fff555555hjk33424

حاجة تحرق الدم بصحيح

بس لما ربنا بيقفل باب بيفتحلك شباك

لو صورك ضاعت ولا هاردك اتحرق

فاضمن عزيزي الفيسبوكي انك هتلاقيهم عند أمة لا إله إلا الله

وأي حد عامل جروب تيت ولا ليه أي لازمة ف الدنيا

يعملك انفايت

وغصب عن عين اللي جابوك هيجيلك منه نوتيفيكاشنز وايميلات

فلان الفولاني بوستيد ف جروب التيت

وانت حتى ملكش حق ترفض الدعوة

لأ هو دعاك وانت تلبي

إلا إذاااااا

إلا إذا دخلت ع الجروب نفسه وعملت ليييف جروب

وكل ما تكتب استاتس تلاقي كله حاشر مناخيره ويقولك خير خير

ولو ضاقت بيك الدنيا وحبيت تيتيييييييييييت

حد لطيف ومؤدب وابن ناس يكتبلك عيب ولا ايه الألفاظ دي ابقى خد بالك من اللي بتكتبه

وابن الرخمة بقى اللي يكتبلك انتي سخنة يا حبيبتي ولا شاربة ايه ع الصبح

أنا حر... قال ويقولك حرية رأي قال...ده أنا حتى مش عارف أبعبعر على فيسبوكي

وكل اللي يعدي ع الاستاتس يعملك لايك

يا فرحة أمك بيك

كسبنا صلاة النبي

يشرفني إنك أعجبت بكلامي يا حيلتها

ولو كنت زهقان وطولت شوية ع الفيسبوك تلاقي حد ع التشات بيقولك بكل ظرافة

انتي يا بنتي ما وراكيش حاجة تعمليها؟

وانتي مال أهلك؟؟؟

تلاقي مثلاً واحد قريبك لسه ببامبرز ميعديش حداشر سنة وعاملك آدد

لأ ولو زرتهم ف البيت يقلبلك بوزه وشفاطيره ويقولك أنا مش هاكلمك يا طنط عشان ما قبلتيش الاضافة

احنا هنعيل وانتي عبيط يابني؟ انت عارف أنا عندي كام سنة يا حبيبي

وتكون تعرف واحدة وفجأة تلاقي بينك وبينها فريند هي مش ممكن تكون شافته قبل كده

اتاري- مش الاتاري من فصيلة البلاي ستاشين- أتاريهم يعني بيصطادوا بعض من الليستة بتاعتك

وتلاقي حد مصطادك... أو مستقصدك كل ماتشاير حاجة تلاقيها عنده

كأنه بيفتح الفايس عشان يشوف اللي انت مشايره ويشايره هو كمان

طب كل دوول بيضايقوني وبيحرقوا ف دمي ودم أمي

أعملهم بلوك ولا ادالتهم ولا ما اخليهمش يشوفوا الوول ولا يكومنتوا على حاجتي

لأ ودي تيجي

يزعلوا

وأشرب أنا بقى

أتكتم ف بيتي وما أبعبرش عن سحاسيحي

وأحط جزمة ف بؤي وأسكت

أصلهم هيزعلوا

زعلوا عليكوا ساعة وانفضوا يا بوعادددااااا