ستتين (مثنى ست والجمع ستات) بيرغوا واحدة بتتحسر على نفسها والتانية بتصبرها
وفي نفس ذات الوقت بيرقعولنا شوية أمثال حكم
تك تك تك
تررررررررررررررن
المتحسرة: العوافي
المصبرة: يعافيكي يا حبيبتي
(لاختصار وقت القارئ المتحسرة هتبقى س والمصبرة هتبقى ص)
س: والنبي ألاقيش عندك شوية بصل؟
أصل بعت الواد حسن من ساعتين ولسه مجاش لحد دلوقتي
عقبال ما تتكحل العامشة يكون السوق خرب
ص: وانتي هتقفي كده من ع الباب.. دي حتى تبقى عيبة
خشي بيتك ومطرحك.. نشرب مع بعض كوباية شاي
س: ما شاء الله مبروك الانتريه- بفتح النون والتاء الراء
حط ف اعتبارك عزيزي القارئ إن مفيش حد مودرن هيقول كل اللي جاي ف السكة ده
وبالتالي عمرهم ما هيقولوا انتريه صح
س: ده أن سمعت الويلة أم محمد بتقول إنكوا غيرتوا العفش
مينفعش كده يا حبيبتي ما تبقاش شمعتك منقادة امال
داري على شمعتك تقيد
ص: هتلاقيها شفتنا واحنا داخلين بيه البيت تو- بتشديد التاء- ما اشتريناه
س: معلش برضه الاحتياط واجب العين فلقت الحجر
ص: ها طمنيني عليكي يا حبيبتي بسلامته شرف- بتشديد الراء-؟
س: جه رمالنا القرشين وآدي وش الضيف
واكلة عاقله العايقة المضايقة ولا حتى معبر عياله ف الجزمة س
ص: متقلقيش ياختي بكرة تقصص ريشه
وتدفعه اللي وراه واللي قدامه
مهو مال الكنزي للنزهي
س: لأ ودلوقتي بقيت أنا اللي كخة
قال ملقوش ف الورد عيب قالوله يا أحمر الخدين
ص: صح ياختي ملقوش للرز عيبة قالوله يا أبو دنيبة
س: بس أنا مش هاسكت وأروح أشرشحها
ص: لأ يا حبيبتي متعمليش كده
المغلوب مغلوب وف الآخر بيضرب بالطوب
أولاً مش هتخلصي من طولة لسانها
تحت السواهي دواهي يا حبيبتي
مش هي دي برضه اللي كنت بتستقبليها ف بيتك ومآمنالها ع الآخر
س: آه والنبي جزاء المعروف ضرب الكفوف
ص: متعمليش فيها برم- بضم الباء وتشديد الراء- ولا مقطعة السمك وديلها
محدش هيغلطها..انتي اللي هيركبك الغلط من ساسك لراسك
تسسسسسسسم (مع عوجة بوء لليمين والشمال وتصفيرة خفيفة)
س: قال ضربوا الأعور على عينه قال مهي خسرانة خسرانة
ص: جتهم نيلة ... اتلم تنتن على تنتون واحد نتن والتاني أنتن
هو أنا معاكي إن الكلام ده ما يتسكتش عليه
لازم توقفيهم عند حدهم وتعرفيهم إن مش كل الطير اللي يتاكل لحمه
قال يا فرعون ايش فرعنك؟قال ملقتش حد يردني
بس بالهداوة
محدش يقول للغولة يا غولة عينك حمرا
ولا تعاتب العايب ولا ترقع الدايب
س: أنا أصلاً قلتله أنا مش عايزة منك حاجة ومتورنيش وشك تاني
تشبع بيه.. اللي خدته القرعة تاخده أم الشعور
ص: ليه كده يا بنتي؟ هي جزرة وقطمها جحش
متقطعيش كل الأحبال خلي الباب موارب
متبقيش عبيطة.. شعرة من دقن الخنزير مكسب
س: ليه وأنا أنساله اللي عمله فيا بعد كل ده؟
قال على رأي المثل: آخر خدمة الغز علقة
ص: سيبك منه وشوفي نفسك يا نور عيني
ما تشتغلي
س: منا جالي التعيين ف المحافظة بس اللي ما يتسماش مرضيش وقتها
ص: ليه كده ياختي؟ إن جالك الميري اتمرمرغ ف ترابه
س: مكنش المفروض أوافقه أبداً بس مراية الحب عمية
كنتي فين يا لأااا لما قلت آآآه
طب ولو عملي مشكلة.. مهو لا منه ولا كفاية شره
ص: ولا يقدر يقولك تلت التلاتة كام دلوقتي
طب أنا هاقدملك عندنا ف المدرسة وربنا يعمل اللي في الخير
ربنا كريم يقطع من هنا ويوصل من هناس
س: والنبي صحيح هو عايزين مدرسات اليومين دوول؟
(في عقل بالها رددت )الغريق بيتعلق بقشاية
أحسن ما أقول للعبد يا سيدي أقضي حاجتي بايدي
ص: انتي معاكي شهادات ايه وكورسات ايه؟
س: قال عد غنمك يا جحا واحدة نايمة وواحدة قايمة
يدوب شهادة الجامعة وكورس ولا كورسين لغة وحاسب
ربنا ينصفني بقى
لأحسن المتعوس متعوس ولو علقوا على بابه فانوس
ص: خليها على الله العبد ف التفكير والرب ف التدبير
واهو اسع يا عبد وأنا أسعى معاك
تعرفي نبوية زميلتي ف المدرسة؟
جوزها جابلها ضرة بعد عشرين سنة جواز
طلع ميه من تحت تبن
بس ايه؟؟؟؟؟؟؟
ميه مالحة ووشوش كالحة
من اسكندرية هو
مقعدها معاها ف نفس البيت
شوفتي البجاحة؟
س: اللي اختشوا ماتوا بصحيح
طب وهي متطلقش ليه؟
ص: قالوا ايه اللي رماك ع المر؟ قال اللي أمرر منه
أصلها معهاش ولا قرش ولا علام بعيد عنك وعن السامعين هتروح فين بقى؟
س: عندك حق ياختي مين شاف بلاوي الناس هانت عليه بلوته
مع إن المحروس من المنصورة
ما أسخم من ستي إلا سيدي
ص: ميه نيلي ووشوش طيني
واللي يجي من دماص بلاص
س: سوالله ياختي ما عارفة من غيرك كنت عملت ايه؟
لولاكي يا جارتي لانفقعت مرارتي
ص: والنبي القلوب عند بعضها يا حبيبتي
س: صحيح من القلب للقلب رسول
هو الزمن ده مفيهوش راجل عدل
ص: ولا زمانا ولا زمن غيرنا
وإن كان مكنوش قالوا: يا مآمنة للرجال يا مآمنة للميه ف الغربال
س: ده الدمعة كانت هتفر من عيني وأنا شايفة ايده ف ايدها
ص: وتعيطي على يا حبيبتي مفيش حاجة تستاهل
الجنازة حارة والميت كلب
س: أنا مش زعلانة كل شئ نصيب
تئ تئ (مع نفس عوجة البوء يميناً وشمالاً)
ص: أسمع كلامك أصدقك أشوف أمورك أستعجب
لأ ياختي اجمدي امال
يا جبل ما يهزك ريح
س: بس بيني وبينك البت حلوة
تقول للقمر قوم وأنا أعد مطرحك
ص: ما بتبان البضاعة إلا بعد الحبل والرضاعة
إنما انت ما شاء الله ربنا يحفظك ولا حمل ولا رضاعة باينين عليكي
ده انتي تحطي صوابعك ف عين التخين وتقوليله
يا أرض اتهدي ما عليكي قدي
واهي برضه القديمة تحلى وانت كانت وحلة
أنا بس عايزاكي تنسي اللي فات مات
واهو زي ما بيقولوا احنا ولاد النهاردة
وتبات نار تصبح رماد
مين عالم؟
مش يمكن تبقى صافي يا لبن حليب يا قشطة؟
حسن: ماااااامااااااااااااااا
س: خير يا واد؟
يا قاعدين يكفيكوا شر الجايين
حسن: تعالي بسرعة يا ماما
س: وقت الزحمة طاهروا القليط الأعمي
حسن: يا ماما حسين كسر ازاز الشباك بالكورة
س: ليلتك زي وشك منك له
والله لأديك حتت علقة انت وأخوك
حسن: يا ماما انتي هتاخدي العاطل بالباطل
خلاص يا ماما بقى قلبك أبيض
س: برضه هاضربك
حسن: ضرب الحبيب زي أكل الزبيب
سماح النوبة دي يا ماما بقى
س: ده عشم ابليس ف الجنة..هتضربوا انتو الاتنين
تعالى يا واد هنا (وتمد ايديها تجيبه من قميصه)
(يكش الواد ويكت- بضم الكاف)
يا واد تعالى مش هاضربك
حسن: لأ يا ماما اللي اتلسع من الشوربة ينفخ ف الزبادي
يا حسيييييييييييييييييييييييييين
جالك الموت يا تارك الصلاة
أمك جاية تقطعك
حسين: علقة تفوت ولا حد يموت
س: سمعتك يا أبو لسان متبري منك
دلوقتي أوريك الويل وتقول لولاك يا لساني ما انسكيت يا قفاي
العيال معجونة بمية عفاريت هيجنوني
يا مصبر الوحش ع الجحش
طب أنا هاقوم بقى
ص: لأ لزمن تتغدي معانا (أخيراً نطقت بعد صمت طويل يصحبه فرجة دقيقة لموقف حسن وأمه)
اعدي يا حبيبتي لقمة هنية تكفي ميه
س: يجعله عامر بس هاقوم أنا عشان أغدي العيال
ص: استني انتي مش كنتي عايزة شوية بصل
س: لأ خلاص يا حبيبتي من ايد مانعدمهاش
ما هو الشاطرة تغزل برجل حمار
هاعمل المكرونة بالتوم بدل البصل
واهي العيال بتحبها كده
ص: بالهنا والشفا يا حبيبتي
مطرح ما يسري يمري
س: يلا يا واد
(في عقل بالها مرة أخرى) الوقت سرقنا وملحقتش أخلص الأكل.. يخرب بيت الرغي
يا بختك يا بجبج عشان أمك تتحجج بك
وده كان آخر مثل ف وصلتنا النهاردة
وأشوفكوا ف وصلة تانية قريب
No comments:
Post a Comment