الرجالة ع المريخ ع الستات ع الزهرة ع الكل كليلة

بيقولك في راجل كوبرررة

اسمه اسم النبي حارسه وصاينه جون جراي

راجل دكتور نفساني حضراتكم ومعالج أزواج

أي كابل ثيرابي Couple Therapy

بمعنى لما اتنين متجوزين أو منتنين يحصل بينهم مشاكل

ويشدوا ف شعر بعض.. يروحوا للحكيم ده

حلال العقد.. يحللهم مشاكل

والراجل ده مشهوووووووور أوي

وبعد نجاحه الكاسح ف الجلسات العلاجية والمؤتمرات، نشر كتابه

Men are from Mars Women are from Venus

الرجال من المريخ والنساء من الزهرة

فكرة الكتاب بتقوم على إن الرجالة من كاوكاو والستات من كاوكاو تاني خالص

وكل كاوكاو مختلف عن التاني تماماً والعجيب إن قاطني كل كاوكاو مدركين اختلافاتهم

وقادرين يتعاملوا مع بعض من غير مشاكل ولا شد ف شعور بعض  ولا محاكم ولا نفقة ولا عيال تتشحطط

وعاشوا ف تبات ونبات وخلفوا صبيان وبنات

بس زي أبونا آدم وأمنا حوا لما اتخبطوا ف دماغهم وقرروا يعيشوا ف الأرض

حلت عليهم كل المصايب اللي ممكن تتخيلها وقالوا على روحهم يا رحمااااان يا رحيم

سحابة سودة وثقب الأوزون واللي زاد وغطى مشاكل زوجية وناس مش طايقة تعيش مع بعض

ايوه بقى يا عم جون جراي... ايه بقى هي الاختلافات اللي بين المريخ والزهرة؟ بين الرجالة والستات؟

ارغي يا عم الأمور

بيقولك ايه بقى عمنا جون؟

بيقولك إن الراجل عامل زي الاستك تمام

ايه الاساتوك ده؟ اللي ماشي يتوك ده

يعني خلال العلاقات الزوجية أو الرومانسية بيجي ع الرجل وقت بيبقى عايز يروح فيه الكهف بتاعه لوحده عشان يفكر أو يفضي ذهنه أو يرتاح من زنك- بتشديد النون مع الكسر- مش زنك وحديد وصوديوم يعني

ففي تلك الأثناء لما جوزك يا حبيبتي ياكل سد الحنك ويتكتم خالص اكتمي نفسك وقولي بقى هوووووووووب عشان الدمعة ما تفرش من عينيك

سيبيه... ما تلزقليوش... راح البلكونة هو حر ولا تتحججي وتقولي هاعمله كوبايه شاي ولا حاجة

ولو نزل وهو مخنوق من البيت.. سيبيه هيفك لوحده ولا تبعتيله رسايل انت فين يا حبيبي ولا قلقت عليك ولا وحشتني

ولا تقوليله: معلش النوبة دي عشان خاطري يا ست شادية

هي الرجالة كده يا أوختشي

لوعبرتيه بقى وحايلتيه واتحايلتي عليه هينفش ريشه ويسوق فيها ويفضل كتير ف الكهف وانتي تتنقطي يا حبيبتي

فالحل الوحيد: فككككككككككك منه

وهو هيرجعلك هيرجعلك مهو ملوش غيرك بس هيرجع لوحده انتي ماتجريش وراه

أصله زي الاستك بيشد ويجيب آخره ويرجعلك أحسن من الأول كمان

وقتها روحي اعملي حاجة تخليكي هابي زي ما جون بيقول

1-      اقري كتاب

2-      استمعي إلى بعض الموسيقى

3-      اشتغلي شوية ف الحديقة... وطبعاً احنا معندناش حديقة إلا إذاااااااا.. إلا إذا كنا من أولاد الذوات وساعتها برضه هيبقى عندك جنايني ومش هينفع تتجوزي ابنه يا انجي... فروحي اعملي المواعين ولا اعمليلك تشيز كيك ولا حضري لنفسك كوباية كاكاو سخن عشان تهدي أعصابك

4-      اعملي تمارين أو امسحي الشقة مثلاً ما عدا الاوضة اللي هو قاعد فيها

5-      مساج، وده مين اللي هيعملهولي ان شاء الله؟ اللي مابيعملهوليش واحنا متصالحين وقشطة هيعملهولي دلوقتي؟ ودي طبعاً هتكون ردك الطبيعي عزيزتي القارئة ع التخريف اللي أنا باقوله مصحوباً برفع حاجب وضم الشفتين مثل الأرنب وتحريكهم يميناً وشمالاً كأنك بتقوليلي يا حسرة عليا.. أحب أفكرك حبيبتي القارئة إن ده ف أمريكا والدول المتقدمة.. فكي عقدة بؤك وحواجبك بقى اللي يرضى عليكي

6-      اعزمي نفسك على حاجة لذيذة وشهية... كيس شيبسي عائلي بالجبنة المتبلة أو آيس كريم شوكولاتة وبندق

7-      كلمي واحدة صاحبتك واعدي لوك لوك للصبح

8-      اكتبي مذكراتك أو يومياتك.. وطبعاً ده ف أوروبا والدول المتقدمة بس لأن ف الدول النامية أو حتى اللي لسه عاملة ثورة قريب...أي حد ممكن يقراها ويسيحلك لأن مفيش حاجة اسمها برايفسي لا سمح الله

9-      صلي أيوة صلي هو جون اللي بيقول مستغربة كده ليه؟ اكمنها جاتلك من الغريب؟ معلش يا حبيبتي ما غريب إلا الشيطان... أو تأملي ف الكون أو الخلق اللي ماشية ف الشارع من البلكونة أو حتى الشباك.. يجوز برضه

10-   اعملي شوبينج وكل جنيه تصرفيه... همك هينزاح يا حبيبتي وهترسمي البسمة على وشك.. بس مش كتير أوي وحيات أبوكي لأحسن كده جوزك مش هيصالحك ف سنتك

11-   انزلي اتمشي وفكي عن نفسك شوية يا حبة عيني.. ولو الوقت متأخر

12-   خدي حمام فقاقيع... بالشامبووووووووو و الشاور جل واديله ادي املي البانيو واغرقي.. قصدي واستمتعي بحمامك

13-   اتفرجي ع التلفزيون.. بس بلاش تعملي زي الكبير وتجيبي هاني شاكر ف الحلم الجميل وتعدي تسحي للصبح عليكي وعلى بختك...هاتي حاجة تفرفشك كده...موجة كوميدي مثلاً

14-   روحي لمعالج نفسي...وإذا عملتيها ف مصر هيودوكي السرايا الصفرا ف فكك من الحل ده وكفاية عليكي التلفزيون يا ماما

الست بقى زي الموجة تطلع لفووووووووق وتنزل لتحححححححححت عشان تعرف تطلع لفوق تاني

مش طول الوقت سعيدة وبتحبه ودايبة ف دباديبه

لأ بيجي عليها وقت تتخنق وتضايق من نفسها ومن اللي جابوها ومتبقاش طايقة نفسها ولا طايقاه ولا طايقة العيال

ويجيلها اكتئاب بقى وتعد تتفرج ع التلفزيون وتاكل شيبسي ولا أيس كريم ولا شوووووووكوووووووولاته

وطبعاً كلكوا عارفين أنا باتكلم  عن ايه

عزيزي القارئ، الست زي المرجيحة... يوم تحت ويوم فووووووووووووق فووووووووووق

بس لما الست تكون راكبة الموجة وواصلة بيها لقاع البحر مش عايزاك تسيبها تولع ف نفسها بقى

الراجل حاجة والست حاجة تانية خالص

الست عايزاك تبقى حونين وتاخدها ف حضنك وتطبب عليها

وتسمعها.. تسمعها ... تسمعها

ان شا الله تكون بتتكلم عن إنها مش عارفة تولع البوتوجاز

أحب أذكرك عزيزي الرجل إنها مش تافهة ولا هبلة

هي بس بتطلع غلبها ف اللي يجي ف سكتها حتى لو كان أبسط وأتفه الأمور

بيقولك الكلمة اللي على لسان كل ست تتضايق ايه؟

احنا مبنخرجش

وبما إن الراجل والست بيتكلموا لغات مختلفة

لغة الرجالييييييز ولغة الستاتووووووز

فهو هيرد عليها ويقولها: هو انتي ما بتحمديش ربنا أبداً.. ما احنا كنا ف كارفور أول امبارح

ودي برضه خروجة يا راجل دي مشوار وبنقضيه

طب ايه رأيك بقى إننا مش خارجين وأعلى ما ف خيلك اركبيه

خروج يوك.. فسح يوك..

يوك يعني نو لأ لع بالتركي باين

وتتقلب خناقة وزعيق وتنطيط

طاخ طوووووووووخ طيييييييييخ

عزيزي القارئ، هذا ما لفت انتباهي فيما قرأت وتقريباً خلصت نص الكتاب

بس واجبي تجاه قارئي العزيز مهانش عليه يسيبه من غير ما يقوله ويقولها هذه الدرر

ولما أقرا تاني احتمال أكتب جزء تاني

انتظروووووووووووني

ولو مكتبتش اعرفوا إن واجبي شاف إن كفاية عليكوا كده