البنت مبتتقلبش يا أحمد
يا نهار ألواااااااااان
دي بقى عندها حداشر شهر دلوقتي
ازاي يعني لسه متقلبتش
تحطها ع السرير على ضهرها
تيجي بعد نص ساعة تلاقيها لم تبرح مكانها
يمكن الفرق الوحيد إنها ممكن تتحرك مع اتجاه عقارب الساعة
وتلاقيها ف آخر السرير على ضهرها برضه أو على وشها
في حالة واحدة فقط لا غير
ألا وهي: إنها اوبس تدألج من ع السرير ع الأرض
طب هنعمل ايه يا أحمد؟
دي الناس واكلة وشي
وأمك كل يوم تسمعني كلام يسم البدن
البت ضعيفة
البت مبتتحركش
لأحسن يطلع عندها لين عظام
تفي من بؤك ياختي بعد الشر على ضنايااااااا
طيب جربي حطيها على بطنها
جربنا يا سيدي
وايه النتيجة؟
أآآآآآآآوووو أآآآآآه
العياط المستمر ولا يتوقف إلا بإنك تغيرلها الوضع المريع ده
ولما هي مش بتنام على بطنها هتحبي ازاي؟
لأ يمكن تمشي على طووول
اللي قدها حبوا وشبعوا حبو
تمشي ايه بس؟
ده أنا باوقفها بتعد ترقص
وسطها سايب ياخويا
يلا أهو تعرف برضه تجيب لقمة عيش لما تكبر
طيب مشيها انتي
تاتا خطي العتبة
تاتا حبة حبة
برضه رجليها بتتهز
ياربي رحمتك
كل طفل ومهاراته ونموه بقى
أنا هاوجع دماغي ليه؟
وهو أنا اللي باوجع دماغي
دوووول الفتايين اللي انتو عارفينهم
اديها كالسيوم... أصلها ضعيفة
أكليها كويس... أصلها مش بتاكل
سيبيها ف الأرض... أصلك معوداها ع الشيل
وقفيها واسنديها... أصلها مايصة وأعصابها سايبة
طب بتتكلم؟
هتقول ايه يعني؟
أنا باحب ماما وبابا
لأ بس تقول ماما بابا مامْ امبو
امبوووووووو
يعني ايه امبو؟
جايبينها منين دي؟
مالها ميه؟
ولا توتو؟ اختصاراً لووتر مثلاً
يلا ما علينا
لأ يا سيدي ما تكلمتش
بتقول ايه داااااااااا؟
ينفع؟
حلوة دي؟
أو بااااااابببب أو ماممممممممم
ودي برضه مش معناها مامي ولا بابي
معنى كده إن بنتي معيوبة كفا الله الشر
لأ فشر
فشرت وع الحبل اتنشرت
وحيات أبوكوا سيبوني ف حالي
أنا وبنتي
أنا كده راضية
يعني القطة كلت لسانها
مهي بتوأوأ وبتزعق وبتزن زي الفل اهو
تتكلم وقت مهي عايزة وتمشي وقت مهي عايزة
وإن شا الله عنها ما حبت
حتى ركبها ما توجعهاش
ماله اتجاه عقارب الساعة
ولا حتى اتجاه عكس عقارب الساعة
أنا باحب الساعة
أنا باموت ف الساعة
وأنا ف ايه ولا ف ايه؟
أنا ف إنها مبتمشيش ولا ف إنها لازقالي ليل نهار
ومش عارفة أشوف مصالحي
وده بقى عيب إنك تربي عيالك ف الغربة
بيطلعوا تقريباً كائنات فضائية
ايلينز
ميعرفوش غيرك
بتبدأ مرحلة تعريفهم على حد جديد بالصويت غالباً
والتشنج ثم الشحتفة
كأنك قتلتلهم قتيل وبيعاتبوك على إنك شرير
يا متوحش يا عديم الإنسانية
والمرحلة التانية بيفكوا شوية ويبعتوا بصات وابتسامات خفيفة
للناس اللي حواليهم
وهم برضه ف حضنك متشعبطين
ورافضين رفضاً باتاً من على كتفك ينزلون
والمرحلة التالتة يفلتوا مخالبهم عن اكتافك ورجليك
أيوة مخاااااااااااالب
دي مش ضوافر والنعمة
والدليل ف كل حتة ف جسمي
خراااااااااااااابيش
وتعاوووووووووووير
ويعدوا بقى ف الأرض لوحديييييييهم
ويجي حد من الشريرين يشيلهم
وتبدأ تاني وصلة الصويت والتشنج لحد ما تيجي المامي
السوبر مامي
تنتانت تاااااااااان تيراااااااااتتتت
وتخلصهم من أيادي الشريرين
بس بعد تلات أسابيع ولا حاجة
يوصلوا للمرحلة الرابعة
إنهم يسمحوا للغرباء سكان الأرض دون الفضائيين إنهم يلاعبوهم
أو يهشتكوهم ويدلعوهم
وقد يصل الأمر في بعض الأحيان إلى الضحكات المقهقهة المدوية
إلى أن ن ن ن ن
يسمعوا أو يلمحوا المامي
وبعدها كأنك يا أبو زيد ما غزيت
ويصيحوا ويشاوروا وينادواااااااا
م م م م م م م م م م
مع البكاء الشديد وذرف الدموووووووووووع
وتيجي المامي يا حيلة أمها
وتسيب كل اللي ف ايديها
عشان تنقذ رضيعها من براثن سكان الأرض
وتعود مع رضيعها لسفينتهم الفضائية
ايه بقى المرحلة الخامسة؟
الله أعلم
امتى تفلت المامي من قبضة اللولو؟
الله أعلم
وده بقى ف علم الغيب
عنا يارب
بسرعة يارب
No comments:
Post a Comment