عجب العجاب

لما واحد يصحى الصبح وميبقاش عارف هياكل منين؟

ولا هياكل ايه هيفطر ولا يتغدى ايه من الاتنين؟

مهو كده كده مفيش عشا واحنا متأكدين

كله ف علم الغيب واحنا مش داريين

عجب العُجاب إنك تصحى الصبح تفكر تطبخ ايه وكمان على قد الايدين

رز وعدس ولا مكرونة بصلصة ولا شوية كشري جنبهم شوية شطة جاهزين

تحمي بيهم صدرك وتقول لقمة ربنا قسمهالنا وبيها متهنيين

ولا حتت جبنة وبطيخ ولا كام بطاطساية مسلوقة وف البيض المقلي متقلبين

يقولك كام مليون تحت خط الفقر مدفونين

ولا هاجيبلكوا سيرة اللي معاهم فلوس ولا المرتاحين

أنا بس باتكلم عن الغلابة المتنيلين

مش لدرجة عشعش ولا زرزارة  وسكانها المتبهدلين

لأن دول بقى وكيل وكفيل بيهم رب العالمين

أنا بس باحكيلكوا عن الناس العاديين

المستوى المتوسط اللي يمكن يكونوا موظفين

مش بتوع البترول ولا الهيئة المتريشين

اللي على باب الله ويوم بيومه عايشين

الناس اللي بتسأل كيلو اللحمة بكام ولو طلع ب 40 جنيه يبقوا مش شاريين

وتوصي على الفرخة بالكيلو هاتها كيلو وربع ومتزودش يا فرارجي قرشين

وتعد تحسب حسابها على الأكلة تكفي يومين

مرة بزفر ومرة أورديحي من غير بروتين

ولو جابت كيلو فاكهة مانجة ولا جوافة ولا تين

تعده بالواحدة عشان يكفي الصاحيين والنايمين

ولو كان معاهم اللي يكفيهم ولا لهم الفلوس مش شايلين

كانت ست البيت صحيت الساعة واحدة ولا اتنين

يجيلها نفسها على مكرونة باشميل ولا نجرسكو ولا تعمل واحدة نصين

مهو نفس الباشميل والخلطة والفرق الوحيد ف الحشوتين

ولا تعمل شوية رز وتبعت تجيب شوية جمبري وسمك مشويين

 ولا يهمها بكام وغلي ولا لسه الأسعار حنينيييييين

والعين بصيرتين بس الايدين قصيرتين

وما بيدك حيلة يا ست البيت ياللي شايلة هم قفة بودنين

من غير ناس تساعدك ولا بمصاريفك قايمين

ربنا يعينك بقى ع التفكير اليومي ف وقت ما البطون يبقوا مصوصوين

ويديكي على قد نيتك ويباركلك ف رزقك على مدار السنين

تدبري بيهم حالك وانتي وعيالك باللي يجيبه ربنا مرضيين