ايه المردات دي؟

ايه المردات دي؟

يعني لما حد يقول أنا رايح أنام

والتاني يرد عليه يقوله نامت عليك حيطة

طب أنا قايم بقى

قامت قيامتك واتنصب ميزانك

وواحد يقول لابنه مثلاً كل كلتك تاكولة

ما هي التاكولة؟

دي وحش يعني بعبع بيخوفوا بيه العيال الصغيرين

والتاني يقول اشرب شربتك شرمبة

ما هي الشرمبة عزيزي القارئ؟

يا ترى هي بلاعة مثلاً أو بيييييييير

ولا يمكن ديناصور بس بيشرب البني آدميين مش بياكلهم

عنده مشاكل ف الهضم مثلاً

ولا الشرمبة دي بنت عم الطرمبة اللي بيسقوا بيها الزرع

وعيل يقول لأمه الساعة تلاتة الفجر

ماماااااااااا عايز ألعب بالكورة

الأم بقى بكل ثقة ويمكن تكون ماسكة الشبشب ف ايديها تقوله

لعبت على نفسك دبانة زرقا

يعني اشمعنى دبانة؟ ده أولاً

وثانياً، ما هي الدبانة الزرقا؟

ده يعني نوع من أنواع الدبان

من فصيلة الدبان الأزرق زي العفاريت الزرق كده

وواحدة تنده على بنتها

فبنتها ترد تقولها ايه يا ماما؟ عايزة ايه؟

الأم بكل عفوية تقولها جتك أوا أما يأويكي.. اسمها نعم

ما هو الأوا؟ عزيزي القارئ

وكمان هيأويكي؟ ايه الفعل ده؟

خمن معايا

هل هو نوع من أنواع المصايب أو شكل من أشكال الضرب؟

زي حد يقول هاضربها

فنفس الأم الحونينة تقوله ضربة ف قلبك

عشان ضناها بس

أدعي على ابني وأكره اللي يقول آمين

بنوتة أمورة تيجي تقول لأمها ماما أنا لازم أخد مصروف أكبر

أصل صاحبتي بتقولي

تقوم أمها تقاطعها بسرعة الصاروخ وتقولها

قالك القل وتعب السر

ما هو القل؟ ويا ترى هو السر بيتعب من ايه كفا الله الشر؟

أصل يا ماما عايزة أعمل حواجبي

عملك ف لقمة بلا قلة حيااا غوري يا بت من وشي

يعني ازاي عملها ف لقمة؟ ملوش قيمة أكيد

وتروح البنت المدرسة صاحبتها تقولها: مالك يا بت؟

تقولها بت اما تبتك... أمي مشبشالي قبل ما أنزل

هل تبت دي فعل؟

وممكن تكمل الموشح وتقولها: وحمار يضرب ستك

أو تكمل الموشح بكلام أبيح مينفعش نقوله ف مدونة محترمة زي دي

وواحدة تقول لصاحبتها ده أنا قمر

والتانية بكل ثقة وتلقائية تقولها

قمر بالستر يا حبيبتي

أو واحدة تقول صاحبتها برضه

ملكيش دعوة

فالتانية تقولها لعوة لما تحش بطنك

ما هي اللعوة؟

وهل تحش فعل مضارع؟

أو تقولها يوووووووووه بقى وانتي مالك

فالتانية تقولها مالي ف جيبي والباقي ف أفاكي

طب ليه الباقي ف أفاها يعني

مهو لو ف أفاها هيقع فور شوور

وواحدة بتتخانق مع واحدة فتقولها أصووووووت

تقولها صوتوا عليكي ساعة وانفضوا

ساعة لما تتكل ع الله يعني وربنا ياخدها

الناس دي بتجيب المردات دي منين

من وحي خيال المؤلف ولا وليدة اللحظة

ومن ثم، تناولتها الأجيال

أصلاً ايه أصل كلمة مردات دي؟

مش المفروض تبقى ردود

مم نستفيد مما سبق؟

أن المصريين ذو مخيلة شاسعة

ولديهم قدرة غريبة وعجيبة على تكوين جمل لايقة على بعضها

بس عشان يشرشحوا لحد أو يشلأووله

ومش شرط يكونوا فاهمين هم بيقولوا ايه

بس أهم حاجة يردوا

ردت الميه ف زورك منك لها لها لهااااااا له

وده أخر مرد هتحفك بيكي عزيزي القارئ

وألحق أجري قبل ما ترد عليا