مرات الجوزين

صحيح البني آدم طماع

ومايملاش عينه إلا التراب وبتاع

بس أنا والنعمة غلبان

ونصيبي ف الحب تعبان

نفسي ف شوية حاجات من زمان

حب وحنية ورقة وكمان

قيمة ومركز ووظيفة أمان

تعيشني ف مستوى حلو بس شتان

بين ده وده وفلان وعلان

مهي قسمة ربنا كاتبها يا فنان

اللي تلاقيه هنا متلاقيهوش هناك عشان

مفيش حد كامل من كل اللي تتمناه

ومش كل اللي تطلبه هتلاقاه

مهو العريس مش وارد كارفور

ومن غير ما نلف وندور

اهي بطيخة قرعة ولا بشعور

اختاري بقى يا حلوة اللي يناسبك.. الأمور

ويجي معاه الفلوس وشوية فتور

ولا الحنين الرقيق وان شا الله يكون فرفور

في الحب ومعاملة المرأة أستاذ دكتور

بس من ناحية المرتب ولا الوظيفة مش شطور

ولا يمكن حظه مش موفور

فأنا بقى وصلت للحل الأخير

أتجوز اتنين بالكتير

فارس الأحلام الموزز الأمير

واللي مش لاقي ياكل حتى فطير

والتاني المقتدر اللي معاه فلوس بس مش كتير

بين البينين ولا غني ولا فقير

راجل ملو هدومه اللي مش حرير

أصل حرام الراجل يلبسه مش من باب التوفير

واحد بيتكلم ويتسهوك والتاني غفير

ملوش ف بحبك وهاموت عليكي والكلام الكبير

اللي يرفعك للسما السابعة ويخليك تطير

بس عل الله ما يكونش قاله قبلك لمنى وعلا وغدير

وإن قاله يعني.. مانتي بس اللي دخلتي قلبه وعششتي وقفلتيه بالجنزير

وماله يعني لما اخد الاتنين... اشمعنى هوه؟

وأنا بس اللي أشيل وأخبي جوه

وهو يقول بكل بجاحة وقوة

مهو حقي الشرعي وربنا محللي

وأنا ولا باخبط ف الشرع والمجتمع لحد يقولي

ايه اللي انتي كاتباه ده يا ترارالي؟

يا عيني علينا يا ستات تاخدي واحد ولو هو اللي

طلع عينك... ترضيه وتعمليله اللالي

وتقولي اهو نصيبي وخلاص حصلي اللي حصلي

طول عمرهم يقولوا جوز الاتنين

ايه رأيكوا بقى ف مرات الجوزين

وتقف ف المطبخ يجي ساعتين

تعمل أشكال وألوان ومن كل حاجة صنفين

ومش كفاية حماة واحدة لأ هيبقى عندها حماتين

والقرف الواحد يبقوا قرفين

وتسيب لده شعرها وتعمل لده قطتين

ويغيروا من بعض بقى شغل ضراير متنكدين

وف الآخر عليا أنا منكدين

وكل واحد عنده مشكلة ولا مشكلتين

يصدعني ويجيبلي الهم ووجع الدماغ وقرف السنين

وبدل ما هتغسلي فوم واحد هتغسلي فومين

وده عايز عيال وده شرحه.. تجيبي من مين بقى ولا مين؟

وتحبي مين أكتر... التاني ولا الأول زيادة حبتين؟

يانهار أبيض.. ولا كده نافع ولا كده مظبطين

طب الاتنين ميفعوش مع بعض، أخدهم على دورين؟

ما ده هيوحشني وده هيبقى ناقصني وكده كده بايظة من الناحيتين

لا جواز مش كامل نافع ولا نافع جواز من اتنين مش كاملين

وكمل انت الحكاية أنا بس هاقولك كلمتين

هو اختيارك.. خد حاجة من الحاجتين

يا ده يا ده... الكمال نسبي... ده حلو وده زين

وحدد انت يا باشا أي الصفات متطقهاش وأيها معاك أكلين

واللي مكتوب ع الجبين لازم تشوفه العين

واصبر واحتسب لحد ما تقابل رب العالمين

وربنا يديك السعادة ويكفيك شر الحاقدين

الباكيت ليست تبعيتي

الباكيت ليست تبعيتي

قبل ما أبدأ أرغي يا عم الأمور

أحب أقولكوا يعني ايه باكيت ليست

The bucket list

دي عبارة عن قائمة بالحاجات اللي نفسك تعملها قبل ما تتقلب زي الجردل

وتنام... بس النوم الأبدي

لأن دي عبارة أو مثل ف الانجليزية اسمها

Kick the bucket

أي يتوفى إلى رحمة الله تعالى وربنا ياخده

ووالنبي محدش يقولي ايه علاقة الجردل بالشلوط اللي هياخده وبعدين يموت

لأني مبدئياً معرفش

بس لو تحبوا إني أفتي شوية... اشمعنى أنا اللي مفتيش يعني

ما مصر كلها بتفتي... وطبعاً احنا عرفنا الفتي قبل كده

بس زيادة تأكيد.. عشان مابقاش حرمتكوا من حاجة

جرب توووه كده واسأل واحد عن شارع عز الدين عمر واسمع الفتي اللي على أصوله

استوقفتني دوماً كلمة شلوط... بحكم إني بانطقها شلوت

وألاقي الناس كاتبينها شلوط بالطه- متنساش وحيات أبوك تشد شوية ع الطاء

يا ترى شلوط دي كلمة عربية فصحى بالحروف المفخمة؟

وأنا بس اللي طلعت رقيقة ولا ايه؟

يلا اما أقولك الفاتية بتاعتي قبل ما أنساها

زهايمر بقى... مع إني يدووووووب تلاتة

يووووووه.. اربعة وعشرين سنة

بس بتحصل ف أحسن العائلات

هو الواحد هياخد شلوت-مراعاة لرقة بعض القارئات من فصيلتي- دماغه تخبط ف الجردل.. يتقلب ويروح ف خبر كااااااااااان

بعد الشرح المفصل لمعنى التايتل

أرجع أصدعكوا بقى

ده على أساس يعني انك عزيزي القارئ مابدأتش تاخد بنادول أو كيتوفان- على حسب البلد اللي انت فيها- من دلوقتي

يا ترى أنا نفسي ف ايه قبل ما أموت؟

· نفسي أروح تركيا... ومستعدة أبوس ايد أهل أحمد نفرر نفرر عشان يرضى يوديني.. مش عشان مهند والله.. ده واد مايص كده وحلاوته تجزع.. ممكن أشوف أسمر وجهاد أنا معنديش مانع

· نفسي أكمل تعليمي وآخد الماجستير.. شوفتوا أنا متواضعة ازاي... مش لازم الدكتوراة يعني

· نفسي أروح فينيسيا... وأركب فلووووكة أنا وحبيبي ف الجندول الضيق ده اللي بنشوفه ف الأفلام... ده بعيد عن شنبي طبعاً

· نفسي آكل سيمون فيميه ومارونج لايسيه... ووأنا باكله أغني يا حتت مارونج لاسيه محشي بالشوكولاته... شوكولاته الناتا كما ناتا... أنا وبفضل الله كلت لوبستر ومحدش يسألني يعني ايه بالعربي عشان معرفش... بس طلع طعمه زي الكابوريا كده بالظبط... وكمان كلت بيكاتا بالشمبنيوووووووووو...لأ وباعملها كمان.. التلفزيون بوظ مخي... لا حول ولا قوة إلا بالله... اشمعنى يعني هم ياكلوا حاجة أنا ماكلتهاش...ما كلنا ولاد تسعة... مش بيقولوا كده ف المسلسلات برضه؟

· نفسي أزور ماما أمريكا وخالتي فرنسا والفاموليا كلها... أنا الود ودي أبقى سفيرة أو أبقى بنت بطوطة وأجوب أنحاء العالم... حلوة اللغة العربية الفصحى دي؟ عجبتكوا؟ ألفهالكوا؟

· نفسي أفرح ببنتي وأشوفها ف بيت العدل... وأقولها يومها إن قالك كاني ولا ماني هاتي كراكيبك وتعالي...ولا بناتي بقى الله أعلم.. بس لو الأم لو مشافتش بنتها بفستان الفرح ممكن تتنقط أو تطب ساكتة

· نفسي أبقى سعيدة أوي ف جوازي وأحب جوزي ف قصة حب

· نفسي أعمل فرح تاني غير فرح موجة كوميدي ده بتاع أنا ايه خلاني أتجوز اللي وقع ف قرعتي وكان من نصيبي

· نفسي أقرأ كتب كتير جداً لن تتسع تلك المدونة أن تذكرها مراعاة لوقت قرائي الأعزاء

· نفسي أسمع أو أستمع إلى الكتاب الاوديو- أي الصوتي- قصة الحضارة..ستوري اوف سيفيلايزاشن.. لأني أصلاً نزلته من ع النت منذ قرن مضى وكده كده مش ممكن أقراه لأنه كبير جداً ده أولاً وغالي فش..... لسه شايفاه بتمنميت ريال ف مكتبة جرير.. ان شا الله عني ما قريته ولا عرفت حاجة عن تاريخ العالم

· نفسي أفضل اتكلم انجليش طول الوقت لأن ده تقريباً هدفي ف الحياة الكلام بالعنجليزي وتبقى حياتي اول انجليش اول زا تايم.. أكتر من كده ويزيح ربنا... طبعاً ده أول حاجة هتخطر ببالك... صديقي الودود قالي إني ممكن أدرس لأوباما... لأني ماينفعش أهدر كل مواهبي الأصلية ف التحدث باللغة الانجليزية وأعد ف البيت أقمع اوكرا.. أي بامية

· نفسي أبقى كاتبة مشهووووووووووورة أووووووووووي وأعمل كتب.. اشمعنى غادة عبد العال ورحاب بسام

· نفسي أكون من المشتغلين بالتدريس لأني بالاقي نفسي جداً فيه وفعلاً دي الشغلانة الوحيدة اللي لايقة عليا وبتطلع مواهبي المدفونة... بس مبدئياً كده عشان نبقى اون سيراميك وعلى نور من أولها... أنا ما بدرسش بنات... صبيان فقط

· نفسي أشبع مواهبي التصويرية العظيمة وأنتقل من دايرة الاماتشور لدايرة البروفيشنال..سواء بالدراسة أو الممارسة

· نفسي أطلع ف التلفزيون بقى...يعني مطلعتش ف الثانوية العامة وعديتها... إنما مع مواهبي الجمة ولسه مطلعتش ف التلفزيون عليا... عارون عليا.. ادونا فرصتنا بقى... نأخذ من كل رجل قبييييييييييييييييييلة

· نفسي يبقى ربنا راضي عني لأني بالبخ كتير...

· نفسي أعمل بانجي جامبنج ... ونفسي أروح ملاهي فيراري ورلد

· نفسي أخس يجي تلاتين كيلو كده وأرجع مزة زي الأول

· نفسي ألبس بيكيني ولا حتى مايوه قطعة واحدة.. أنا راضية بس أنزل بيه بسين مش بانيو شقتي

· نفسي أعرف ألف محشي ورق عنب وكرنب

· نفسي أعرف أعمل كاسترد... على طول بيبوظ مني

· نفسي أتعلم ايطالي وأشوح بايديا زيهم كده... مولتو مولتو

· نفسي أكمل كورسات فرانسيه وأتحدثه بطلاقة

· نفسي أتعلم أرقص صلصة.. سالسا

· نفسي أروح سهل حشيش... مش عشان الحشيش.. عشان الماء والهواء وأوبروي الحسن

· نفسي أعد أسبوع بس أنا مش طماعة ف اوتيل ماريوت أو الريتز ف أي حتة ف العالم

· نفسي أسوق عربية غير عربية كارفور وعربية لولو والعربات المتصادمة.. عربية بحق وحقيقي وتكون بتاعتي وأملاها دباديب عشان العيال مش عشان هو اعلان سبرايت

· نفسي أركب موتوسيكل وأنا اللي أسوق... ماباحبش أعد ورا

· نفسي آكل سوشي... ويارب مارجعش بس... قال سمك ني قال

· نفسي أتفرج على الأخبار مرة وما ألاقيش حجة عشان أقوم أو أقلب بعد عشر دقايق بالكتير

· نفسي أقابل اوبرا وينفري من غير شوو

ها ايه رأيكوا بجى؟

حلوة ولا ملتوتة؟

باحلم وأفتح عينيا... على ليستة حلوة غنية

فيها كل اللي اتمنيته...وهي دي بس القضية

وأشوفكوا يلا قريب

ف نوت حلوة تطيب

نفسك يا قارئي الطيب

الدكتورة نسرين

الدكتورة نسرين

قولتولي بقى مين هي الدكتورة نسرين؟

دي بقى دكتورة كده آخر حلاوة ودلع ونعومة

نعومة دي بقى في المجمع العامي السوري يعني رقة

وتخش عيادتها تلاقيها بمبي بمبي بمبي

والأدوات كلها بمبي بمبي بمبي

وهي لابسة بمبي بمبي بمبي

العيب الوحيد ف الدكتورة نسرين الموز اللوز دي

أو ف عيادتها البينك المنورة دي وتشرح القلب

إنها... إنها... أنها... يعجز لساني عن النطق

إنها عيادة أسنان

وآآآآآآآآآآآه يا أسناني

أروح لدكتور عيون ماشي

أروح لدكتورة نسا ما يضرش

أروح لدكتور قلب مفيش مشكلة

إنما يتعسني الحظ وأروح لدكتورة أسنان

يادهوتي

يا عيني عليا وعليكي يا سناني اللولي

أنا مش شايف غير صفين لولي

طبعاً الدكتورة نسرين كان ليها رأي تاني خالص

أنا مش شايفة غير صفين سوس وسنان مسوسة

وأنا أعييييييييييييييييييييييييييييط

وهي قالتلي افتحي بؤك

أوي... لا تسكري

وفجأة حسيت بحتة بلاستيك جوة بؤي

وقالتلي سكري..

أحب أنبهك عزيزي القارئ إن الكلمة الجاية مش هتبقى أبو صرة

سكري بتشديد الكاف... أي اقفلي

وأنا سمعت الكلام كالعادة طبعاً وقفلت بؤؤؤؤؤؤؤؤؤؤي

وألاقي جهاز ذو مقدمة مستديرة اتلزق ف خدي من بره

وده ايه ده يا ترى؟

ده اكس راي... أشعة اسم الله

وشالت الورقة وهي متعقمة طبعاً ولابسة الجونتي

ورزعت أمها ف كوباية مليانة ميه كده ولا أي سائل شفاف.. وأنا ايش درااااااااااني

وف قمة القرف شالتها بملقاط وقلبتها يمين وشمال

ورجعت بضهرها لورا

وقالتلي اووووووووووووف

وأنا قلبي وقع ف رجليا

واتعدلت شوية وقالتلي

للأسف السوس موصل للعصب

قلتلها يا شيخة وقعتي قلبي

وانتي جيتي ف جمل

مصر كلها السوس موصل فيها للعصب

قلتلها اتكلي ع الله احشي نو بروبلم

قالتلي ان شا الله بنبلش –نبتدي- بأسوأ الحالات وبعدين ربنا يسهل

قلتلها ايه ده؟ هو في تاني ولا ايه؟

قالتلي انتي عندك تمانية مسوسين تحت و سبعة فوق

وفجأة اسوست الدنيا ف عيني...قصدي اسودت

قلتلها ليه وأنا أصلاً عندي كام درس؟ده أنا أصلاً خالعة اتنين وأنا ف اعدادي

ومعرفش إذا كان عندي درس العقل بقى ولا لأ؟ انتو بقة اللي تحكموا

ضرس بالعامية المصرية أي درس بكسر الدال

أصل المصريين رقاق شوية

يوووووووووووه مش الرقاق اللي بناكله ده باللحمة المفرومة

رقاق من الرقة

ده بقى مجموع الأسنان والضروس اللي مسوسة عندك

انتي قلقانة ليه؟

وأنا ببصة اسبهلال وتهكم... أصل أنا أول مرة أعرف إن الأسنان بتسوس

ده أولاً.. وثانياً: أصل الدكاترة عندنا ف مصر الله يخرب بيتهم

الواحد من دول ميقولكيش إن عندك سوس إلا لو الحالة تددددهوررررت ووصل للعصب

أما الحاجات البسيطة دي فالمصريين كرما..ومش بيحبوا يقطعوا رزق حد

ولا حتى السوس

ناس طيبين أوي يا خااااااال

قالتلي عايزة مخدر

بصيت لها بصة استعجاب تخفي ف ثناياها آآآآآآآآآآآآآه يا بؤؤؤؤؤؤؤي

قالتلي طيب خلاص متخافيش هاديكي مخدر

وفتحت بؤي على وسعه وحسيت بطعم فراولة ف بؤي

يااااااااا حلاوة

مخدر بطعم الفراولة ايه الدلع ده؟

وهي تقولي عجبك طعم الفريز؟

أي الفراولة في المجمع العامي السوري

وخدتني على سهوة باستطعم الفراولة

واممممممممم امممممممممممممم

وزغدتني حقنة

أتاري الفراولة مخدر للحقنة والحقنة مخدر لل...

للنخر والتحفير والمسامير اللي جايين ف السكة

وانت بقى بتحس بالضغط... ضغط ايد الدكتورة وضغط الدم بيرتفع

وطول مانتا فاتح بؤك.. طول ما ايديك ولا رجليك منملة

ولا الشيزلونج البمبي مريحك ولا نيلة

بس انت متوتر وفاتح نفق شبرا على وسعه

وتفتح عينك تلاقي تلات وشوش متنحين ف وشك

وانت الوحيد اللي بؤك مفتوح

لأن التلاتة: الدكتورة والممرضتين لابسين كمامات

لزوم التعقيم والنضافة يا تييييييييت اللي انت مش متعود عليها ف بلدكوا

وتحس انك ف جريز اناتومي من كتر النضافة و و و

ده كفاية المبة اللي متسلطة ف وشك دي

وهي كل شوية تقول ساكشن ساكشن

زي ما بيقولوا ف جريز اناتومي بالظبط

ناقص بس تشوف د. كريستينا يانج ولا ميرديث

ايه الساكشن ده بقى يا اخوانا؟

يعني الشفط بالصلاتو ع النبي

بيشفطوا اللعاب ولا يمكن الدم ولا أي سوايل عشان تنضف البؤ

وتشتغل على نضافة اسم الله

أنا صحيح واخدة مخدر

بس سامعة دددددددددديج ديجججججججججججج

وأشم ريحة شياط

وشوية وأسمع طق طق طق

شاكوش ده ولا بنسة ولا ايه؟

مهي بتطلع السوس بقى

وأنا نفسي أحط ايدي على ايدها وأقولها

والنبي مانتي شايلاه

سيبيه مستريح

قفشتني باحاول أعدل رقبتي كده

قالتلي تعبتي ولا ايه؟

قلتلها لأ اتكلي ع الله خلصيني بس الله يكرمك

وحسيت بحتة حديدة كده وكأن فيها مسمار وهي بتقرط عليه

وتقولي لااااااااا تسكري

وأنا نفسي أسكر بقى عشان أعرف ايه اللي هيحصل

بس خفت أشوه نفسي ولا حاجة

فقلت بناقص أجرب بقى

يا مسهل

شوية وهتشيل المسامير

وبعدين شالت ايدها

أحمدك يارب خطوة ف طريق الحرية

وقالتلي اتمضمضي مريم

خلاص نحدد موعد تاني.. ان شا الله باشوفك بعد اسبوع

وأنا بقى أحاول أفك تنميلة ايدي... مفيش أمل

اتكيت على نفسي وقومت من ع الشيزلونج البمبي

حسيت إني هاقع من طولي

قلتلها ده مخدر موضعي ولا كلي ده ولا ايه؟

وأنا باخبط ف الحيطان استجمعت صوتي وسندت ع الكرسي

وقلتلها متشكرة جداً يا دوكتور.. أشوفك على خير

كل سنة وانتي طيبة

وانتي طيبة والله يخليلك البنوتة الحلوة

مريم لا تنسي تفرشي أسنانك.. فرشيها كتير

فرشي من الاجليزية براش أي فرشاة بالعامية السورية يعني اغسلي

هافرش أكتر من كده

منا بافرش من وأنا عندي ست سنين

صبح وليل وليل وصبح وبعد الأكل وقبل مانام وأول ما أصحى

وعندي تسوس ف خمستاشر سن بس

بسيطة... هافرش متخافيش

يلا نشوفك

يلا فرشوا بقى انتو كمان

ربنا ما يجبليكوش تسوس

ولا يوديكوا لدكاترة خالص ولو حتى الدكتورة نسرين

وأخيراً، أحب أديكوا نصيحة واحدة... اوعوا يخدعكوا الشيزلونج البمبي بمبي بمبي

لأن السم دايماً بيندس ف العسل

يا عسل انتي يا دكتورة نسرين