المكان: ألسن عين شمس- كافيتريا ميدو
الزمان: أبريل 2007
يدوب لسه مخلصين صور الدفعة ورجعوا اللي هياكل ساندوتش هوت دوج
واللي هيشرب بيبسي ولا نسكافيه واللي هيراجع الاساينمت قبل ما يسلمه
مين دول بقى؟
جروب شباب زي الفل هيتخرجوا بعد كام شهر
سارة وحسن العصفورتين العصفورتين
حوبيكوا حوبي
مع إنهم مش العصافير الوحيدة، فيه بغبغانات وغربان برضه
البغبغانات طبعاً هما راعيين هذا الحب والموالين له الذين
ينمون (بتشديد النون وتسكين الميم) عليهم طول الوقت
وينشرون أخبارهم لباقي العشيرة وبره العشيرة ف بعض الوقت
أما الغربان فدول الحاقدين الذين يتمنون لهم الفشل
وخيبة الأمل اللي راكبة جمل
نجحوا بقى ولا فشلوا
الغربان هتفرح والبغبغانات هتسيحلهم
دينا دودة الكتب اللي ياعيني عينها فأفات من كتر المذاكرة
هي أصلاً متعرفش هي عايزة تشتغل ايه
هي حافظ مش فاهم
بتاكل الكتب أكل
بس لسه محددتش هدف
فيها حاجة دي؟
عمر خطب أسماء من أول السنة (رابعة جامعة)
يكونش كان بيحجزها
آه كان بيحجزها، ما هو وراه جيش
ويمكن يتاخد ضابط
ما الواد كان طويل وعريض يجي منه
وحنان كل حلمها تبقى مدرسة
وتشتغل مع الأطفال ف مدرسة
تلاعبهم وتربط شوزاتهم المترصصة
وترغي معاهم بانبساط وفرفشة
ده حلمها وده حقها
ولاجل الورد ينساق العليق
ميادة بقى دي حكاية تتعمل غنية
كل أمنيتها تبقى مرشدة سياحية
بس أبوها الله يهديه قلبه مليان قسية
ومش عاجباه من أولها القضية
شغلانة مشكوك فيها بالحرمانية
شوية سياح صيع ولا سكرية
(بضم السين وتسكين الكاف)
وهيه تقوله يا بابا دي حرية
يا تشتغل ف دي ولا ديا
المهم أدينا قفينالنا شوية
نرجع بقى للحكاية الأصلية
حازم نفسه يبقى معيد
قاعد يزيد ويعيد
أنا هاذاكر وأكون شديد
عشان أحقق حلمي الأكيد
وأثبت إن المستحيل مش بعيد
ومنى بقى بتحب الناس واللمة
قالت انا لازم أشتغل علاقات عامة
هافلح فيها وأعمل بكل همة
أنا أصلي هابقى شخصية هامة
نسيبنا بقى من القافية الملمة
بالحكاية ونشوفلها تتمة
المكان: اماكن كتيرة ف مصر وبره مصر
الزمان: الوقت الحاضر يناير 2011
راح فين بقى الجروب اللي زي الفل؟
ولا اللي كان زي الفل؟
حسن جاله شغل ف الخليج
واضطر يسيب سارة لوحدها
ورجع لقاها معدتش وحدها
غني بقى حبوا بعضن تركوا بعضن
ولا رجعت من السفر
بس الحكاية خلصت ومعدلهاش أثر
دينا ولا جابت تقدير
ولا مجموع ولا غير
ما الامتحان كان فهم مش حفظ
وكان فيه وات لايف ايز
حد شار عليها تجرب الكول سنتر
قالتلوا قشطة هو ده اللي ها انتر
يدوب تحفظ وتسمع وتتسنتر
ونجحت فيه وبقت أشطر
وأسرع واحدة تدي أنسر
عمر لبس ف تلات سنين
واديهم لسه مستنيين
ويتجوزوا ويعيشوا متهنيين
بس برضه لسه مخطوبين
كويس آهم مفنشووش زي التانيين
حنان بقى اتجوزت
وعملت لنفسها مدرسة
من عيالها اللي خلفت
تتطلع منهم دكتورة ومهندسة
ميادة كملت دراسات عليا
وخلصت السنة التمهيدي الأولية
وبقت محاضرة ف الجامعة قوية
شطورة ميادة رضت أبوها وبقت متهنية
وحازم معينهوش ف الجامعة المعنية
بس دور ولقى الجامعة اللي هيه
اللي خدته من غير محسوبية
بس شغله ومجهوداته المضنية
ومنى ما حققتش حلمها المتين
بس اشتغلت ف شركة تأمين
واديها برضه بتتكلم مع الموظفين
وشوية عوملا من حين لحين
وأتاري الدنيا بطيخة
مش عارفين حمرا ولا قرعة
إلا لما نفتحها ونشوف نصيبنا
ولا حد يبفضل على حاله
وكله بيغير أحلامه
ويتغير كل اللي كنا فيه
ونرجع نقول سي لا في
No comments:
Post a Comment