كان ياما كان
يا سادة يا كرام
في أيام الجامعة والجنان
زمن الأحلام ويمكن الأوهام
الشاب الحليوة هاني بيحب باكينام
وياخدها كل يوم يشوفوا أحدث الأفلام
وباكي كانت مبسوطة
ما القصة كانت مظبوطة
ولايهم حلوة ولا ملتوتة
ماهي قصة حب صغنطوطة
من ورا بابا وطنط توتة
وهو يعيد ويزيد للكتكوتة
أنا بحبك يا بطوطة
سنين فسح وشحططة
وخروج ولعب وهلفطة
وعلى فلوس ماما سلبطة
وماما ماتدراش إن بنتها الصغنططة
كبرت ومابقتش بنوتة مقطقطة
دي بقت خلاص قردة متنططة
وبعد اربع سنين لف
ومش عارف مين يقرالهم الكف
بايني كده عقلك يا هاني خف
ما العرسان واقفين صف
وانت يا حبيبي اللي مركون ع الرف
تخلص الجامعة ويروح هاني يتقدم
يتكل على الله ويدعي الخير يقدم
مش داريان يا عيني انه هيتندم
ما الوضع خلاص من أولها اتأزم
يسأله أبوها عملت ايه ف الشقة؟
يقوله لسه يا عمي ما دقيت مسمار ولا دقة
ومحدش يابني هيساعدك ولا يديك زقة؟
بعد إذنك يا بابا، تقول الحلوة بكل رقة
معلش يابني مفيش نصيب بنتي قالت لأااا
مصدوم ومكسور يقولها حقااا؟؟
كأنه يا عيني كوبايه ازاز طقااا
ويلم حاله ومحتاله واللي منه اتبقى
يحاول يفهم اللي حصله كده فجأة
ليه كده بس يا باكي؟
مش ده برضه اللي كان هناكي؟
فكرتي أوام ولقتيه سبب لشقاكي
ولا لقيتي عريس لقطة بيترجاكي
مش ده هاني اللي قالك أنا فداكي؟
اربع سنين يحبك ويرعاكي
ده بيحبك ولا يمكن ينساكي
ازاي ينسى كل اللي حصل معاكي
أوام نستيه ونسيتي هواكي
بنات غريبة.. صنف أناني ولا هو باكي
عيني عليك زمن فيه الفراخ هيا اللي بتكاكي
No comments:
Post a Comment