أقوله ياسبعي قوم شوف بنتك عشان أخلص اللي ف ايدي
يقولي وأعمل إيه أنا باللي بايدي
أنا ورايا شغل وفيسبوك أنا مالي ياختي
أبص لبنتي وأقولها يا عيني عليا وعلى بختي
أقوله طب أصلي ولا آخد شاور
يقولي وأنا بقى اللي أدبس ف القمر
أقوله خد غير للبت
يقولي ما تقوليلي أحسن خد رضع البت
دي أمور حريم أنا مليش فيها
وانتي بس اللي ليكي نصيب فيها
أنا نازل ألعب كورة وجاي بسرعة
أقوله عقبال ماتيجي هتلاقيني قرعة
يقولي لأ متخافيش ده أنا جاي على طول
أقوله خلاص هابطح نفسي بطبق الفول
أقوله حرام عليك ده أنا شقيانة طول النهار
يقولي يعني أنا يعني اللي كنت بالعب قط وفار
ولا مقضيها شات من ساعة الفطار
أقوله أنا خلاص فاض بيا
يقولي وأنا أعملك إيه يا ذكية
أقوله يا عم ارحمني وخد مني البت شوية
وبعد طول انتظار وعناد ومناقشة غلابوية
يقولي هاتيها بس متعوقيش يا عنيا
أحمد ربنا أهو خدها.. دقيقة وقبل التانية
وألاقيه بيقولي يلا يا بنتي لو مخلصتش قبل الديدلاين هتبقى قضية
أقوله يا حبيبي اصبر وخليني أخلص اللي ف ايديا
يقولي مانا زهقت.. العيال دول ملاعين
أقوله أبوس ايدك خليني أخلص المواعين
يرقعلي بالصوت ماتيلا بقى يا بنية
آخد بنتي وأقولها يلا بينا يا لولية
من دقيقتين عمل كده..أمال لو شاف اللي بتعمليه فيا
آه ياني ياما يا عيني عليا
حياتي كلها بقت ما بين بنتي وبين غسيل وترويق وتقميع بامية
جتها نيلة اللي عايزة خلف
دي دوخة وتعب أعصاب وتلف
وضغط وسكر وأرف
بس برضه العيال فرحة
من يوم ما لبسنا الفستان والطرحة
وربنا يوعدكوا بالخلفة الصالحة
ويديها لكل مستني
ويبقي بيها متهني
وربنا يحميهم ويبارك فيهم.. ويشيلونا لما نكبر
ونقول الحمد لله اللي خلانا على نعمته ما نتبطر
No comments:
Post a Comment