أفراحنا No Offence

أفراحنا No Offence

17 Dec. 2010

مش فاهمة أنا ايه موضوع أفراح اليومين دول

تدخل الفرح من دول تلاقي العروسة اللي عاملة زي عروسة المولد من كتر المايكب اللي حاطاه تحس انها جايبة علبة باكين- دي مش دعاية ولا حاجة بس الاسم اللي جه على بالي- وداهنة فرشة كده وفرشة كده والمفروض لما تروح تسلم ع العروسة تقولها ايه اللي على قبة عينك ده يا حبيبتي؟

نتكلم بقى الأول عن موضوع قبة عينك ده؟

أنا- وليعوذ بالله من كلمة أنا- ف يوم فرحي العظيم الخرافي رحت لكوافيره بعيداً عن إني أصلاً رحت لكوافير الأول ولقيت راجل هوه المدير وقال ايه بيزعألي إني رايحاله متأخر- ده على أساس إني اتأخرت ع الديوان مثلاً- اني واي، طبعاً أنا مسكتلوش لأنه قل أدبه عليا وقال ايه عايز يعملي حواجبي- طبعاً ده مش راجل أصلاً وده بقى اللي أنا قولتهوله فيها حاجة دي؟-وكنت هاروح ألبس فستاني ف جامع لأني أصلاً مكنتش هاحط كميات المكياج الميجا خرافية دي بس صحبتي الانتيخ اقترحت اننا نشوف كوافير تاني أحسن

المهم باقول الكوافيره أنا عايزة مايكب لايت على أخضر وأنا طبعاً مغمضة عيني النور يجي بقى أبص ألاقيها دهنتلي يوتن أسود- غيرنا النوع أهوه عشان متقلوش إنها دعاية- صوتلها طبعاً وقولتلها: ايه القرف ده قالتلي عشان الآيشادو يتقل وميروحش ف الفرح قولتلها لأ أنا شكلي كده يخوف أنا عايزة أبقى طبيعية مش عفريت العلبة

اتضح بقى انهم بيحطوا الأول طبقة سودا وبعدين تلات أو اربع ألوان يتضمنهم الأبيض أو الفضي اللي بيحطوه تحت الحاجب على طول عشان تحس ان العروسة لمبة نيون

وبالنسبة للفاونداشين- اللي هوه كريم الأساس- ده بقى بيعمل عمل طبقة المحارة اللي بيعملها النقاش عشان تحط فوقه البلشر أو الرجوجو وساعات تظهر العروسة كالمضروبة بالبوكس ف وشها

ومن هنا نستنتج: أن الكوافيرة استحوذت على عمل النقاش

نيجي بقى لموضوع ما يطلقون عليه بالطرحة أو بالأحرى عمة السلطان قابوس أو قرطة زنوبة

مالها يعني الطرحة العادية الأمورة دي اللي بتصغر شكل الوش حتى فا متحسش إنك قدام أتوبيس

وبعدين مين اللي قال إنها سبانيش- أسباني يعني- دي يهودي أساساً ( ممكن تجوجولوها وهتلاقوها على طول) دي حملة على الاسلام عشان يضحكوا على البنات ويخلوهم يخلو – بكسر الخاء- بشروط الحجاب الشرعي وأصلاً اللي تقدم على خطوة الاسبانش تبقى اريدي مش لابسة حجاب شرعي وأكيد هتبقى بتلبس بديهات وجيبات ضيقة وبنطلونات ضيقة برضه وماكياج أكيد بالإضافة إلى عمل الحواجب والبرفانات مع العلم إنها المصيبة الكبرى لأن من خرجت متعطرة وشمها راجل فهي زانية وطبعاً مفيش حاجة اسمها مش هخلي الرجالة تشمني وأنا ماشية ف الشارع ازاي يعني إن شاء الله هتحطي بيرسول فوقيها مثلاً

اللي يحرق الدم بقى إن معظم اللي عاملين سبانش بقى بيبينوا حتة من شعرها وعلى وسط الفرح كده بتوصل لنص شعرها

كل ده طبعاً حرام ف حرام ومحدش ينكر ياصحابي الحلوين

لأ واللي يضحك بقى جروب ع الفايس بوك اسمه صور أفراحنا اللي كل واحدة هبلة حاطة في صورها قال عشان ايه تفوز بأكتر كومنتس وهتاخد جايزة- يا شيخة خدتي ف سنانك- هما الحلوين مش واخدين بالهم إن في 10703 مشتركين ف الجروب تلات اربعهم صبيان أصلاً وإن كل واحد قاعد يحب فيها شوية ده ايه القمر ده وايه الحلاوة دي؟ على أساس إنها متجوزة خرونج أو كيس جوافة؟ فين رجالتهم دول؟ هي حتى الرجالة ماعدتش بتغير على نسوانها ف الزمن ده ولا إيه؟ مصيبة ايه دي؟!

ويا أمورة ياللي حاطة صورك- مع إنهم ولا أمورين ولا حاجة- أحب أقولك: انتي بتاخدي ذنوب على كل راجل بيبص على صورك ويعلق عليها.. وكل ما تزيد التعليقات، تزيد كومة الذنوب... كونجراتس بقى يا فالحة منك ليها

وأضيفي لمعلوماتك هذه المعلومة الجديدة: كل واحد بيعلق أو مبيعلقش على صورك بيحتفظ بصورتك النغنوغة الكتكوتة يا ست الكتكوتة والله أعلم بيستخدمها ازاي

نروح بقى لدايرة الرقص الي ف وسطها العروسة- والطرحة دلوقتي مبينة نص شعرها- وحواليها نساء كاسيات عاريات لأن كل صحابها لابسين فساتين محزقة وملزقة وقبل ماحد يزعل أنا برضه كنت بالبس فساتين سواريه ضيقة برضه بس الحمد لله ربنا هداني بس والله عمري مالبست عمة السلطان قابوس دي.. برضه مش عارفة مالها الطرحة الأمورة

ونفسي أفهم ايه موضوع الدايرة الهابلة دي اللي بيعدوا يصقفوا فيها دي ويبذلوا مجهود شوية ويهزوا كتافهم يمين وشمال لحد ما العروسة تشد ايد واحدة فيهم وتعمل نفسها مكسوفة شوية الأول وبعدين الباقيين يعدوا يزقوا فيها جوه الدايرة وتخش تهدها رقص وتعمل مسابقات رقص ع الطبلة قدام الشباب كمان

والرقص السلو ده كمان اللي ملوش أي لزمة بس ناس بتحضن وتتمايل قدام كل اللي قاعدين وميفرقش بقى إذا كانت خطوبة ولا شبكة وفي الحالة دي 100 % حرام طبعاً عشان الخطوبة دي مش جواز مينفعش يلمسها أصلاً بس يلا خليك فريش احنا ف فرح وأنا كده مش باقول إن لو كانت دخلة يبقى عادي على أساس إن الأحضان دي مش حرام مثلاً

تحس إن استغفر الله الأفراح اللي من النوع دي مجاهرة بالذنوب وبالرغم إني مبحبش فرحي أوي لأن باظ مني حاجات كتير فيه بس باحمد ربنا إن فرحي مكنش كده..هو الواحد ناقص ذنوب! ربنا يغفرلنا ويعفو عنا!

إلى كل شاب وفتاء: فككوا من الأفراح دي...دي ذنوب وأر وفلوس مرمية ف الأرض.. ياعم، خد عروستك واعملوا أحسن هني مون ف الدنيا وربنا يباركلكوا!

الحركة بقى اللي حبيت أختم بيها: يعني ايه يشربوا من نفس الكاس دي ولازم يبقى شربات أحمر عشان إن شاء الله يدلق ع الفستان بالله عليكوا: كام واحدة وقع عليها الشربات بس من احراج الموقف أو كاد أن يقع؟!