دولولا

أنا ايه؟

أنا من دول ولا دولا؟

أنا مش عارفني أنا تهت مني

ولا دول عايزني ولا دولا رايدني

طب أروح لمين وأقول لمين؟

أنا قلت أكتب يمكن لما حد يقراني يعرفني ولما يعرفني يفهمني ولما يفهمني يقبلني

ليه يعني الواحد يفضل يموت نفسه عشان الناس تقبله

هل الحاجة إلى القبول حاجة أساسية زي الأكل والشرب والنوم والتزاوج؟

ولو واحد قال وأنا مالي ومالهم أنا ف حالي وهما ف حالهم

لكم دينكم ولي دين

يقولوا ده بوهيمي وسلبي ومنعزل ومغترب (معلش للتوضيح: مغترب مش يعني ف الخليج اسم الله، مغترب يعني يعيش في اغتراب أي غريب في موطنه أو مجتمعه)

يعمل ايه يعني يقولهم اتفلقوا اتحرقوا و

I am what I am

ولا يمثل ويلون نفسه زي السحلية بلون دول شوية ودولا شوية

وماله يعني التمثيل؟ وهو يعني التمثيل كان كدب؟

أنا لا أكذب ولكني أتجمل

ابراهيم الفقي بيقول إن الانسان بيتعرف بآخر حاجة بيعملها

واللي أنا شايفاه برضه إنه مش بيتعرف من حاجة واحدة بيعملها

افترض بقى إن الحاجة دي سلبية أو مش هيه يعني اللي بتحدد شخصيته

يبقى احنا نفضالها بقى ومنشوفش غيرها

ليه يعني الناس عنيها ضيقة كده

ليه العين بتميل لرؤية العيوب وليس الجماليات والمميزات؟

هل فقدنا معنى الجمال ولم نعد نرى سوى القبح؟

دول يقولوا عليا مجنونة وطاقة (بشد القاف) ودول برضه يقولوا مجنونة بس مش راسية

حقيقة علمية: كلا الطرفين شايفني مجنونة

لما أهرج دولا يقولو انتي كده شلتي الكلفة ولما أهمد دول يقولوا مالك يا كبة (بضم الكاف)

لما ألبس واسع وطويل دول يقولوا عليا بهلول ف اسطنبول أو يلقبوني بالشنكحاوي

ولما دولا يلاقوا الطرحة قصيرة يقولوا مش لابسة خمار ليه

وأصلاً دول مستغربين إني مصاحبة دولا ودولا مندهشين عشان مصاحبة دول

ولما أكلم دول يقولوا انتي عاملة فيها الشيخة خضرا بصي لنفسك الأول

افرضوا إني عندي حاجة كويسة وعايزة دول ياخدوها مني وهيه أصلاً عند دولا

يكابروا ليه بقى ويقولوا ما احنا كويسين ف باقي الحاجات

طب ما احنا برضه حلويييين أوي

طب ما انتو ممكن تبقوا كويسين ف الحاجة دي كمان

حد يكره؟

ولما أتفرج على أفلام أجنبي لا سيما الأمريكية دولا يقولوا دي مضيعة للوقت والوقت من دهب وأمثال من هذا القبيل

وفي ناس سواء كانوا دول ولا دولا يقولولي وانت مالك ومال الأمريكان أصلاً واحنا خدنا منهم غير السخام

هتستفيدي ايه يعني؟

وايه المشكلة لما ناخد الحلو ونسيب الوحش؟

هوه احنا كمان ماعدش عندنا مخ واللي فوق ده مربى؟

أنا عارفة إن في ناس هتهاجمني بس ممكن تكون دي مشكلة بس الواحد المفروض يختار نوعية الأفلام اللي بيشوفها

يعني بلاش الأفلام الصايعة وبتبان من عنوانها أساساً وبلاش الهجص والأفلام اللي فيها كفر وآلهة وهركليز وهاري بوتر

أديني قولتلكوا دولا شايفنها ايه

دول بقى شايفنها تناكة وتعالي وتكبر

أشق هدومي يا خلق؟ أشد ف شعري يا ناس

ولا دول عارفين أنا بافكر ازاي ولا دولا عارفين أنا باحس ايه

ايه المشكلة يعني لما أجمع بين حاجات كتير ف نفس الوقت؟

هيه صحيح متناقضات بس برضه ايه المشكلة؟

ايه المشكلة لما أسمع أوبرا وأم كلثوم وكانتري ميوزك ووسط البلد ولبيك إسلام البطولة والرد القسامي والدندرمة وقسم وأرزاق؟

ايه المشكلة لما أروح أوبرا عايدة وأحضر حفلة تنورة وإنشاد ديني وأصلي الجمعة ف السلطان حسن وأحضر درس تجويد؟

ايه المشكلة لما أكون حافظة تحفة الأطفال والليلة الكبيرة؟

بيتهيألي أنا اللي جبته لنفسي وكل اللي هاستفيده من اللي أنا باكتبه ده إن الناس هتتأكد إني مجنونة وأعاني من انفصام حاد ف الدورة الدموية (أقصد: ف الشخصية)

ايه المشكلة لما أحب إبراهيم عيسى ومحمد حسين يعقوب ووائل الإبراشي وحازم أبو اسماعيل وعمرو خالد وأنيس منصور وخيرت الشاطر ويحيى الفخراني والخطيب وأوبرا وينفري والسادات ود. فيل وصلاح جاهين وشكسبير وأحمد مكي واردوغان وإيمان بكري وأمي مثلاً ؟

ايه المشكلة لما أحب أشوف أبواب البشرى والحقيقة و Doctors والمطبخ و Oprah Show و قناة سنا و Spacetoon و BBC ؟

ايه المشكلة لما أحب التصوير والقراءة والكتابة والرقص والتحليل النفسي والتدريس والرحلات والطبخ وقيادة السيارات وركوب الدراجة (أي العجلة)؟

ايه المشكلة لما أحب صحابي أوي وأستجدع معاهم وماطيقش مجاملة اجتماعية واحدة لحد مبحبوش؟

ايه المشكلة لما أكون جميلة وحونينة بس لو حد داس لي على طرف تبقى سنته سودا؟

ايه المشكلة لما أحب كرة السلة (الباسكيت بول) وعمري ما لعبتها؟

ايه المشكلة لما أحب البولينج ومابعرفش أنشن أصلاً؟

ايه المشكلة لما أحب التاريخ المصري القديم وأموووووووووت ف الانترنت وأدمن الفايسبوك يا كغومبو؟

المهم إني مهما عملت ولا دول مبسوطين ولا دولا راضيين

وأنا ف الوسط زي اللي رقصت ع السلم ولا اللي فوق شافوني ولا اللي تحت سمعوني

يمكن أنا ولا من دول ولا من دولا

يمكن أنا نوع جديد نزل السوق

يطلق عليه دولولا مثلاً

وحتى لو بقيت دولولا أنا دولولا (أقصد أنا راضية)

أنا مبسوط كده.. أنا مرتاح كده

ماله يعني دولولا؟ وحش دولولا؟ كخ دولولا؟

ولا انتو ايه رأيكوا؟