شرعي ولا مش شرعي؟

شرعي ولا مش شرعي؟

يعني ايه حجاب شرعي؟

وهو يعني قبل كده كان غير شرعي

ما هي واضحة من الأول بس احنا اللي مش واخدين بالنا

احنا بس اللي لازم نفتي ونتفزلك

واللي تقول حرية شخصية

واللي تقول وهو أنا يعني كنت بشعري (ولو إني مش فاهمة يعني ايه واحدة في عصر العولمة وانتشار الدين والدعوة الإسلامية في الجامعات والقنوات الفضائية على سبيل المثال لسه متعرفش إن الحجاب فرض وتتحجج بقى وتقولك ما انتو شايفين المحجبات عاملين ازاي واللي تقولك ما أنا أحسن من محجبات كتير ولو إني برضه أحب أوضح إن مش كل اللي تحط طرحة أو سكارف على شعرها تبقى محجبة.. ما النصارى واليهود بيغطوا شعرهم لما يدخلوا دور العبادة بتاعتهم.. مش معنى كده بقى إنهم محجبات أو مسلمات مثلاً، التانية اللي لابساه ومش لابساه ليها عذرها برضه نظراً للتضليل الإعلامي والعدوى المجتمعية العمياء بدون تفكير ودون الرجوع لأصل الحجاب... انتي بقى ياللي مش مغطية شعرك، ايه عذرك؟؟؟؟)

ما أنا محجبة أهو

(معلش للتذكير لأحسن حد يكون تاه مننا ولا حاجة: واللي تقول وهو أنا يعني كنت بشعري، ما أنا محجبة أهو)

يعني ايه بقى: أنا محجبة؟؟؟؟؟؟

يعني:

أنا مابلبسش بديهات (والله بمناسبة حمى جروبات الفايسبوك، كنت بافكر أعمل جروب اسمه "لا للبديهات") قولتولي بقى ليه لأ؟

أقولكوا أنا بقى لأنها شفتشي بتبين كل اشي وأول شرط من شروط الحجاب يا حلوين: لا يصف لأنه لو كان شفتشي هابقى والعياذ بالله من النساء الكاسيات العاريات اللاتي لا يدخلن الجنة ولا يجدن ريحها والمعروف سبحان الله أن المؤمن يشم ريح الجنة من على بعد كبير جداً أنا للأسف مش فاكرة قد ايه دلوقتي بالضبط.. ويا فرحتي بقى بالأربع طرح والبندانات الكتير والتوك اللي بتتحط تحت الطرح تنفش الطرحة كده-معظم الحجاب الكويتي كده- (رؤوسهن كأسنمة البخت) اللي بيعملوا راس السلطان قابوس دوول...اعذروني يا بنات أنا مبتكلمش في السياسة ولا حاجة..

(ملحوظة: يندرج تحت لباس الكاسيات العاريات تضامناً مع البديهات: الفساتين السوارية المجسمة، البنطلونات اللي بتدخل بصابونة، البنطلونات الاسترتش اللي فوقيها جيبات ميكروجوب، التونيكات الاسترتش، البلوزات الجيل، الجيبات اللي أصغر من مقاسنا بمقاس، البنطلونات اللوو وايست اللي بتبين ضهري كله والعضم اللي فيه كمان عشان تحتيها كاش مايوه اسم الله، المايوه الإسلامي... والعينة بينة يعني)

أنا مبلبسش شيفونات ولا هدوم بيضا تبقى مبينه جسمي من تحتيها ولا بلبس طرح تبين لون شعري وشكله.. برضه ليه؟

اصبروا ما أنا كمينج ان ذا التووك أهو (الترجمة: جايلكوا ف الكلام)

عشان الشرط التاني من شروط الحجاب: لا يشف

يا جماعة أنا باغير عليكن (أصحابي وأخواتي وزميلاتي ومعارفي اللي من بعيد وقرايبي وأخواتي في الله من كل المسلمات)

أنا باغير عليكوا من نظرات الرجالة القذرة وقلبي بيتقطع لما مكونش عارفة اخزألوهم عنيهم وانتو عارفين هما بيقولوا إيه عشان يبرروا لنفسهم: ما هيه اللي ماشية كده.. هيه عايزانا نبصلها ونعاكسها... ما أهلها ولا جوزها هما اللي ارايل ولا قرني...

أنا باغير عليكي الرجالة تنهشك بنظراتها وتبقى عارفة تفاصيل جسمك: تخينة ولا رفيعة، مزة ولا نص نص، عايزة تخسي ولا كده رضا...

أنا باغير عليكي، ازاي انتي متغرييش على نفسك وعلى جسمك...ازاي متحفظييش عليه؟

أنا مبحطش برفانات لأن "أيما امرأة خرجت متعطرة فمرت بقوم ليجدوا ريحها فهي زانية"

هتقولولي بتبالغي وهيه اللي تحط برفانات ولا ليها ف الطور ولا ف الطحين تبقى كده والعياذ بالله ده من الكبائر

هاقولكوا آآآآآآآآآآآآآآآآآآآآآآآآه وألف آآآآآآآآآآآآآآآآآآآه، الحديث واضح زي عين الشمس

سؤال يطرح نفسه؟ هيه الشمس ليها عين؟؟؟؟

من شروط الحجاب: ألا يكون معطراً أو مبخراً

ولو يا بناويت يا حلوين خايفين من اللي بالكوا فيه

والله الديودروا والرول أون وفيبكس يا عباس على قفا من يشيل

أنا مبابنينش حتة من رجلي ولا ايدي ولا رقبتي عشان زكاة عن صحتي... يعني ولا بلبس برمودا ولا شانيل ولا ¾ كم من غير معصم ولا باشمر(بتشديد الميم) ولو كان ده ف المصيف بس عشان خليكي فريش احنا ف رحلة

لأن من شروط الحجاب: أن يكون ساتراً لكل الجسم

أنا مابلبسش بنطلونات سك رجالي مفصلة جسمي ولا بدل رجالي بجواكت قصيرة زي اليونفورمات مثلاً عشان ألا يكون مشابهاً لملابس الرجال شرط خامس من شروط الحجاب

والشرط السادس بقى: ألا يكون مشابهاً لملابس الكافرات

أنا مابلبسش طرحة سبانش

انتوا عارفين إن الطرحة الاسبانش دي حجاب يهودي وانك لو جوجلتي "حجاب يهودي"، هتلاقي صورها منورة البي سي أو اللاب توب...يعني ما ألبسهاش وأقول ما أنا مغطية شعري أهوه..حد ليه عندي حاجة؟؟؟

آآآآآه لينا.. لينا عندك حاجات..لينا حقك علينا كمسلمة...الحجاب الشرعي المفروض يغطي الجيوب والجيوب دي اللي هي الصدر وطبعاً الاسبانش دي ما تسرش حبيب بس أكيد تسر العدو وتمزجه (بتشديد الميم) أوي كمان

أنا مابقولش البسي نقاب ولا خمار ولا طرحة لف كبيرة ولا شال يغطي المنطقة دي

أنا محددتش شكل معين ولا الإسلام حدد شكل معين

الإسلام اداكي الشروط- ولأن الدين يسر- خلاكي تطبقيها بالشكل اللي يتناسب مع ستايلك المفضل

وفي شرط سابع بيقول: ألا يكون ثياب شهرة

أنا بمعملش حاجة أبقى أنا بس اللي أبقى عاملاها عشان أخلي الناس تاخد بالها مني وتعلق عليا.. يعني مش أعملي فيونكة ولا شنيون كده فوق طرحتي ويبقى حجاب ولا ألبس أحمر ولا بربرق ف السعودية مثلاً وكل اللي فيها لابسين أسود X أسود

الشرط التامن: ألا يكون زينة في نفسه

أنا مالبسش عباية مثلاً كلها بربرق وبتلمع ومليانة فصوص ورسومات كأن فان جوخ مكانش فاضي إلا لعبايتي وقعد بقى اديله ادي (الترجمة: جيف هيم جيف)

وعلى فكرة بقى الألوان مفيهاش مشكلة لتفتكروا إن الأسود هو الحجاب ولا حاجة وكمان بتختلف تبع البلد اللي احنا فيها

يعني بديهي كده ملبسش أحمر ولا فوشيه وهيه كلها غربان ماشية وأبقى أنا بقى البغبغان الوحيد

وياريت برضه بلاش الألوان الفاقعة أوي دي اللي تخليكي منورة كده وسط العالم والناس... الهدوء والرقة حلوين برضه

ولأن الحجاب سلوك وسلوك إسلامي كمان، فأنا محجبة يعني أيضاً:

أنا باحترم حجابي زي ما باحترم نفسي بالضبط

أنا محجبة من بره ومن جوه لأن لو معملتش كده هيبقى عندي انفصام في الشخصية اللي بيقولوا عليه شيزوفرنيا دي وطبعاً بينطقوها زي ما بيكتبوها Schizophrenia وده غلط أكيد زي كني وكنولدج Knee and Knowledge كده لأنها بالانجليش بتتنطق اسكيتوسيفرنيا

أنا مبحطش مايكب (أو ماكياج للي ثقافتهم فرنساوي)

ملحوظة هامة: المايكب يتضمن: الليب شاين والكحل

يعني مش بس الايشادوا والماسكرا والبلاشر والباودر والرووووووووج من بتاع أنا باكل صباعين روج ف اليوم ده

عشان الزينة بتبقى قدام الزوج (وهتاخدي ثواب كبير على فكرة لأن ده من حسن تبعل المرأة لزوجها وعشان حتى يحبك أكتر ويحس إنك بتعمليله كده ليه هوه وبس وميفكرش يخلعععععععععع)والمحارم فقط لا غير

(المحارم هما مين بقى؟ هما: أبويا، عمي، خالي، ولادي، اخواتي، وكل دوول ف الرضاعة برضه، حمايا-وده لما تتجوزي فعلاً، مش وانتي لسه مخطوبة-

ابن خالي ولا عمتي مش محرم

اخوات جوزي مش محارم

اجواز خالاتي مش محارم- ومحدش يقولي يبقى اجواز عماتي عادي- الحدق يفهم يعني

وبالتالي ينطبق عليهم كل شروط الحجاب)

أنا مابصافحش (أسلم) على شباب أو رجالة بالايد أو القبل (البووس) مثلاً لأن فيه حديث بيقول: "لأن يطعن في رأس أحدكم بمخيط من حديد خير له من أن يمس امرأة لا تحل له" والله يكرمكوا محدش يقول أصلي لابسة جونتي ولا أصلي اتحرجت ومرضتش أحرجه، يلا أهو زكاة عن صحتي

أنا مش باعمل حواجبي لأن فيه حديث بيقول: "لعن الله النامصة والمتنمصة" ومحدش- وحيات أباهاتكوا- يقولي بس الكلام ده للي بيرسموا حواجبهم، أنا باضبطهم بس وباشيل الزوايد يعني مش بانمص ولا حاجة

خبر عاجل (نيوز فلاش): النمص هو شيل أي شعرة من الحاجب والزوايد دي من الحاجب نفس مش حواليه عشان محدش يتحجج بكده يعني

ولو حتى احنا بنعملهم لنفسنا بلاش كمان نعملهم لحد تاني وبلاش كل ما نشوف صحابنا نفتح كوافير خالتي تيتي ده- ربنا يهدينا جميعاً

أنا مش بتمايص وأرقق صوتي قدام الشباب عشان أقولهم إني رقيقة ولا أخليهم يعجبوا بأنوثتي اسم الله عليا وع اللي حواليا

لأن ربنا قال: "ولا تخضعن بالقول فيطمع الذي في قلبه مرض"

ولما أروح البيت ولا أكلم واحدة من صحابي النسر يطير بقى وصوتي يطلع بقى وأقولها انزلي من على وداني يا بت وترد عليا بكل تلقائية وتقولي بت اما تبتك وحمار يضرب ستك

أنا مش باسب ولا بالعن- تيييييييييييييييييييييييييييييييييييييييييت

لأن "ليس المسلم بالسباب , ولا باللعان , ولا بالفاحش ولا بالبذيء"

أنا عندي حياء

والحياء لا يتضمن الصوت العالي والتشلييييأ ورقع الضحكة بالصوت الحياني ف وسط الشارع

سؤال يطرح نفسه برضه؟

يعني ايه "الصوت الحياني"؟؟؟

معذرة أختي وصديقتي وزميلتي وقريبتي ومعرفتي ، إذا وجدت نفسك لا تفعلين كل هذا أو أياً منه، فأنت لست بمحجبة

وبما إني أحبك، حبيت أقولك يعني ايه محجبة؟ وكمان أدعيلك ربنا يهديكي وتبقي محجبة