ماي داي ويز تو كيدز

ياله من يوم عظيم

أصحو من النوم مبكراً أو ساعات متأخراً على حسب مزاجهممممما

أو مزاج نفرررر واحد منهماااا

أقوم من ع السرير أجرجر قدماي بالعافية ومش قادرة أفتح عينيا لأن منمتش كالعادة أكتر من تلات ساعات

أجري على المطبخ أجيب أشييييي (عصير أو بمعنى أصح حليب لأن بنتي متعرفش الفرق بين الحليب أو العصير... كلها علب وكلها شاليموهات وتوكلنا على الله)

وألحق ابن عبد الغفار اللي مموت نفسه من العياط

طبعاً جووووزي حبيبي اسمه مش عبد الغفار بس أطلق هذا الاسم على ابني العزيز نسبة إلى المثل العظيم

"ابن عبد الغفار ما بيتشالش من ع الاحجار"- جمع حجر بكسر الحاء

وذلك لأنه يجيله بري بري لو حطيته ف سريره أو كرسيه

فأنا مضطرة 24 ساعة ف 7 أيام- قصدي 5 ايام عشان في يومين أبوه بيبقى موجود أرميهوله شوية- ف الاسبوع أفضل شايلاه... شايلاه وأنا باطبخ وأنا باروق وأنا بلم المكعبات وأنا بانقض الغسيل وأنا بانشر وهكذا... دواليك دواليك

ومحدش يسألني يعني ايه دواليك لأني مش فاكرة

وألاقي اللولو هانم- عليا بنتي عمرها سنتين- بتعيط وتقولي باحييي- أي براعم بلغة لولو الفليبينية

أجري من اوضة النوم اللي التووو بيناموا معايا فيها على نفس السرير بفضل الله

أروح ع الليفينج أجيب الريموت من قفاه وأفتح قناة براعم

باب باب براعم باب باب براعم

وتبدأ محاولاتي المستميتة عشان أخلي الست لولو تاكل أي حاجة

فتافيت عيش على بطاطس محمرة على شوية مكرونة على قطع صغيرة من كباب الحلة أو نسايل فراخ

ولكن هيهات، فهي لا تفطن ف عالم الطعام بأكمله إلا للأشيييييييي

وسبق أن وضحنا عزيزي القارئ ترجمة هذه اللفظة ف قاموس لولو الفليبيني

أزهق... أقول طب أأكل نوس- أنس ابني وعمره 3 شهور- يمكن يجي بفايدة

وبعد ما يخلص أحاوووووول أكرعه- يعني أجشأه باللغة العربية الفصحى عشان لو فيه قراء مش مصريين خير اللهم اجعله خير

وزي ما فهمتك عزيزي القارئ بالواو الطويلة أحاول من غير ما يتكرع فعلاً- يتجشأ

فيمتو ثانية من بتوع أحمد زويل وألاقيه جايب كل اللي رضعه على كتفي أو وشي أو رجلي حسب المكان الموجه له بؤه أثناء عملية القشط- الترجيع

أجري مرة أخري أقلع- اوعى تفهمني غلط عزيزي القارئ... أنا باقلع ااااه بس بلبس حاجة تانية نضيفة بدل ناتج حادثة القشط

وأغيرله تاني سواء بامبرز بس- ودي مش دعاية على فكرة بس حالياً يطلق هذا الاسم على أي كافولة... أقصد حفاض حتى لو كان بيبي جوي أو هجيز... وطبعاً ده ف القاموس المصري فقط لا غير- أو باقي هدومه كلها

ونغير للولو كمان من نفسها ونخليها تاخد دوش بالمرة... هيصة بقى

وأجري أطفي المكيف وألفها بالفوطة وألبسها.. لبسته قلعته رقصته دلعته.. وأسرحلها الشعرتين اللي حيلتها

 ما أصدق اتكتموا شوية أطييييييير ع المطبخ أسلق الفراخ ولا أقطع اللحمة ولا أغسل الرز ولا حتى أغسلي طبقين

ألاقي نوس بيوأأوأأأ

آخد معايا البطاطس والسكينة وأهز ف الكرسي بتاعه برجلي وأقشر وأقطع ف نفس ذات الوقت

أخلص أو حتى قبل ما أخلص أشيل وأحضن وأطبطب ف ابن عبد الغفار

أجري أحط الرز وهو ونصيبه بقى يا يطلع كويس أو نوس يعيط ويتنيل يتحرق

وأنا ف المطبخ أسمع صوت طاخ دب أجرررري

يا ألاقي لولو وقعت أنس من ع الكرسي أو كسرت كوباية الأشي

أزعقلها شوية

وتزغرلي وتقولي هش

وأجري أنقذ الواد أو ألم الازاز وأكنس بالمكنسة عشان ميدخلش ف رجلها

وأمسح الأرض

واغسلي يا أروووبة... نضفي يا أرووبة

يتصبب العرق من وشي وايدي ورجلي وشعري

أجلس لأستريح

 أفتح الواتس اب قليلاً أرغي مع اخواتي أو أكلم أمي ع السكايب

أفتكر وأنا باكلمها إن الولد هدومه كلها اتوسخت

أسيبلها العيال شوية تكلمهم وتلاغيهم عقبال ما أحط الغسيل ف الغسالة

الساعة بقت خمسة ونص... اليوم خلص

اخس عليك والنبي يا حظمبل... سيبه يقولي حكاية البلبل

أفتكر إني مافطرتش؟؟؟

أجري أعملي ساندوتش نوتيلا مع موزة وكوباية حليب- فطار مغذي متكامل

-          هل لاحظت عزيزي القارئ كم مرة ذكرت كلمة "أجري" في ما سبق؟

وزي ما ثلاثي أضواء المسرح قالوا: " وجريت من الحارة إلى الشارع والخ الخ... أطلع من نقرة لدحضيرة ومن فخ لفخ"

أجري من اوضة النوم للمطبخ لليفينج للحمام لاوضة اللعب للمطبخ... ماراثون ف الشقة

لولو تقولي بابعبي- أي العبي... أو عايزة ألعب بلغة لولو السيرلانكية

أروح معاها عند الزحليقة والمرجيحة والبطة- عربية على شكل بطة- أتفرج وأشجعها

لولوووو لووولوووو اوووه اووووه

واحد اتنين تلاتة

أفتح كتاب وأبدأ أقرى يدوب أخلص صفحة.. صفحة ونص أغفل وأسقط- بتسكين الفاء وتشديد القاف

توقظني صيحات لولو بااااباااااااا أول ما تسمع صوت المفتاح ف الباب

أجري عليه أقوله خد عيالك شوية تعبت طهقت زهقت

يقولي وأنا تعبان قرفان حراااان

آخدهم تاني وخيبة الأمل راكبة جمل أغرف الأكل

وسبعي يلمه بعد ما نخلص

واحنا بناكل أحاول أتفرج على بيلا كالاميداديس أو سي اس آي ولولو تزغرلي وتقولي بااااحييي

أسقط... بتشديد القاف

ايه ده؟ افتكرتوا إني نمت... لأ طبعاً

مع لولو ونوس مش هتقدر تغمض عينيك

سبعي بعلي راجلي يدخل ياكل رز مع الملايكة في جزيرة القطن من الساعة تسعة

انت تقوم وتمشي وأنا أسهر منمشي ليلة يا حبيبي

ع الساعة واحدة كده

أستلقي ف السرير ابني ف حضني وبنتي جنبي بتلعب ف تليفوني

أحاول أن أقرالي أي حاجة مفيدة على ضوء المصباح

ثواني وألاقي الكشاف مرمي ع الأرض بجوار الكتاب

بنتي نايمة على كتفي وابني نايم ف حجري

وسكتت شهرزاد عن الكلام المباح وباين أدركت الصباح

اليوم خلص... اخس عليك والنبي يا حظمبل