وانت بقي يا بني آدم عايز منها ايه؟

وانت بقي يا بني آدم عايز منها ايه؟

طبعاً باينة زي عين الشمس إن دي سيكوال أو تابعة للي قبلها مراتك عايزة منك ايه يا بني آدم

وبما إني أكيد هبقى متحيزة عشان بنات جنسي طبعاً

بس هاحاول على قد ما أقدر إني مكونش شريرة وآجي ف صفكوا شوية

مش لدرجة طويل العمر يطول عمره ينصره على مين يعاديه

هاي هييييئ

بس اهو ادينا هنحاول

بني آدم عايز ايه بقى:

1- عايزك تكوني أمه وعارفة مش عارف ليه باتونس بيكي وكأنك من دمي على راحتي معاكي وكأنك أمي... وتعامليه زي الطفل تمام.. وطبعاً فميش داعي أفكرك عزيزتي حواء- حلوة عزيزتي حواء دي تحسسك إني هاتكلم عن ماسك ولاحمام كريم- أفكرك بايه بقى؟ إن كل برامج السعادة الزوجية تقولك- يعرفني منين عشان يقولي- الرجل طفل كبير.. تغسليله الشرابات الملونة لوحدها والبيضه لوحدها.. وتعمليله السنوتشات وهو رايح الشغل.. وتنيميه.. وتغطيه لياخد برد.. ويبقى أهم حاجة عندك الأكل.. أني فتفوتة والعيال فتفوتة والباقي لأبو العلا.. مين بقى أبو العلا ده جوزك يا حبيبتي..وتقوليله كل.. انت خاسس يا حبيبي.. دي مش أكلتك يا عمو؟..شكلك هفتان يا عين أمك.. وحسك عينك تحسسيه إن ابنك/ بنتك أهم منه عشان الحساسية طبعاً اللي أنا وانتي عارفينها وحافظينها زي اسمنا كده فتلاقيه جاي يقولك: آآآآآآآآآآه ما هو أهم مني وساعتها هيكرهك انتي وابنك كأنك جايباه مع جهاز العروسة كده

2- عايزك رقيقة وصوتك ميطلعش لأن لو صوتك علي عليه عشان أي سبب هتبقي قليلة الأدب وعايزة قعدة.. ولا تقوليلي ما همو عمر بن الخطاب مراته كانت بتعليه صوتها عليه وكان بيستحملها.. مات عمر... الله يرحمه بقى..معدش فيه من الصنف ده ف كارفور... فهمتي يا حلوة... هو ديمقراطي.. عايزة تزعقي زعقي ف سرك.. أصلك لو دخلتي قوضة تانية وزعقتي هتبقي بتبرطمي وهتاخدي على وشك

3- عايزك شيك وستايلش عشان يتباهى بيكي قدام الناس

4- عايزك تداري أم رقبتك اللي بتبان لما الهوا يطير الايشارب بتاعك واللي لاعبتها كل اللعب وربط كل الدبابيس ومفيش أمل.. يلا اهو زكاة عن صحتك

5- عايزك ريحتك مسك وعنبر- ولو إن المسك ده ريحته رخمة أوي- خليها فل وياسمين وشانيل وجادوور طووووووول الوقت واطلعي بقى من المطبخ يا أمي خدي شاور واتبرفني عشان ميشمش منك إلا أطيب ريح ولا تقع عينه على قبيح على رأي الخنساء في وصية أم لابنتها

6- عايزك تحملي وتولدي كل سنة مرة مهو مش تعبان ف حاجة ولا هتخليه هو اللي يولد... ولما تولدي تطلعي من الولادة مشدودة البطن رشيقة القوام.. ولا أجدع ممثلة أجنبية تجيب توأم وتصور مع عيالها الاتنين بعدها بشر وكأنها أنسة أصلاً ودول اخواتها

7- عايزك سوبر ستار ولا ديفا تصحي من صباحة ربنا تغسلي سنانك وتسرحي شعرك وتتمكيجي وتعملي نفسك نايمة لحد ما يصحى من النوم يلاقي صاروخ نايمة جنبه ... طبعاً الكلام ده تهريج.. بس لو ف ايديك تصحي قبله وتسرحي شعرك ع الأقل عشان ميلاقيش شيتا جنبه يا حبيبتي.. ده غير اللبس بقى... عزيزتي حواء: أرجوكي انسي الجلابية ولو عندك جلالايب اخفيها ف الدولاب أو وزعيها.. فإن الرجل لا يحب أن يرى امرأته مثل الشوال المتحرك.. البسي حاجة تظهر جمالك

8- تقومي ياللي تنشكي ف بطنك تعمليله فطار ولا شندوتشات ياخدها معاه الشغل عشان يقولك انتي زي الفل يا جيرمين

9- تفضلي طبعاً صاحية بعدها تشتغلي ف البيت تحضري الغدا بس تنامي لأ حكم الايد البطالة نجسة... ومواعيد نومكوا تبقى مع بعض وتقدري تقومي تصحيه الصبح... وطبعاً متدلقيش عليه ميه.. دلعيه وانت بتصحيه.. اصحى يا حبيبي اصحي يا عينيا وتكلميه بصوت واطي متجعريش ولو مصحيش ان شا الله عنه ما راح الشغل.. وقضوها داي اوف وظبطوا بس عزيزتي حواء لا تستغني عن رقتك وصوتك المسهوك أبداً

10- يجي من الشغل يلاقيكي مخلصة الأكل ومش بعيد تكوني حاطاه ع السفرة وتقابليه بابتسامة وتجري عليه عشان يشيلك ويلف بيكي شوية... ولو كنت تخنتي شوية مش مشكلة الرجالة عصب وبعدين حد قاله يخليكي تحملي وتولدي وترضعي.. وتقوليله وحشتني يا سيدي وتاج راسي... البيت وحش من غيرك

11- أهم حاجة تبقي ماسكة ف نفسك.. مش لازم تبقي باكينااااا ... وإلا سبعك هيحس إنك شخصية فيبراتيد-مهزوزة يعني- وساعتها بقى يا أختشي ممكن يلعب بديله

12- حسك عينك تحكيله عن كلامك مع صحابك أو تعامل واحدة فيهم مع جوزها.. ممكن الشيطان يوزه ويقولك يا عيني عليا وعلى بختي ماصاحبتها فيها وفيها.. و ف وسط الخناقة يرزعك الكلمة ويقولك: ده انت حتى مش بتعملي زي فلانة واهي صاحبتك اهو مش جايبه من بره

13- عايزك تثقي فيه.. يعني بلاش الجنونة تركبك لما يتأخر شوية وتقوليله كنت فين يا سبع البرمبة وشايف الساعة كام ف ايدك بس لو اتأخر أوي اتصلي بصحابه ولو مجاش للصبح اتصلي بالبوليس.. هتشرشحيه قدام الناس بس هيشيلهالك ويقول دي بتحبني وبتقلق عليا... الثقة مهمة جداً ف الجواز.. مش أي واحدة تكلمه ف الشغل تنكدي عليه عيشته وانت شايفها أحلى مني والأفلام دي.. متنسيش الثقة ف نفسك اللي قولتلك عليها.. كبري دماغك بس خليه ياخد باله انك مش بتحبيه يقرب من أي حد غيرك.. ولما تشوفي البت دي بقى طلعي اللي جابوها وقوليلها لو قربتي من جوزي هافقعلك عين

14- عايزك تثقي ف إنه راجل ملو هدومه قدها وقدود... احنا عارفين ان الستات بتفكر أحسن ومخها وقوة تحملها أكبر.. بس متبقيش هبلة زي لينيت اللي ف ديسبرات هاوسوايفز وعلى طول تحسسيه إنه مبيعرفش يفكر وإنك أحسن منه ولو معملش اللي انتي بتقولي عليه يبقى أهبل وإن أمه داعياله إنه أخد واحدة زيك.. انقليله رأيك من تحت لتحت كأنه طالع منه

15- عايزك متشتريش أي حاجة ولا تدفعي فلوس ف حاجة مانتي مش تعبانة ف حاجة.. مش حاسة بقيمة القرش.. لأ لألأ مش كده.. خلينا نكون فير.. هو عايزك متشتريش حاجة ملهاش لازمة.. ودايماً تختاري التوقيت الصح للشرا والشوبينج.. يعني أول الشهر مش آخره.. وبترتيب الأولويات.. يعني اللي يحتاجة البيت يحرم ع الجامع

16- عايزك مثقفة مش بطيخة... اعدي اتفرجي ع الأخبار قبل ما يجي ب 10 دقايق كده وقوليله أخر الأنباء بعد الأكل بنص ساعة... واتكلمي معاه ف السياسة والاقتصاد واسمعي عن شغله حتى لو ملكيش فيه وحاولي تعرفي وتتعلمي.. ولما تلاقي وقت فاضي بعد ماتتفرجي ع المسلسلات الأجنبية والتركية والمصرية، اقريلك جرنان ولا صفحتين من كتاب.. خلي عقلك على طوول صاحي.. مش يبقى آخر كتاب قريتيه ف الجامعة

17- عايزك ودودة بتودي أهله وتعصري على نفسك وتسألي عليهم

18- عايزك كريمة بتكرمي صحابه لما بيعزهم ف البيت وتعمليلهم المحمر والمشمر واطبخي يا جارية كلف يا سيدي

19- لازم طبعاً تكوني طباخة ماهرة.. لأن قلب الرجل في كرشه-أقصد معدته ليزعلوا مننا يا بنات-... وست بيت شاطرة ولو مش خدمة 7 نجوم ف برج العرب.. يبقى أضعف الايمان خدمة 5 نجوم ف الهيلتون.. ومبدئياً مش عايزة أي اعتراضات من الرجالة لأني مشفتش راجل ف حياتي مش عايز بيته فلة شمعة منورة وعايز مراته تغسل وتكوي وتمسح وتكنس وترتب السرير وتنفض وتعمل المواعين وتطبخ و و و و

20- عايزك تربي العيال كويس وتاخدي بالك من مذاكرتهم عشان توفروا ف الدروس الخصوصية ولو حتى بتدوا دروس عايزك تعدي على راسهم عشان يخلصوا مذاكرة وميسهوكيش ويلعبوا بلاي استاشين

21- عايزك حنينة عليه ولو جاي مضايق من الشغل واتعصب عليكي متولعيهاش انتي كمان.. خديه ف حضنك ونيميه على صدرك وطبطبي عليه وقوليله يلا احكيلي ايه اللي مضايقك.. ده طبعاً في حالة إنه كل خلاص بالهنا والشفا.. والعيال نايمة أو مسرباهم

22- عايزك ظريفة ودمك خفيف ولو مش بتعرفي تهزري اضحكي على نكته البايخة

23- عايزك تبطلي نكد ومتنكديش عليه ومجبتش ومعملتش... ومتتخانقيش... مش هاقدر أقولك متزنيش لأن يا أختشي الزن ع الودان أمر من السحر وشغال مع الرجالة زي الفل ومبيجوش إلا بكده

24- عايزك تدلعيه وترقصيله وتستخدمي خيالك ف كل حاجة.. تكوني مبدعة في تدليله واسعاده

25- عايزك تشاركيه اهتماماته وتتفرجي على أم الماتشات اللي بيتفرج عليها ان شا الله يكون ماتش ريال مدريد وبرشلونة وتشجعي مانشيستر يونايتيد... وتديله وقته اللي يمارس فيه هواياته ويخرج يلعب كورة مع صحابه أو يلعب تنس أو يعدوا على قهوة... وفكك من الضيق ونزل وسابني ومش عايز يعد معايا.. ريحي أعصابك وخدي شاور واتشيكي واستنيه على ما يجي..

26- عايزك تتقبليه ومسألة العيوب دي مسألة نسبية بس تقبليه بعيوبه وده اللي كنت باتكلم عليه ف الأمريكان.. خديه باكيدج.. واحد بيحب الكورة اللي يضايقك ف كده..واحد بيحب عمرو دياب وانتي بتحبي كاظم ايه المشكلة.. لولا اختلاف الآراء لبارت السلع... يحب اللي يحبه وتحبي اللي تحبيه.. ليه تأثري عليه؟ سيبيه براحته.. متخنقيش عليه..لكم دينكم ولي دين

27- عايزك تحترميه ومتهزقيهوش ولا بينك وبينه ولا قدام الناس.. مع العلم إن قدام الناس اديله احترام زياده حبتين.. بس مش لدرجة يا أبو حسين ويا أم سناء..

28- عايزك تعرفيه قيمته عندك وتاخدي رأيه ف أمورك واختياراتك الشخصية وتقوليله يا سبعي يا سندي يا مهنيني.. أعيش من غيرك ازاي ياخويا.. ده انت الهوا اللي بتنفسه و و

29- عايزك تخافي عليه وعلى صحته وعلى رزقه يكون حلال أو حرام وتدعيله بالتوفيق والرزق ويارب افتحها ف وشك يارب ويباركلك ف رزقك.. يبقى قلبك عليه.. وتحافظي على بيتك وعلى نفسك وتصوني شرفه فيكي وف بناتك

30- عايزك متلوكيش مع صحابك عنكوا ولا علاقتكوا مش بحجة الحسد كفا الله الشر بس بحجة إنه مبيحكيش حاجة لصحابه.. بس هو ميعرفش إن بيجري ف دم البنات كور حمرا وبيضا ورغي.. بدليل إني مش قادرة أخلص كلام لحد دلوقتي

Being American

Being American

Is being American as bad as it seems?

In this piece, I am not talking about being American by nationality or residence in the USA

I am talking about the normalization; that you can be Egyptian or Arab in general, and you live like Americans in your own country.

All my life, I have been watching American movies and TV shows, reading books written and printed in the USA, and chatting with American people.

You can simply say that I have been indulging myself, or to be more accurate; acting as a sponge absorbing everything has to do with the American culture.

If I had the remote control, I almost won’t take my fingers away from MBC channels or Fox channels

If I had an internet access, I navigate online American shows n websites

It has a great deal with me; a fluent speaker of English...You can say I am so good and for my own condolence that I am not totally wasting my time taking in all this amount of American culture, is that I sometimes take my finger up or down to Huda TV and BBC News.

Being American teaches you how to accept one another, no matter what differences you have!

Americans embrace homosexuals, (although I know I might be endangering myself to an enormous attack by the religious people I know in person, and those who I don’t know)

My point is that they accept any difference even if it is personally appalling or not acceptable for their complex of principals.

I accept my friends, my husband, and my family members for the way they are; that’s their defining criteria... it is not my business to object or ask them to change their habits or characters for my own sake… for example, I would not ask a friend to stop listening to a certain type of music; like Metallica just because they are not my type… it is her taste, she is free to listen to whom she likes unless it is not affecting me in person that the music is too loud or something n it is hurting my ears

Being American makes you simple, deletes the complication n sophistication in your life… you don’t have to wax your whole body hurting yourself for the quest of perfection n eternal beauty… you can simply shave :D

Americans are not after perfection like the Europeans, driven from the Latin culture n obviously applied in France with their perfect body figures n table manners or in Italy with their perfect recipes for pizza n pasta.

No one is perfect n they accept that fact quite well.

Being American tells you how to enjoy your life, despite your busy schedule or your time-consuming career…

If you’re bored, overwhelmed with work, exhausted, depressed, you have only one thing to do:

Prep for a trip!

I really think that these people have a great know-how of getting the best use of their time in order to find their own pleasure or entertainment

Try Oprah!

Not only trips (just because it is my favorite, it does not mean they are out of ideas)

You can take a class; dance, cooking, learning a new language, or yoga

I wish that these ideas are applied in Egypt n one day you may find a class of cooking or belly dancing in your neighborhood n they are not hard/ rare to find anymore

What do we actually copy from Americans?

Not the good aspects of course!

We took:

Junk food n over-weight problems: Due to the high carbs found in such food like potato chips, mayonnaise, hot dogs, burgers, coke

Having a boyfriend/girlfriend: as if this is what ‘being cool’ is about, even people are no longer disgusted if they see a couple hugging or touching in public

Worst dressing styles ever: which they don’t even use anymore; low-waist pants, shredded skirts, tight T-shirts for men (that I guess were made by a gay guy to check out others lbs), tight everything else for girls

Why?

Can anyone tell me why?

Why are we so blindly prejudiced to use that culture in our own contexts for our own good?

I refuse

I reject

I despise

Anyone who tells me that I am stupid letting myself be normalized or I am so influenced by the Americans n their culture n life style that I don’t even see the beauty of my Islam or my Arabic culture

For those I say; don’t worry! My Arabian Islamic character is doing just fine n my identity is in my heart I don’t have to look for it

For God’s sake, I am twenty-four

I can judge

I can tell what’s right or wrong

I can differentiate between what’s good n bad

And so, I am CHOOSING what’s good for me whether it is from the American culture or my own culture

If you please, accept me for who I am n for what I believe inIf you please, accept me for who I am n for what I believe in

مراتك عايزة منك ايه يا بني آدم؟

مراتك عايزة منك ايه يا بني آدم؟

عشان محدش يقول اني باسرق الأفكار ولا حاجة كفا الله الشر

لسه قاريه حاجة ع الفيسبوك بعنوان : هذا ما تريده منك المرأة يا آدم

وبما اننا مش بنكلم آدم لأن آدم أصلاً مش موجود وأنا ماحبش أجيب سيرة حد

وأساساً موضوع آدم وحوا ده كليشيه أوي وكل ما نفتح الحنفية نلاقي حد بيتكلم عن الرجل والمرأة على انهم آدم وحوا

واللي يقولك حوا اتخلقت من ضلع آدم عشان تبقى قريبة من قلبه ويبقى حنين عليها

ونص اللي بيخلفوا عايزين يسموا عيالهم آدم وحوا

ويسلام بقى لو واحدة جابت آدم وصاحبتها جابت حوا

واتجوزوا وخلفوا وعاشوا ف تبات ونبات وخلفوا صبيان وبنات

ويجي آدم يطلع عين حوا ونكتبله مقالة طويلة عريضة نقوله: ماذا تريد منك حوا يا آدم؟

يلا كفاية رغي كده وأقولك بقى يا بني آدم مراتك عايزة منك ايه؟

1- عايزاك حنين أوي عليها ولا تحب تشوف دموعها

2- بس لو عيطت، متقولهاش اسكتي بس احضنها وطبطب عليها وقولها دموعك غالية عليا.. مش بنطلب كتير يعني ولا حاجة.. يعني ولا قلتلك دمع ولا عيط ولا ابقى سيد العاطفي ولا وريها دموع المرأة المكسيكية

3- عايزاك رقيق وجانتي وده بقى مش كليشيه دي حقيقة علمية... خليك حمش بره البيت.. سبع البرمبة قدام صحابك.. هولاكو ف شغلك.. إنما رقيق مع مراتك.. نصك الحلو - آه حلو غصب عنك عشانك مهما كنت أمور وصاروخ مراتك دي بقى البونبوناية – وأكيد يعني بنباهتك الرقة مش هتنقص من رجولتك ولا شخصيتك القوية اسم الله.. دي هتزيد منها.. كلامك يبقى ذوق ومفيش مانع من يا حبيبتي ويا روحي ويا قلبي... مهي كلها رقة والبنات بتحب السهوكة دي... خدها مني نصيحة

4- لو زعلتها ولا اتحانقتوا متسيبهاش وتمشي ولا تقولها محتاج اعد شوية مع نفسي...تعد مع نفسك ليه ياخويا ماتعد معاها.. قلها أنا أسف... مش صعبة.. 3 حروف بس .. أ..س..ف...

5- حل مشاكلك بالذوق مش بالتجريح وده حقي وانتي عملتي وسويتي.. فوت.. وقووول ماهي برضه بتعملي وتسويلي...بص لنص الكوباية المليان

6- اضحك معاها وهزر واستظرف ... مش لازم ماتسمعش ضحكتك وقهقهتك مع صحابك بس... خفة الدم والفنفنة (جاية من كلمة fun بالانجليزية) مبتطلعش إلا مع الصحاب.. والبوز وتعبان ومش قادر لمراتك بس

7- جدد ف حياتك معاها.. بلاش كآبة... اعملوا جلابية بارتي ف البيت وارقص معاها بلدي.. مش هتقولك من رقص نقص.. اطلعوا رحلات وروحوا مكان رومانسي فيه بيتش.. اتعشوا بره...

8- قرب منها وقرب من اهتماماتها واشاركها فيها مش لازم تكون بتحبها انت كمان بس ده هيقربكوا من بعض جداً وخليك واثق ميه ف الميه انك لو عملت كده هتلاقيها بتعمل زيك بالظبط وتتفرج معاك على ماتش كوورة مثلاً

9- تقبلها وتقبل شخصيتها زي ما هي ومتحاولش تغير فيها حاجة أكيد هي جميلة برضه مش لازم تبقى كربونة منك عشان تبقى شخصية كويسة.... تقبل عيوبها وتتلككلهاش ع الفاضية والمليانة... خدها باكيدج زي ما هي... واوعى تفتكر ان فيه إنسان كامل.. ولا انت كامل.. ولا مراية الحب عميا فهي مش شايفة عيوبك.. لأ هي شايفاها وحافظاها كمان بس متغاضية عنها.. تغاضى بقى انت كمان.. مش لازم تبقى ع الفرازة.. دور ع الحاجات الحلوة والمميزات اللي فيها اللي تخليك تتناسى عيوبها مش تنساها وفيه فرق شاسع بين الكلمتين واحدة بمزاجك والتانية غصب عنك

10- وانت رايح الشغل الصبح قامت عملتلك فطار بوس ايدها وقلها ربنا يخليكي ليا معملتش بقى متبقاش بنت تييييييييت ممكن تكون كانت سهرانة مع عيالك ولا بتروق ف البيت صحيها من النوم وبوسها وقلها هاشتقالك يا حبيبتي... مانتا مش هتكدب ما المفروض ان مراتك هي حبيبتك

11- وانت ف الشغل ف البريك يا سيدي مش ف زحمة الشغل يعني مش هنتقل عليك ابعتلها مسج قلها وحشتيني يومك عامل ايه؟ مش عايزة ايه من بره – ولو انك تشكر برضه ع السؤال

12- تيجي من الشغل عليها طوااااااااالي.. مش ع المطبخ تشوف عملت أكل ايه النهاردة وخلصت الأكل ولا لسه... خدها ف حضنك وقلها اشتقتلك وكنت بافكر فيكي طول النهار

13- مش لازم وحيات أبوك تلاقي الأكل ع السفرة يعني مهي مش رووم سيرفيس ف برج العرب سبع نجوم و24 ساعة ف اليوم- تويني فور سيفن... ايه المشكلة يعني لما تدخل المطبخ تحضر معاها باقي الأكل أو السلطة أو تحط الأطباق ع السفرة هيحصلك ايه يعني هتنشك ف بطنك؟ مهي طبختلك.. بركة.. تشكر(بضم التاء).. لو عليها مش هتطبخ أصلاً ما الدنيا حر.. والعيال كانوا قرفينها طول النهار... والبصل خلص (بتشديد اللام) على عينيها ودموعها.. والتوم ريحته ملت ضوافرها اللي كانت عامللها باديكيير ومانييكر طول مهي ف بيت أبوها.. وايديها اتهرت من غسيل المواعين... ومخها ضرب من كتر مهي بتلملم من وراك كوبايات تحت ترابيزة المكوة وف الانتريه وقدام اللاب وف الحمام كمان...

14- ولما تاكل يا حبيبي بالهنا والشفا قلها تسلم ايدك يا حبيبتي حتى لو مكانش أكلها حلو- مع أن أنا أكلي حلو بس مابسمعش حاجة ولازم أسأل والإجابة بتكون آه جميل- أنا مش عايزة أخلي الموضوع ديني وأقولك ربنا وقال الله وقال الرسول بس والله الشرع كمان بيقول الكلمة الطيبة صدقة وحاجات من هذا القبيل بمعنى اشكر اللي يخدمك.. ده لو كنت ف مطعم والجرسون جابلك الأكل بتقوله ثانك يو وميرسي وشكراً جزيلاً على حسب ثقافتك وثقافته

15- ساعدها ف البيت وبيتهيألي إن الرسول كان يخصف نعله ويخيط ثوبه ويعمل في بيته.. اكوي هدومك مش المفروض إنها غسالة وطباخة وشغالة اغسلي يا أروبة نضفي يا أروبة وكمان لوندري...لأ واجباري اللي يجوز ده ينزل ف الفور سيزونز على طول ولا مراته تتعب ولا تكون مش ست بيت أوي ولا الكلام الفارغ ده... ولما هي مش ست بيت اتجوزت ليه.. وهي وراها ايه؟ أنا باتعب طول النهار وهي قاعدة ف التكييف تشيت مع صحابها وتتفرج ع التيلفزيون.. المرأة خلقت أماً بالفطرة وست بيت تعرف شغل البيت وتربي عيالها.. ولو اشتكى منها محدش هيلومه.. مهي رغوجية اوتوماتيك مبتفصلش.. بس الرحمة يا أخي... فوتلها واعمل انت.. جرب بس... مش هيخس عليك حاجة... اكنس البيت مرة.. اكنس بالمكنسة يا سيدي معدش حد بيكنس بالمقشة يعني مش هتتعب والنعمة

16- اخدمها.. حضرلها الفطار... اعملها شاي أو نسكافيه..جرب تبقى انت الرووم سيرفس شوية..اشمعنى يعني ف الأفلام يجيبوا العريس جايب الفطار لعروسته ف السرير ويقولها محبتش أتعبك.. ولا ده باين اكمنهم ف الهني موون.. أو عشان يقولها عايزك كل يوم تعمليلي كده

17- دلعها ولو مكنتش انت تدلعني مين هيدلعني على رأي حكيم – حكيم المطرب الشعبي اللذيذ مش حكيم زمانه يعني- قلها حتى يا مهجة القلب يا حبيبتي يا حياتي يا نونة يا بطة يا وزة يا توتو يا سوسو يا ميمي يا عم بطوط.. دلعها هتتدلع.. نتيجة حتمية

18- حسسها انها طفلة وفرح قلبها على طول بهدية مثلاً.. مش حاجة غالية لتقوقلوا عليا مفترية.. والله ممكن علبة شوكولا- ف حالتي أنا ممكن شوكولاتة مارس أو ميرسي- ومتتريقش عليها لو كان نفسها ف غزل البنات مثلاً وتقولها بقى احنا كبرنا ع الحاجات دي يا نوال...

19- سمعها وغنيلها ودندنلها اللي تحبه يا باشا- ماقصدش طبعاً الأغاني ف حد ذاتها- الستات ودنية (بفتح الدال) بتحب تسمع.. تسمع كلام حلو وكلام حب... هتقولي منا بحبش السهوكة.. هاقولك وانت مش بتحبها؟ تقولي طب مهي عارفة.... أقولك لأ بقى يا حبيبي في فرق رهيب بين المعرفة والاحساس.. عبر عن حبك.. عبر مين قدك

20- تغنى بكل تفاصيلها ودي حاجة أنا غاشاها من النوت للي قلتلكوا عليها ف الأول... يعني مش انت حلوة بس... لأ...عينيكي سحراني.. انت رقيقة أوي... ريحة شعرك حلوة أوي النهاردة.. انتي مانجة انتي أناناس انتي مشمش انتي خوخ.. لمستك حنينة.. و و و و و ... وانت أدرى بقى يا معلم

21- شغلها أغنية هادية مثلاً أو موسيقى بس لو معترض ع الغناء والغناء حرام وكده وقومها من مكانها وارقص معاها وضمها أوي وقلها ف ودنها أنا بحبك ومقدرش أعيش من غيرك.. ومش باقولك اطفي النور وولعلها شمع ليل ونهار بس من فترة للتانية حسسها انك لسه بتعشقها.. متخليش روتين الجواز يخسرك حبك

22- اخرج معاها وايدك ف ايدها ومتقولهاش ده شغل عيال ولا عيب الناس يا سعييييييييد... وأنا باقولك حاجة قليلة الأدب يا حاج... دي مسكة ايد حوبيكوا حوبي مش حاجة عيب لا سمح الله

23- اتسوق معاها- اعمل شوبينج يعني- ومتبقاش حامل هم الفلوس لأ البلوزة دي وحشة عشان ب 200 جنيه ولا يلا زهقت وتعبت من اللف- حقيقة علمية: كل الستات بتلف كتييييييير عشان ترسى على حاجة عجبتها- ولا تقولها يلا نروح عايز أنام عشان عندي شغل بدري وبين لها انك مهتم باللي هي بتنقيه مش يلا نقي عشان نخلص

24- كن كريماً وصادقاً تجد الحياة جميلة وآخر فرفشة.... الست تكره الراجل البخيل والراجل الكداب... كريم ف أقوالك وأحاسيسك وأفعالك.. بتديها مش بتاخد بس وكل ماهاتدي كل ما هتاخد.. متقولهاش أي كلام فاضي معقول.. انت القمر وانت النجوم... وصلها احساسك بصدق مش بنصب اكمني قلتلك الستات ودنية فتاخدني وتاخدها على قد عقلها مهو يا حبيبي الستات مش هبلة برضه.. وتقدر تعرف امتى بتجامل وامتى بتمثل وامتى اللي بتقولهولها ده طالع من قلبك ولا لأ

25- احترمها وخد رأيها ف كل أمور حياتك ومش معنى كده إنك ترهقها بالتفكير.. انت راجل البيت برضه متنساش.. وتباهى بيها قدام أهلك وصحابك بس مش كتير عشان الحسد... ومتفهش من رأيها أو احساسها أو رغباتها.. يعني بلاش هبل.. بلاش تقولها بلاش هبل يا عاقل يا راسي.. مش عاجبك كلامها ابتسم وقولها بس أنا عندي رأي تاني أو أو أو

26- قدر قدر قدر... وهاكتبهالك ناون كمان عشان تعرف أهميتها... التقدير التقدير التقدير... قدر كل اللي بتعمله عشانك حتى لو كان من أبسط ما يكون... ومتجرحاش عشان قصرت ف حاجة... خلي قلبك كبير وقولها أنا عارف انك تعبانة.. احرجها بذوقك يا نبيه.. هتاخد عينيها وقلبها وكيانها كله... حسسها بقيمتها عندك وقد ايه هي غالية عليك ووجودها يفرق ف حياتك... حاول تتخيل بعدها عنك... دايماً كل ماتحس إنها بقت عادي ده العادي وده واجب عليها وهي مبتدنيش أكتر من حقي.. تخيل إنها مش موجودة هتعمل ايه ف حياتك؟ هتحتاس يا معلم... تخيل بس، هتقدرها وتعرف قيمتها وتبوس ايدها رايح جاي عشان بتكرمك وبتشيل عنك...

27- وأخيراً، خلقت حوا من ضلع آدم- نرجع بقى للكيليشهات- فكن رحيماً بها... ارحموا من ف الأرض يرحمكم من ف السماااااااااااااء أبوس ايدكم وأيادي أبهاتكوا

فهمت بقى يا بني آدم؟؟؟؟