شنطتييييييي
شنطتييييي... دي حيااااااااااتي
وفيييييها أكتررر أشيااااائي
-
مع
الاعتذار لأحمد سعد... لأن أكيد شنطتي مش زي منطقتي وفيها أجمل ذكرياتي
دايماً بيتريقوا على شنط البنات وازاي مليانة حاجات زي سوق الكانتو
أنا بقى مامتي العزيزة بتسمي شنطتي المخلة
ومع إني أصلاً مش متأكدة من الاسبيلينج بتاعها
تعريف المخلة:
كل اللي أعرفه إنها باين بتاعت العساكر وبيحطوا فيها مولد يا دنيا
استعنا ع الشقى بالله
يلا يا اخوانا نفتح الشنطة ونجردها مع بعض
عارفين جرد الانفينتوري اللي بتعمله المصانع
هوه ده بالظبط
1-
نوت بوك
يبظ منها 20 ورقة غالباً باجردهم كل اسبوعين تلاتة أشوف هما ايه.... في معظم
الأوقات تشمل هذه الأوراق: ريسيتس (وصولات من الشوبينج اللي باعمله)، روشتات، ورق
حسابات مصاريف، ليستيت مشتريات لسه هنشتريها من الماركت، ورق اعلانات... بعض من
هذا القبيل
2-
السوستة
الصغيرة بيبقى محشوووور فيها: قلم كحل، ليب لاينر- مع إني مبستخدموش وأنا خارجة
أبداً... ده كان سي أحمد يقطعني- ، ليب شاين، ماسكارا، مراية من اللي بيتفتحوا
دوول- بس أنا معايا النص اللي فيه المراية بس والغطا ضاع-، الفلوس المستخبية من
مبدأ لا تضع البيض في سلة واحدة، البطاقة والرخصة وكارت الايه تي ام- ده لو مش
شايلة المحفظة معايا-، قصافة ومقص صغير- ومحدش يسألني ليه؟-، فلاشة، علبة كريم
نيفيا صغيرة الحجم.... تخيل معي- عزيزي القارئ- لو كنت شايلة شنطة من غير سوستة من
جوه.... كل ده هتلاقيه ملقى في أرضية الشنطة مع اخواته من الحاجات... وآجي أدور
على على حاجة أقول: أيننننننن أشيااااائي؟
3-
أكياس
مناديل فلورا
4-
ازازة
برفان
5-
مروحة من
اللي بيتباعوا ف المترو دوول عشان أنا مبستحملش الحر
6-
نظارتي
الشمسية وقبل ما أعمل الليزك كان بيبقى في جراب نظارتي النظرية- أقصد بتاعت النظر
7-
بنادول
أو كيتوفان وبسكوبان وكيناكومب وشوية بلاستر.. صيدلية الطوارئ
8-
اولويز
احتياطي
9-
خيط من
غير ابرة عشان لو ملحقتش أظبط وشي قبل ما أنزل
10-
أقلام
11-
موبايلي،
ام بي ثريهي، هاند فري أو سماعة الام بي ثري
12-
فيبيكس
13-
هاند
سانيتيزر- ديتول
14-
مناديل
مبللة معطرة- ودي غير الوايبس بتاعت العيال
15-
ميدالية
مفاتيحي
16-
محفظتي:
وتشمل بعض الفلوس- مش كتير من نفس مبدأ البيض والسلة الواحدة- وكمان الفلوس الفكة
مبينفعش تتحط ف المحفظة من ساعة ما الحكومة بلتنا بالعملات المعدنية- جتها نيلة..،
كروووووووت كتييييييرة وبطاقتي بقى ورخصتي- على أساس إني عندي عربية أو باسوق الهبالة
ع الشيطنة، والاقامة وكروت التأمين- طبعاً ده بعد ما جيت السعودي بس... كانت
المحفظة ناقصة أصلها...
انتبه معي عزيزي القارئ ....عزيزتي القارئة
دي شنطتي قبل الجواز
بعد الجواز: أضف إلى شنطتك هذه الأشياء الجديدة
17-
بامبرز و
وايبس
18-
شامبو،
شاور جيل، بودي لوشون- علب صغير طبعاً
19-
بسكويت،
جبنة شيدرأو نستو، جيلي كولا أو الدباديب اللي شبهه دي
20-
ميه،
عصير أو حليب
21-
بافتات
عشان الهدوم متتوسخش لو هناكل بره
22-
برنيطة
ونظارة لولو عشان الشمس.. ولو ف الشتا زود الايس كاب
23-
شوية
مناديل زيادة.., ما انت متضمنش هتحتاج كمية قد ايه
24-
طقم هدوم
احتياطي
بالك بقى أساحبي، لما أولد هاشيل ايه؟ باك بااااااااااج؟؟؟؟
حاول تشوف كده ينفع أستغنى عن حاجة واحدة من الحاجات دي وأنا خارجة
وابقى اتريق بقى ولا أسمع منك نص كلمة
نقطنا بسكاتك بقى اساحبي
ولو حد كان بيتسائل: يا ترى ليه شنطتك كبيرة أوي كده ليه؟
مالياها طووووووب ولا ايه؟
آديه عرف الاجابة
